Club Deportivo El Nacional

O Club Deportivo El Nacional é unha entidade deportiva ecuatoriana da cidade de Quito, fundada o 1 de xuño de 1964, máis coñecida pola súa sección de fútbol, unha das máis importantes do país con 13 títulos da Liga ecuatoriana. Trátase dun club vinculado ás Forzas Armadas, que patrocinan ó club, cuxos socios son maioritariamente membros activos ou retirados de dita institución. O club caracterízase por ter só xogadores de nacionalidade ecuatoriana.

CD El Nacional
Nome	Club Deportivo El Nacional
Alcume(s)	Los puros criollos, El 13 Veces Glorioso, Equipo Militar, El Nacho, La Máquina Gris
Fundación	1 de xuño de 1964
Estadio	Estadio Olímpico Atahualpa Quito, Ecuador
Inauguración	25 de novembro de 1951
Capacidade	40.948
Propietario	Consistorio de Quito
Presidente	Hugo Villacís
Adestrador	Mario Saralegui
Liga	Serie A de Ecuador
2011	3º
Vestimenta	Lotto
Patrocinador	ANDEC
Na rede
http://www.elnacional.ec/
Titular Alternativo

Outras seccións deportivas do club adícanse ó baloncesto, á ximnasia e ó tenis de mesa.

A maior rivalidade deportiva do CD El Nacional é a que mantén co LDU Quito, xa que ámbolos dous equipos son os máis laureados e seguidos da capital do país, aínda que tamén mantén moita rivalidade co Barcelona SC, co CS Emelec e co Deportivo Quito.

O equipo de fútbol disputa os seus encontros como local no Estadio Olímpico Atahualpa, recinto que comparte co Deportivo Quito e coa selección de Ecuador, e que foi construído polo consistorio de Quito. Foi inaugurado o 25 de novembro de 1951, e actualmente conta con capacidade para acoller a 40.000 seareiros. Ademais de ter o terreo de xogo para os encontros de fútbol, conta cunha pista de atletismo sintética.

Nas 23 participacións do club na Copa Libertadores, o seu mellor resultado foi a semifinal no ano 1985. En 1970 foi finalista da Recopa Suramericana. Esa final foi a primeira dun equipo ecuatoriano nunha competición continental da Conmebol.