_Veronica_chamaedrys_-_Plant_Habit.jpg) | |
| Łučny rozraz (Veronica chamaedrys) | |
| systematika | |
|---|---|
| Domena | Eukaryoty |
| Swět | Rostlinstwo |
| Asteridy Euasteridy I | |
| rjad: | (Lamiales) |
| swójba: | Putnikowe rostliny (Plantaginaceae) |
| ród: | Rozraz[1][2] (Veronica) |
| družina: | Łučny rozraz |
| wědomostne mjeno | |
| Veronica chamaedrys | |
| L. | |
Łučny rozraz (Veronica chamaedrys) je rostlina ze swójby putnikowych rostlinow (Plantaginaceae). Dalše serbske ludowe mjeno je rězačk[3].
Po někotrych žórłach so swójbje trudownikowych rostlinow (Scrophulariaceae) přirjaduje.
Łučny rozraz je trajne zelo, kotrež docpěwa wysokosć wot 15 hač 40 cm.
Jeho stołpik njese kosmy w dwěmaj rjadomaj.
Łopjena su přećiwostejne, krótko stołpikate abo sedźace, jejkojte, hrubje zubate, rozpjeršenje kosmate hač nimale nahe a docpěwaja dołhosć wot 3,5 cm.
Kćěje wot meje hač julija. Azurmódre kćenja docpěwaja wulkosć wot 10 hač 14 mm a steja po wjacorych w čumpatych kićach. Wone njesu štyri njejenake krónowe kónčki. Jich póžěrk je běły a njesu ćmowe žiłki. Keluch je štyridźělny.
Płodowa kapsla je třiróžkata abo wutrobojta a kosmata. Wona docpěwa šěrokosć wot 4 hač 5 mm.
Rosće w žiwych płotach, na kerčinowych a pućowych kromach, łukach, a w swětłych, suchich lěsach. Preferuje čerstwe hač skerje suche, humozne pódy w słóncu abo w połsćinje.
Rostlina je w Europje rozšěrjena.
