ციყვი (ლათ. Sciurus) — ძუძუმწოვარ ცხოველთა გვარი ციყვისებრთა ოჯახისა. მათი სხეულის სიგრძეა 20-32 სმ, წონა — 180-1000 გ. აქვთ ხშირი, რბილი (ზოგიერთს) ბეწვი. საკუთარი გვარის — Sciurus-ის გარდა, ციყვებს უწოდებენ აგრეთვე ციყვისებრთა ოჯახის მთელ რიგ წარმომადგენლებს წითელი ციყვების, პალმის ციყვების და სხვა მრავალი გვარიდან. რაც შეეხება საკუთარ გვარს — Sciurus-ს, იგი აერთიანებს 29 სახეობას, რომლებიც გავრცელებულია ევროპაში, ჩრდილოეთ ამერიკაში, სამხრეთ ამერიკასა და აზიის ზომიერ სარტყელში, ძირითადად ტყეებში.[1] საქართველოში აკლიმატიზებულია ჩვეულებრივი ციყვის (ლათ. Sciurus vulgaris) ორი ქვესახეობა: ალთაური ციყვი (ლათ. Sciurus vulgaris altaicus) და ტელეუტური ციყვი (ლათ. Sciurus vulgaris exalbidus). ამიერკავკასიური ციყვი (ლათ. Sciurus anomalus) საქართველოში გავრცელებულია ყველგან.
ლიტერატურა
სქოლიო