Sir John Ernest Walker (* 7. Januar 1941 in Halifax) is en britisch Molekularbioloog, de 1997 gemeensam mit Paul Delos Boyer un Jens Christian Skou för sien Arbeiten an dat Adenosintriphosphat (ATP) mit den Nobelpries för Chemie uttekent wurrn is.[1]
John Ernest Walker wurr 1941 in Halifax in Yorkshire boren. He hett an de University of Oxford studeert un dor 1969 sien Doktertitel maakt. 1974 fung he as Mitarbeiter an dat Medical Research Council Laboratory of Molecular Biology an de University of Cambridge an un is dor siet 1982 als Senior Scientist. 1995 wurr he in de Royal Society upnommen, de hüm 2012 mit de Copley Medal uttekent hett. 1999 wurr he as Knight Bachelor („Sir“) adelt.
As sien Kollegen Skou un Boyer befaat sück John Ernest Walker vör allen mit Enzymen, de de Arbeit vun dat Adenosintriphosphat, den Hööftenergieleeveranten in‘n Metabolismus vun de Organismen, katalyseeren. He un Boyer hemm sück dorbi vör allen up de Synthees vun dat ATP dör dat Enzym ATP-Synthase konzentreert. Dat stellt ut dat Adenosindiphosphat (ADP) un en wieder Phosphatmolekül dat ATP her, indem dat disse beid annanner binnd. In de 1980er Jahren hett Boyer en Modell vörstellt, wu över de ATP-Synthase dat ATP billd wurrn kunn. As Basis hett he dorto biochemische Analysedaten nommen. De Korrektheit vun dat Modell wurr vun John Ernest Walker dör Strukturanalysen vun dat Enzym bestätigt.