Fuzuilh
Ur fuzuilh zo un arm-tan hir evit tennañ a-bell hag a rank sañset bezañ implijet gant e zaouarn pe pozet war ur pezh (daoubez, trebez, sac'h) pa denner. E geriaoueg an arme ez eo ur fuzuilh un arm-tan dezhañ ur c'hanol rizennet. Pa raer anv eus armoù implijet er-maez eus an arme (evit chaseal dreist-holl) ez eo ur fuzuilh un arm dezhañ unan pe meur a ganol flour.[1]
Lies eo ar fuzuilhoù. Ar fuzuilhoù-arsailh a zo implijet dreist-holl gant an armeoù. Ar fuzuilhoù-resisted a vez implijet gant an armeoù ha strolladoù surentez ar Stadoù evel ar polis. Fuzuilhoù poultr-du a vez implijet c'hoazh gant dastumerien hag e kenstrivadegoù tennañ gant armoù kozh.
Pa raer anv eus un arm-tan hir rizennet e ganol(ioù) hag implijet evit chaseal pe e bed ar sportoù-tennañ e implijer kentoc'h ar ger karabinenn. Met e geriaoueg an arme e implijer a-wechoù ar ger karabinenn evit armoù rizennet o c'hanol berroc'h o ment hag o hed-tenn (Karabiner 98k, M1 Carbine).
Fuzuilh-arsailh
Ur fuzuilh-arsailh, pe fuzuilh-argad, a zo graet evit tennañ betek 300 metrad gant ar mod damaotomatek, pe betek 30 metrad er mod aotomatek. Hendad ar fuzuilhoù-arsailh en istor a voe an Avtomat Ferodova, krouet e Impalaeriezh Rusia e 1916. E fin an Eil Brezel-bed e voe ijinet en Alamagn ar Sturmgewehr 44, a zo gwelet evel ar fuzuilh-arsailh vodern kentañ. Hiziv e implij ar bras eus an armoù-mañ ar c'halibr standart 5,56 x 45 mm NATO. E-touez ar munisionoù all implijet ar muiañ e kaver ar 7,62 x 51 mm NATO pe ar 7,62 x 39 soviedel.
Skouerioù fuzuilhoù-arsailh
- Sturmgewehr 44 (Trede Reich, 1942)
- AK-47 (URSS, 1947)
- FN FAL (Belgia, 1948)
- M16 (Stadoù-Unanet Amerika, 1958)
- FAMAS (Frañs, 1973)
- SIG-550 (Suis, 1990)
- HK416 (Alamagn, 2005)
Fuzuilh-resisted
Ur fuzuilh resisted a vez implijet gant an armeoù da lazhañ enebourien pe distruj dafar en tu all da 300 metrad. Bremañ e vez atav pourveziet gant ul lunedenn da welet pell. E miz Mae 2017 ez eus bet lazhet un den da 3.540 metrad gant ur soudard kanadian e Irak[3]. E-touez ar c'halibroù bras implijet ar muiañ hiziv e kaver an .50 BMG, an .338 Lapua Magnum, ar re .375 ha .408 CheyTac. En XXvet kantved ez eus bet implijet kenañ kalibroù evel an .30-06 Springfield gant arme Stadoù-Unanet Amerika. Ar c'halibr .308 Winchester a vez implijet c'hoazh e fuzuilhoù a-bell gant kalz strolladoù polis er bed. A-wechoù e vez graet gant ur c'halibr bihanañ evel an 5,56 x 45 NATO implijet e fuzuilhoù Sig Sauer 550 ar GIGN e Frañs[4].
Skouerioù fuzuilhoù a-bell
- SVD Dragunov (URSS, 1963)
- An M40 amerikan (1966), diazezet war ar garabinenn Remington 700
- FR-F1 (Frañs, 1966)
- FN SCAR-H PR (Belgia)
- Barrett M82 (Stadoù-Unanet Amerika, 1982)
- M24 (Stadoù-Unanet Amerika, 1988)
- McMillan TAC-50 LRSW (Stadoù-Unanet Amerika, fin ar bloavezhioù 1980)
- Accuracy International AWM (Rouantelezh-Unanet, 1996)
Fuzuilh-chase
Ur fuzuilh-chase he deus alies daou ganol flour, a-wechoù unan (fuzuilhoù damaotomatek) pe dri. Implijet e vez da dennañ war loened tost a-walc'h (dindan 50 metrad). Gellet a ra bezañ karget gant kartouchennoù plom evit ar jiboez bihan pe gant kartouchennoù slug enne ur boled evit al loened brasoc'h (moc'h-gouez, kirvi...). E-touez ar c'halibroù implijet ar muiañ e kaver ar c'halibroù 12 ha 20. Ar c'halibr 16 a oa an hini implijetañ e Frañs a-raok ar bloavezhioù 1970. Ar c'halibr .410 (pe 36 magnum) a gaver e fuzuilhoù bihan da lazhañ loened bihan a-dost. En Europa eo kambret peurliesañ ar fuzuilhoù chase evit kartouchennoù 65 mm, 70 mm pe 76 mm (magnum) hirder o c'hartouchenn.
Skouerioù fuzuilhoù-chase
- Colt Model 1878 (Stadoù-Unanet Amerika)
- Browning Auto-5 (Belgia, 1905)
- Manufrance Robust (Bro-C'hall, 1913)
- Browning B25 (Belgia, 1925)
- Verney-Carron Sagittaire (Bro-C'hall, 1966)
Fuzuilh poultr-du
Da glokaat.
Gwelet ivez
