跳去內容

梅艷芳

出自維基百科，自由嘅百科全書
梅艷芳
女藝人
羅馬拼音Mui Yim Fong
英文名Anita Mui
花名寶珠、珠女、Anita、梅姐（晚輩稱呼）、阿梅（前輩、同輩稱呼）、香港女兒、樂壇大姐大、百變梅艷芳、梅姑（中國大陸、台灣稱呼）、塔塔（忠粉稱呼）、Queen（草蜢稱呼）、東方麥當娜（美國《時代週刊》）
國籍 中國（香港）
籍貫廣東合浦
出世1963年10月10號
 英屬香港 旺角花園街
死2003年12月30號(2003-12-30)（40歲）[1]
 香港跑馬地養和醫院
死因子宮頸癌併發症肺功能衰退失調
墓地 香港新界離島區大嶼山昂坪海會塔上[2][3]
職業歌手、演員、主持人
語言粵語、英文、普通話、日文
教育程度中學2年級
母校九龍婦女福利會李炳紀念學校
宗教信仰佛教
父母母：梅覃美金
屋企人大哥：梅啟明
二哥：梅德明（殁）
三姐：梅愛芳（殁）
音樂類粵語流行、華語流行
演奏樂器人聲、爵士鼓
出道作品《心債》（1982年）
代表作品《似水流年》
《壞女孩》
《胭脂扣》
《夕陽之歌》
《似是故人來》
活躍年代1982年到2003年
唱片公司華星唱片（1982年到2000年）
Mui Music / 正東唱片（2001年到2003年）
網路電影資料庫（IMDb）資訊
獎
香港電影金像獎
最佳女主角
1989年 《胭脂扣》

最佳女配角
1984年 《緣份》
1998年 《半生緣》

最佳原創電影歌曲
1989年 〈胭脂扣〉-《胭脂扣》
1992年 〈似是故人來〉-《雙鐲》
1994年 〈女人心〉-《東方三俠》
香港電影金紫荊獎
最佳女配角
1998年 《半生緣》
金馬獎
最佳女主角
1987年 《胭脂扣》
十大中文金曲頒獎典禮
金針獎
1998年
其他獎
最受歡迎女歌手 – 十大勁歌金曲
1985年至89年

叱吒樂壇女歌手金獎 – 叱咤樂壇流行榜
1989年

叱吒樂壇女歌手銀獎 – 叱咤樂壇流行榜
1991年

最佳女主角 – 中國長春電影節
2002年 《男人四十》

最佳女主角 – 華語電影傳媒大獎
2002年 《男人四十》

百大演員獎 – 華語電影傳媒大獎
2005年

梅艷芳（粵拼：mui4 jim6 fong1，英文：Anita Mui，1963年10月10號—2003年12月30號），同何冠昌上契後另名何加男（ho4 gaa1 naam4），生於香港，鄉下喺廣東合浦，香港歌手及演員。梅艷芳喺全球嘅演藝界（尤其係華人地區）有祟高嘅地位、有「樂壇大姐大」同埋「樂壇女王」嘅稱號。佢視覺形象百變，而且係大中華地區首位喺同一個演唱會換幾套衫、喺唔同專輯封面同埋MV有唔同造型嘅歌手，所以又叫「百變天后」。

梅艷芳自細同屋企人喺遊樂場賣唱，後來喺TVB嘅新秀歌唱比賽勝出，星途由此展開，成為1980年代香港樂壇上重要嘅巨星。佢嘅舞台衣著華麗而大膽、早期歌曲路線冶艷放蕩，「壞女孩」形象深入民心，演唱會場數曾多次創咗香港紀錄，事業顛峰時喺1985年至1989年度《十大勁歌金曲頒獎典禮》中連續五屆攞「最受歡迎女歌星」，並培育多名音樂後輩，喺香港及亞洲樂壇享有崇高地位。同時，電影演出令佢得到多個獎，演技受到推崇。2003年，佢因子宮頸癌病逝，離世前對事業上嘅輝煌同感情生活上跌跌撞撞時有所憾。

喺佢嘅演藝人生中，先後推出卅幾張唱片，1994年全球唱片銷量已過千萬張，先後接拍約40部電影。香港人暱稱佢阿梅（aa3 mui1）或梅姐（mui1 ze4），同張國榮、譚詠麟、陳百強等人成為香港廣東曲喺1980年代嘅文化象徵。

生平

童年

1963年10月10號，梅艷芳喺旺角花園街嘅屋企出世，佢阿媽梅覃美金係歌舞團搞手，阿爸早死，有4個仔女。其中三個仔女係大陸出世，得佢先係香港出世。梅艷芳4歲就同家姐梅愛芳登台，喺阿媽創辦嘅「錦霞歌舞團」唱歌。佢中一輟學，喺香港荔園嘅表演場、酒廊、歌廳表演。

佢曾經憶述呢段時間，話最難忘係着住歌衫走場，冇司機接送，冇錢坐的士，要着住誇張嘅舞台衫搭巴士，乘客都望住佢；又試過趕去酒店演出時被流氓辱罵，佢想發火鬧人、佢想喊，但最後忍住。佢喺電台訪問中講：「以前唱歌嘅人唔被尊重，被叫做『歌女』，家人都唔畀同學同我來往，睇住同學玩，我永遠孤單一人。」

出道

1982年，梅艷芳18歲時參加無綫電視同華星唱片主辦嘅「第一屆新秀歌唱比賽」脫穎而出，以圓潤沉厚嘅聲線喺電視上唱出徐小鳳名曲《風的季節》，摘下新秀冠軍，正式踏上星途，初出道時被冠以「小徐小鳳」嘅稱號。

阿梅第一首唱得街知巷聞嘅歌曲，係卡通片《IQ博士》嘅主題曲。1983年，阿梅以《交出我的心》嘅日文版到日本參加東京音樂節，漸展星光。同年，首張個人唱片《赤色梅艷芳》推出，隨即創下五張白金唱片嘅銷量，而且入選年度十大金曲，一炮而紅。

事業顛峰期

梅艷芳喺八十年代開創嘅「壞女孩」形象，喺禁播及爭議聲中，反而令佢迅即竄紅。

1985年，《壞女孩》唱片推出，一舉創下8張白金唱片嘅銷量記錄，同年12月，佢喺香港紅磡體育館舉辦首場個人演唱會，連演15場，創下當時嘅紀錄。兩年後，「壞女孩」嘅歌唱風格進一步演化，《似火探戈》同埋《烈焰紅唇》兩張唱片問世，梅艷芳以性感形象演出，引起哄動。此後佢再創下於紅館舉行演唱會最高場數紀錄，被喻為「梅廿八」同「梅三十」，代表佢連開28場同30場演唱會，事業如日中天。由於佢喺85至89年度《十大勁歌金曲頒獎典禮》中連續五屆攞「最受歡迎女歌星」，所以唔單只被視為樂壇巨星，亦被稱為「樂壇大姐大」同埋「樂壇女王」；喺舞台上，因形象百變，服飾領導香港潮流，形象前衛大膽，唔單只被稱為「百變天后」，而且係大中華地區首位喺同一個演唱會換幾套衫、喺唔同專輯封面同埋MV有唔同造型嘅歌手。

其影壇事業同樣觸目。早喺1984年，佢憑《緣分》一片獲得第四屆《香港電影金像獎》「最佳女配角」；1988年，同好友張國榮同演《胭脂扣》，獲得第二十三屆《台灣金馬獎》「最佳女主角」、《香港電影金像獎》「最佳女主角」、《亞太影展》「最佳女主角」等殊榮，登上演藝事業嘅高峰。佢係第一位，亦係第一位曾奪「歌后」/「天后」（最受歡迎女歌星）及「影后」（最佳女主角）嘅香港女藝人。佢亦曾經係香港片酬最高嘅女演員。香港名導演杜琪峰話過，佢係香港當代唯一一個演、歌都非常傑出嘅藝人。除咗《胭脂扣》外，佢多次獲提名《香港電影金像獎》「最佳女主角」，計有《何日君再來》、《審死官》、《紅番區》、《慌心假期》及《男人四十》等，戲路不限。

演藝事業嘅轉捩點

位於必列者士街37號嘅東華三院梅艷芳長者日間護理中心，係梅艷芳捐款100萬港元資助籌建，喺1995年3月啟用。

不過，1989年嘅六四事件，成為佢演藝事業嘅其中一個轉捩點。佢因為不滿中國大陸政府鎮壓學生運動，參與「民主歌聲獻中華」嘅演出。辭演後嚟獲得多個獎項嘅電影《阮玲玉》。1990年，梅艷芳舉辦30場「百變梅艷芳夏日耀光華演唱會」後，宣佈唔再攞任何音樂方面嘅獎，一年後宣布告別樂壇，引起傳媒及樂迷嘩然，並舉行「梅艷芳告別舞台演唱會」。梅艷芳喺高峰期突然退出樂壇，相傳同嗰年黑幫肆虐演藝界有關。

到咗九十年代，憑《東方三俠》、《審死官》同埋《逃學威龍3龍過雞年》成為票房保證，後來佢憑《半生緣》再次攞咗《香港電影金像獎》「最佳女配角」。

音樂方面，九十年代中梅艷芳復出樂壇，推出大碟《情歸何處》，其中嘅《情歸何處》、《朦朧夜雨裏》等歌曲深受樂迷歡迎；其後嘅佢跟黃耀明、王雙駿、蔡一智等新派音樂人合作，製作出《Larger Than Life》及《我很快樂》等備受樂迷好評嘅唱片；喺1998年度《十大中文金曲頒獎典禮》得到「香港樂壇最高榮譽大獎——金針獎」；1999年佢同陳奕迅合唱《同聲一哭》；2002年佢嘅入行二十週年紀念專輯《With》更破天荒邀得譚詠麟、張國榮、張學友、劉德華、王菲、鄭秀文、陳慧琳、林憶蓮、黃耀明、許志安、蘇永康十一位出名歌手合唱，係香港樂壇嘅另一個紀錄。

除咗香港之外，佢喺中國大陸、台灣以至亞洲各地都深受樂迷歡迎，佢嘅國語金曲有《親密愛人》、《女人花》及《放開你的頭腦》等。

佢喺樂壇廣收徒弟草蜢、許志安、何韻詩、譚耀文同埋彭敬慈係佢嘅徒弟，而蘇永康、梁漢文、陳奕迅等也受到佢嘅提攜。

梅艷芳曾經為演藝界爭取權益。佢喺2001年當選香港演藝人協會會長，成為首位當選呢個職位嘅女性；並喺2002年就《東週刊》「裸照風波」，以「天地不容」為號發起遊行同埋聲討大會。

佢一生為公益為慈善出力，佢成立嘅「梅艷芳四海一心基金會」到今日造福社會，佢更曾經擔任香港樂施會嘅「樂施大使」，佢死前為非典型肺炎嘅受害者籌款，發起「1:99」音樂會，號召全香港歌手演出，並以「茁壯行為」成立基金會。

佢嘅遺作《男人四十》重令佢成為《長春電影節》嘅「最佳女主角」。

最後人生

2003年，「非典型肺炎」喺香港爆發，梅艷芳發起成立「茁壯基金」，協助受害家庭孤雛，並積極主辦音樂會，籌集善款，但呢一年，外界盛傳佢患癌，但一直拒絕治療，同年9月公開自己患子宮頸癌，佢堅稱：「呢場仗我一定打贏！」並承諾奮勇對抗癌病，後來喺健康狀況惡劣及醫生反對下，堅持抱病舉行演唱會，外界認為佢希望完成「死喺舞台」嘅心願。

12月30日凌晨2點50分，演唱會早已順利結束，梅艷芳因為癌細胞擴散至肺部，影響肺功能而逝世，終年40歲。佢喺最後一次演唱會上講過，遺憾自己冇結婚，冇仔女，但佢離世嘅時候，各方親友同埋生前嘅男友，紛紛趕去醫院，陪佢走完最後一程。

佢辭世嗰時，消息同樣哄動。香港多份華文報章推出特輯、以至號外；由當時香港特首嘅董建華、中共駐港辦公室副主任李剛以至前學運領袖吾爾開希、香港立法會議員劉千石，都致送花圈，或親身到靈堂致祭。數千歌迷到場致祭，唔少人身穿印上「Anita Mui永遠懷念」嘅黑服。

私人生活

梅艷芳嘅人生一如星途，傳聞多，緋聞多，不時成為香港傳媒追逐嘅話題。佢初出道時以「壞女孩」形象示人，引人瑕想，嗰陣香港曾盛傳佢臂上有紋身。1980年代嘅香港，紋身仍然係黑社會嘅象徵，呢個消息令唔少樂迷感到困惑。

愛情

佢離世前，冇仔女、冇結過婚，喺多次公開場合中坦言不無所憾。喺佢嘅星途中，曾遇上多段戀情，但最終都因佢嘅名氣，愛情未能結果。

進入演藝圈後，梅艷芳同苗僑偉合作電視劇「香江花月夜」傳出是介入苗僑偉與戚美珍的第三者，又或許跟本是電視劇宣傳手法。同苗僑偉戀情告吹後，佢同富家子鄒世龍相戀，一年後分手，阿梅曾直言：「大家年紀輕，脾氣都硬！」

80年代，佢陪近藤真彥到北海道開演唱會，近籐喺車上倚住阿梅休息，並向工作人員吐露戀情。後來因為中森明菜介入，戀情無疾而終。阿梅曾講：「虧我嗰年對佢咁好。」

模特兒劉米高係梅艷芳喺拍攝音樂錄像「SUMMER LOVER」時認識，兩人感情不定，但據報佢開演唱會時，劉米高也到場捧場，兩人雖然已分手，梅艷芳重係向佢唱咗「SUMMER LOVER」。

林國斌同佢嘅戀人關係算係多啲人知。1991年，梅艷芳同林國斌相戀時，傳出佢被黑社會人物掌摑嘅新聞，嗰陣林國斌不離不棄陪喺一旁，但林國斌星途遠唔及女友，佢曾經自嘲個個都認為自己被女友「包養」。兩人交往兩年分手。

一直到1995年，趙文卓同梅艷芳嘅姊弟戀曝光，轟動香港娛樂圈，但梅艷芳嘅名氣，為兩人帶嚟沉重壓力，兩人最終分手，當前女友罹患癌症嘅消息傳出時，趙文卓只沉重地講：「我希望我係神醫。」

親情

梅艷芳同張國榮感情深厚、情逾骨肉。同佢契妹羅美薇喺1980年代同何冠昌夫婦上契。有人認為，佢同喺娛樂圈內「親戚」嘅關係，重好過同自己阿媽阿哥。而喺2004年1月阿梅嘅葬禮，包括何冠昌遺孀，張學友夫婦在內嘅契媽同埋金蘭姊妹都坐喺家屬席嘅重要位置。佢同歌手謝霆鋒係結拜姊弟。

唱片

精選專輯

滄海遺珠

  • 1984年
    • 緣份（同張國榮合唱，收錄喺「張國榮Leslie」CD）
  • 1985年
    • 愁思逐水流（電視劇「開心女鬼」插曲）
    • 我與你、他與我（電視劇「挑戰」主題曲，收錄喺「華星雜錦碟」CD）
    • 別離的無奈（電影「歌舞昇平」插曲，收錄喺「華星雜錦碟」CD）
    • 邁向新一天（電影「歌舞昇平」主題曲，同李中浩合唱，收錄喺「Joe」CD）
  • 1986年
    • 劍伴誰在（電視劇「倚天屠龍記」主題曲，同梁朝偉合唱，收錄喺「TVB 週年全紀錄」CD）
    • 深山唱我歌（電視劇「倚天屠龍記」插曲，同梁朝偉合唱）
    • 心隨流水遠（電視劇「倚天屠龍記」插曲，同梁朝偉合唱）
    • 魔術師（電影「大小不良」主題曲，收錄喺「華星新節奏」CD）
    • 斷線木偶（電視劇「移民何價」主題曲，收錄喺「華星新節奏」CD）
    • 心裡那點真（電視劇「大廈」主題曲，收錄喺「華星新節奏」CD）
    • 紫色的愛（電影「偶然」主題曲）
    • Fly Away（電影「殺妻2人組」主題曲）
    • 戀愛多幾次（電影「歡樂叮噹」主題曲）
  • 1987年
    • 人間有情（港台劇集「人間有情」主題曲）
    • 地球大合唱（梅艷芳、徐小鳳、譚詠麟、張學友、鍾鎮濤、陳百强、張國榮等人合唱，收錄喺「地球大合唱」CD）
  • 1988年
    • 難得糊塗（電視劇「贏丹傳奇」主題曲）
  • 1989年
    • 夜香港（電影「奇蹟」的插曲，收錄喺「醉人情懷」CD）
    • 月亮代表我的心（電影「伴我闖天涯」主題曲）
    • 纏綿千遍（同成龍合唱，收錄喺「成龍」CD）
    • 為自由（演藝界支持北京民運大行動主題曲，群星合唱，包括梅艷芳、盧冠廷、肥媽、鍾鎮濤、劉德華、張學友、黎明、林子祥、杜麗莎、譚詠麟）
  • 1990年
    • 情濃若真（無綫明珠台「情濃七日」主題曲）
    • 他鄉寂寞人（同譚耀文合唱，收錄喺譚耀文「夜深情真」CD）
    • 你是罪（譚耀文主唱/梅艷芳獨白，收錄喺譚耀文「夜深情真」CD）
    • 凝聚每分光（香港電台「香港心連心」計劃主題曲，收錄喺「香港心連心」CD）
  • 1991年
    • 滔滔千里心（梅艷芳、譚詠麟、徐小鳳、劉德華、羅文、鍾鎮濤、張學友、黎明、葉蒨文、李克勤、草蜢、盧冠廷、陳奕迅等人合唱，收錄喺「華東賬災同盟」主題曲）
    • 來醉吧（電影「何日君再來」插曲）
    • 親密愛人（廣東版）
  • 1993年
    • 新仙鶴神針（電影「新仙鶴神針」主題曲）
    • 他不是我（「演藝界反翻版大聯盟」主題曲）
  • 1994年
    • 一股歪風（無綫電視卡通片集「電子神童」插曲，收錄於「兒歌精選」CD）
  • 1995年
    • 心經（唐三藏法師玄奘譯，收錄喺「心經」CD，梅艷芳、譚詠麟、劉德華、張學友、葉蒨文、王菲、關淑怡等人合唱，另收陳奕迅、李克勤、梁朝偉等人獨唱版本）
  • 1996年
    • 我們都哭了（收錄喺「我們不哭了」CD）
    • 不枉此生（收錄喺「最好的華星壓軸精選」CD）
    • 訂造一個天堂（國，梅艷芳、車婉婉、李克勤、劉德華等人合唱）
  • 1997年
    • 別說愛情苦（國，同劉德華合唱，收錄喺劉德華「愛在刻骨銘心時」CD）
    • 我愛風光好（同倫永亮合唱，收錄喺「成雙成對+我有我精彩」CD）
  • 1998年
    • IQ博士（無綫電視卡通片集「IQ博士」主題曲，收錄喺「巨星兒歌」CD）
    • 情比雨絲（收錄喺「和興白花油顧嘉輝黃霑真友情演唱會」VCD）
  • 1999年
    • 小天使（電視卡通片「愛心第一旅」主題曲，收錄喺「心愛兒歌」CD）
    • 床前明月光（1999 A. D. Remix，收錄喺「雷霆班霸」CD）
    • 這城市有愛（國，群星合唱，收錄喺「香港電台千禧活動」主題曲）
    • 千禧盛世（盛世版，香港電台千禧活動主題曲，梅艷芳、張國榮、成龍、李克勤、陳奕迅、劉德華、郭富城、譚詠麟、張學友、黎明、許志安、鄭秀文等人合唱）
  • 2000年
    • 123木頭人（BMG群星合唱，收錄喺「BMG全家福」CD）
    • 月光的搖籃曲（電影「妖怪傳」主題曲）
  • 2001年
    • 等（電影「男歌女唱」主題曲）
    • 彈彈琴跳跳舞（電影「愛君如夢」插曲，收錄喺「愛君如夢」原聲大碟CD）
    • 兩仔爺（電影「愛君如夢」插曲，同鄭中基/林家棟/鍾依澄/應采兒/林子聰/吳君如/劉德華合唱，收錄喺「愛君如夢」原聲大碟 CD）
  • 2002年
    • 女人之苦（同許志安合唱，收錄喺許志安「On Hits」CD）
  • 2003年
    • 雄心飛揚（國，抗非典炎活動主題曲，梅艷芳、譚詠麟、劉德華、張學友、陳奕迅、李克勤、黎明等人合唱）

電視劇

電影

參閱

參考

出面網頁

維基同享有多媒體嘅嘢：
Anita Mui
由「https://www.search.com.vn/wiki/?lang=zh-yue&title=梅艷芳&oldid=2020015」收
🔥 Top keywords: 謝雅兒頭版田井虹Special:搜索華南虎Special:最近修改陳蒨葶各國兵力一覽連勝文國家面積一覽廣東話粗口大明皇帝一覽無綫新聞部主要人員名單香港數學符號趙柏基香港奧林匹克運動會獎牌得主一覽香港賽馬會六合彩瑪麗安東妮歐洲聯賽冠軍盃填詞L九肚魚美帝崩裂淡季報錯團亞氏保加症2王菲顏清標熊貓安士1林鈺洧譚旻萱鍾雪瑩徐有潔冒號最低合法性交年齡許凱