Director, directora de cinema
Un director ou directora de cine, ou cineasta, é unha persoa que dirixe a realización dunha película ou filme. A dirección de cine é o posto profesional encargado de dirixir a filmación dunha película, dando instrucións ós actores e actrices, decidindo o ángulo da cámara e o desprazamento desta nos planos, supervisando o decorado e o vestiario, e todas as demais funcións necesarias, especialmente as referentes aos asuntos artísticos da película, para levar a cabo a rodaxe. O director considérase en termos xerais como o creador da obra cinematográfica.[1]
A importancia que se lle ten dado ós directores na historia do cine é variada. Por exemplo, na época de ouro de Hollywood, o posto máis importante na creación dunha película era a produción, e a personaxe máis relevante era o actor ou a actriz, sendo considerada a dirección como a parte técnica que dirixía cada día a filmación. Primeiro en Europa e, máis tarde nos Estados Unidos, o cargo de dirección foi adquirindo maior relevancia até chegar a ser considerado a parte principal na autoría dunha película.
Funcións
Os directores ceden moitas das súas responsabilidades a outros membros do seu equipo de realización de películas, chamado equipo de cine. Por exemplo, o director dille á persoa responsable da iluminación e ao director de fotografía que estilo de luces quere e crean o alumeamento para el. É habitual que os directores de cine traballen en estreita colaboración cun produtor de cine. Os produtores controlan o lado non artístico da realización de películas, por exemplo todo o financiamento que se usa para facer a película.
A cantidade de control que un director ten ao crear a súa película é diferente en cada caso. Sempre hai certo control polo estudio cinematográfico e polos produtores. Unha minoría de directores, como Stanley Kubrick, Jean-Luc Godard, Steven Spielberg ou James Cameron teñen un control moito maior nas decisións sobre os seus filmes.[2]
Aínda que o seu papel é diferente segundo o director en cuestión (que, ademais de estilos diferentes, ten estratexias de traballo igualmente diversas), o traballo do director de cine, supervisando e dirixindo a execución da rodaxe, empregando recursos humanos, técnicos e os recursos dramáticos e artísticos inclúen:[3] [4]
- A definición da orientación artística xeral que caracterizará o filme no seu conxunto;
- Análise e interpretación do guión cinematográfico, adaptándoo á cinematografía;
- A dirección das interpretacións dos actores, tanto dende o punto de vista técnico (colocándoos nun lugar e escenario determinados) como dende o punto de vista dramático, solicitando o tipo de emoción desexada para o personaxe;
- A organización e selección de decorados;
- A dirección dos medios técnicos (deseño de son, iluminación, encadramento);
- Elixir o equipo técnico e o elenco (nalgúns casos, só);
- Supervisión dos preparativos da produción;
- Elección de lugares, decorados, vestiario, escenografía e equipamento;
- Dirección e supervisión da montaxe, dobraxe, creación do musical e da banda sonora (ou banda sonora);
- Procesamento da película ata a copia final;
- Segue a construción do tráiler.
Escolma de directores e directoras famosos
Véxase a categoría directores de cinema.
Escolma de directores e directoras galegos
Véxase a categoría directores de cine de Galicia
Algúns directores que non son galegos rodaron filmes de temática e localizacións galegas, como Fernando León de Aranoa, Alejandro Amenábar, Jaione Camborda etc.
Notas
Véxase tamén
 | Este artigo sobre arte é, polo de agora, só un bosquexo. Traballa nel para axudar a contribuír a que a Galipedia mellore e medre. Existen igualmente outros artigos relacionados con este tema nos que tamén podes contribuír. |