Gajah asia
Gajah asia[1] | |
---|---|
Bong Su, seekor gajah asia jantan di Kebun Binatang Melbourne | |
Conservation status | |
Klasifikasi ilmiah | |
Kingdom: | Animalia |
Phylum: | Chordata |
Class: | Mammalia |
Order: | Proboscidea |
Family: | Elephantidae |
Genus: | Elephas |
Species: | E. maximus |
Namo binomial | |
Elephas maximus Linnaeus, 1758 | |
Penyebaran gajah Asia (cokelat — daerah asal, hitam — asal belum jelas) |
Gajah asia (Elephas maximus), kadang disabuik juo jo namo salah satu subspesiesnyo, gajah india, adolah satu dari tigo spesies gajah nan masih hiduik, dan marupoan satu-satunyo spesies gajah dari genus Elephas nan masih hiduik pado maso kiniko. Hewan iko adolah hewan darat nan paliang gadang di Asia.[3] Gajah Asia adolah spesies tarancam karano habitatnyo nan taruih bakurang sarato dek paburuan lia,[4] populasi gajah asia ko di alam lia tasiso labiah kurang antaro 41,410 sampai 52,345.[2] Gajah asia cenderung baumua panjang, sarato umua gajah ko nan paliang lamo nan dikatahui mancapai 86 tahun.
Hewan iko banyak didomestikasi sarato diapagunoan atau diparuntuakan dalam ranah kahutanan di Asia Selatan jo Tenggara salamo barabaik-abaik dan digunoan pulo untuak tujuan seremonial. Sumber-sumber sijarah mangindikasikan bahwasanyo hewan iko kadang digunoan salamo musim panen dalam kagiatan panggiliangan. Gajah lia dapek dimanfaaikan untuak manarik wisatawan, namun hewan iko dapek pulo marusak panen, sarato dapek mamasuki pakampuangan warga untuak marusak pakabunan warga.[5]
Panyebaran jo habitat
Gajah asia manghuni kawasan padang rumpuik, hutan hijau tropis, hutan semi-hijau, hutan gugur lambok, hutan gugur kariang jo hutan baduri kariang. Salain itu mereka dapek pulo biaso hiduik di hutan tanaman, hutan sekunder jo samak balukar. Babarapo dari tipe habitat gajah iko dapek mancapai katinggian 3,000 m (9,800 ft) di ateh pamukaan lauik.
Ado tigo subspesies gajah asia nan tanamo:[2][3]
- Gajah sri lanka nan dapek ditamui di daerah di Sri Lanka;
- Gajah india nan dapek ditamui di daratan Asia: India, Nepal, Bangladesh, Bhutan, Myanmar, Thailand, Semenanjung Malaya, Vietnam, Kamboja, Laos, jo Tiongkok;
- Gajah sumatera nan dapek ditamui di Sumatra jo Kalimantan.
Di Tiongkok, gajah asia hanyo dapek ditamui di prefektur Xishuangbanna, Simao, jo Lincang di selatan Yunnan. Di Bangladesh, hanyo dapek ditamui di sabagian populasi gajah nan tampeknyo tapancia di Bukit Chittagong.[6]
Ekologi jo parilaku
Gajah marupoan hewan krepuskular.[3] Mereka dikalompokan sabagai megafauna dan mangkonsumsi sakitar 150 kg (330 lb) pakan tanaman pa harinyo.[7] Mereka adolah pamakan sagalo tumbuahan; pamakan rumpuik (grazer) tamasuak juo pamakan batang kayu atau batang pisang (browser) sakaligus. Tacatat 112 spesies tanaman nan babeda manjadi santapan hewan iko. Kabanyakan tumbuahan dari bangsa Malvales, suku polong-polongan, pinang-pinangan, teki-tekian jo padi-padian.[8] Mereka mamakan pohon (browsing) labiah banyak pado musim kamarau, nan mano kulik pohon atau batang kayu lah nan manjadi porsi utamonyo.[9] Mereka minum satidaknyo sakali sahari dan indak pernah tingga jauah dari sumber aia murni.[3] Mereka mambutuahan sakitar 80 hinggo 200 liter aia dalam sa hari.
Anak gajah biasonyo bagabuang dalam kawanan gajah batina nan dewasa. Namun gajah jantan akan mamisahkan mereka katiko sang anak mancapai maso remaja.[10]
Gajah mampu mangatahui suaro dengan amplitudo nan randah.[11] Mereka manggunoan infrasonik untuak bakomunikasi satu samo lainnyo; hal iko partamo kali dikatahui dan dicatat dek naturalis asal India, Madhaviah Krishnan, nan kamudian dipalajari labiah lanjuik lai dek Katharine Payne.[12]
Pamangsoan harimau tahadok gajah Asia jarang tajadi dan hanyo tabateh sajo pado anak gajah nan masih ketek.[13]
Caliak pulo
- Gajah kalimantan
- Gajah afrika
Rujuakan
Pautan lua
Wikimedia Commons mampunyoi media nan bahubuangan jo Elephas maximus |
Wikispecies mempunyai informasi mengenai |
- (Inggirih) Elephant Nature Foundation
- (Inggirih) Asian Elephants at the Zoological Gardens of the World
- (Inggirih) WWF - Asian elephant species profile
- (Inggirih) National Zoo Facts on Asian Elephant and a Webcam of the Asian Elephant exhibit
- (Inggirih) The Chaffee Zoo Asian Elephant Fact Sheet Archived 2006-02-23 di Wayback Machine.
- (Inggirih) U.S. Fish & Wildlife Species Profile
- (Inggirih) For information on Asian Elephants in Laos
- (Inggirih) EIA 25 yrs investigating the ivory trade, reports etc
- (Inggirih) EIA (in the USA) reports etc
- (Inggirih) Web page that includes a description of the deteriorating plight of elephants with links to organizations dedicated to helping them