Ֆլորիդայի համալսարան
Ֆլորիդայի համալսարան (անգլ.՝ University of Florida), բարձրագույն ուսումնական հաստատություն Միացյալ Նահանգների Ֆլորիդա նահանգի Գեյնսվիլ քաղաքում։ Հիմնադրվել է 1853 թվականին[17]։
Պատմություն
Համալսարանի հիմնադրման տարեթիվ է համարվում 1853 թվականի հունվարի 6-ը, երբ Ֆլորիդայի նահանգապետ Թոմաս Բրաունը ստորագրել է Ֆլորիդա նահանգում բարձրագույն կրթության պետական աջակցության համապատասխան օրինագիծ։
Մինչև 1866 թվականը հաստատությունը կրել է Արևելյան Ֆլորիդայի Սեմինարիա անունը, այնուհետև՝ Քաղաքացիական պատերազմից հետո, որի ընթացքում սեմինարիան չէր գործում, անվանափոխվել է Ֆլորիդայի համալսարան։ Միևնույն ժամանակ փոխվել է նաև համալսարանի տեղադրությունը. ուսանողներն ու դասախոսները տեղափոխվել են Գեյնսվիլ քաղաք։ 1903 թվականին համալսարանում սկսել է գործել գյուղատնտեսական քոլեջ, և ուսումնական հաստատությունը ձեռք է բերել ներկայիս տեսքը։
1905 թվականին ընդունվել է Բակմենի օրենքը, որն օգնել է միավորել նահանգի քոլեջները համալսարանի հովանու ներքո։ Դրա հետ մեկտեղ օրենքը հաստատել է սեռային և ռասայական խտրականություն։ 1906 թվականին Գեյնսվիլում բացվել է համալսարանական կամպուս[18]։
Սկսած 1946 թվականից՝ շրջանավարտների շրջանում աճել է հետաքրքրությունը համալսարանի հանդեպ։ Դիմողների մեջ մեծ թիվ էին կազմում Երկրորդ համաշխարհային պատերազմի վետերանները, որոնք բուհ ընդունվում էին հատուկ օրենքով։ 1958 թվականից համալսարանում թույլատրվել է սովորել նաև աֆրոամերիկացիներին։
1985 թվականին Ֆլորիդայի համալսարանը դարձել է Ամերիկյան համալսարանի ասոցացիայի անդամ, որը բաղկացած էր ԱՄՆ-ի և Կանադայի 62 ակադեմիական և մասնավոր գիտահետազոտական համալսարաններից[19]։
Կառուցվածք
Ֆակուլտետներ
Համալսարանն ունի հետևյալ ֆակուլտետները՝ կենսաբանական, երկրաբանական, երկրաֆիզիկական, պատմաբանական, փիլիսոփայության պատմության, կենսաֆիզիկական, անգլերենի, աստղագիտական, համակարգչային համակարգերի, ինժեներական, երկրաքիմիական, քիմիական, բնապահպանական, կառավարման, սոցիոլոգիական, ֆիզիկական, մաթեմատիկական, կենսաքիմիական, օդանավորդության, մեխանիկայի, էլեկտրիկայի և այլն։
Ուսանողներ
Համալսարանում ուսանում է մոտավորապես 49,5 հազար ուսանող ավելի քան 130 երկրից։ 2007 թվականին Ֆլորիդայի համալսարանի Միջազգային կրթության ինստիտուտի կողմից ուսումնասիրություններ են անցկացվել, որոնց համաձայն՝ բուհը երկրում օտարերկրյա ուսանողների քանակով զբաղեցրել է 17-րդ տեղը[20]։
Ֆլորիդայի համալսարանն աֆրոամերիկացիներին առաջարկվող բակալավրի աստճանների թվաքանակով Միացյալ Նահանգներում զբաղեցնում է երկրորդ տեղը, և երրորդ տեղը՝ իսպանալեզու ուսանողների թվով։ Բուհը գտնվում է հինգերորդ տեղում աֆրոամերիկացիներին տրվող դոկտորական աստիճանների թվաքանակով, և երկրորդ տեղը՝ լատինամերիկացիների համար։
Թանգարաններ
Համալսարանի մոտակայքում է գտնվում 1891 թվականին հիմնադրված բնական պատմության թանգարանը։ Այնտեղ պահպանվում են տարածաշրջանի բնական պատմությանը, մշակույթին և կենսաբանությանը նվիրված բազմաթիվ ցուցանմուշներ։ Թանգարանում է գտնվում թիթեռների՝ աշխարհի ամենամեծ հավաքածուն՝ ավելի քան 6 միլիոն նմուշ[21]։
Համալսարանի տարածքում է գտնվում նաև 1990 թվականին հիմնված գեղարվեստի թանգարանը։ Այստեղ ներկայացված են ասիական և աֆրիկական գեղանկարչության հավաքածուներ, ժամանակակից արվեստի առարկաներ, ինչպես նաև լուսանկարներ[22]։
Հայտնի շրջանավարտներ և դասախոսներ
Համալսարանում տարբեր ժամանակներում աշխատել են.
- Մարի Գել-Ման (ծնված՝ 1929), ամերիկացի ֆիզիկոս, 1969 թվականի ֆիզիկայի Նոբելյան մրցանակի դափնեկիր
- Հարոլդ Կրոտո (ծնված՝ 1939), բրիտանացի քիմիկոս, 1996 թվականի քիմիայի Նոբելյան մրցանակի դափնեկիր
- Ռոբերտ Գրաբս (ծնված՝ 1942), ամերիկացի գիտնական-քիմիկոս, 2005 թվականի քիմիայի Նոբելյան մրցանակի դափնեկիր
- Ջեյմս Բյուքանան (կրտսեր) (1919 - 2013), ամերիկացի տնտեսագետ, 1986 թվականի Նոբելյան մրցանակի դափնեկիր
- Պոլ Դիրակ (1902-1984), անգլիացի ֆիզիկ, քվանտային ֆիզիկայի տեսության հիմնադիրներից մեկը, 1933 թվականի ֆիզիկայի Նոբելյան մրցանակի դափնեկիր
- Ջոն Ռոբերտ Շրիֆեր (ծնված՝ 1931), 1972 թվականի ֆիզիկայի Նոբելյան մրցանակի դափնեկիր
- Հենրիխ Էյքորն (1927-1999), ամերիկացի աստղագետ
- Ջոն Գրիգս Թոմփսոն (ծնված՝ 1932), մաթեմատիկ-հանրահաշվագետ, միաժամանակ երեք մրցանակների դափնեկիր՝ Ֆիլդսյան մրցանակ (1970), Վոլֆի մրցանակ (1992) և Աբելի մրցանակ (2008)
Բուհի ուսանողների թվում եղել են.
- Բոբ Գրեհեմ (ծնված՝ 1936), Ֆլորիդայի 38-րդ նահանգապետը և նույն նահանգի սենատորը
- Մայքլ Քոնելլի (ծնված՝ 1956), դետեկտիվ ժանրի ամերիկացի գրող
- Ալ Հորֆորդ (ծնված՝ 1986), NBA-ի «Ատլանտա Հոքս» թիմի բասկետբոլիստ
- Ջոակիմ Նոա (ծնված՝1985), NBA-ի «Չիկագո Բուլս» թիմի բասկետբոլիստ
Ծանոթագրություններ
Արտաքին հղումներ
Վիքիպահեստն ունի նյութեր, որոնք վերաբերում են «Ֆլորիդայի համալսարան» հոդվածին։ |