അലക്സാണ്ടർ ദ്വീപസമൂഹം

1741-ൽ ഈ ദ്വീപസമൂഹം സന്ദർശിച്ച ആദ്യത്തെ യൂറോപ്യൻ വംശജനായ റഷ്യൻ നാവികൻ അലക്‌സി ചിരിക്കോവ് നോയെസ്, ബേക്കർ ദ്വീപുകൾ (പ്രിൻസ് ഓഫ് വെയിൽസ് ദ്വീപിൻറെ പടിഞ്ഞാറൻ തീരത്തുനിന്നകലെ), ബാരനോഫ്, ചിക്കാഗോഫ്, ക്രൂസോഫ്, യാക്കോബി ദ്വീപുകളുടെ തീരങ്ങൾ ദർശിച്ചു.^[1] 1774-ൽ ജുവാൻ ജോസ് പെരെസ് ഹെർണാണ്ടസ് ഡാൾ ദ്വീപിൻ്റെ തെക്കൻ തീരം കാണുകയും,^[2] തൊട്ടടുത്ത വർഷം ജുവാൻ ഫ്രാൻസിസ്കോ ഡി ലാ ബോഡേഗ വൈ ക്വാഡ്ര പ്രിൻസ് ഓഫ് വെയിൽസ് ദ്വീപിലെ ബുക്കാറേലി ഉൾക്കടലിൽ പ്രവേശിക്കുകയുംചെയ്തു.^[3] 1792-ൽ ജാസിൻറോ കാമനോ റിവില്ലഗിഗെഡോ ദ്വീപും ഗ്രാവിന ദ്വീപുകളും ദർശിക്കുകയും  ക്ലാരൻസ് കടലിടുക്ക് കണ്ടെത്തുകയും ചെയ്തു.^[4] ജോർജ്ജ് വാൻകൂവറും അദ്ദേഹത്തിൻറെ ആളുകളും 1793-ലും 1794-ലും ദ്വീപസമൂഹത്തിൽ വിപുലമായ ഒരു സർവേ നടത്തിക്കൊണ്ട്, റെവില്ലഗിഗെഡോയും അഡ്മിറൽറ്റി ദ്വീപുകളും ചുറ്റിക്കറങ്ങുകയും, കുയൂ ദ്വീപ്, ബാരനോഫ്, ചിക്കാഗോഫ് ദ്വീപുകളുടെ കിഴക്ക് വശങ്ങൾ, എറ്റോലിൻ, റാങ്കെൽ, സറെംബോ, മിറ്റ്കോഫ്, കുപ്രിയാനോഫ് ദ്വീപുകൾ എന്നിവയുടെയെല്ലാം വിശദ വിവരങ്ങൾ പ്രമാണത്തിൽ രേഖപ്പെടുത്തുകയും ചെയ്തു.^[5] ഒരു ദശാബ്ദത്തിനുള്ളിൽ റഷ്യക്കാർ ചിക്കാഗോഫിനെയും ബാരനോഫ് ദ്വീപുകളെയും വേർതിരിക്കുന്ന പെറിൽ കടലിടുക്ക് കടക്കുകയും തുടർന്നുള്ള ദശകങ്ങളിൽ മറ്റ് പ്രധാന ദ്വീപുകളെ വേർതിരിക്കുന്ന കടലിടുക്കുകളും പാതകളും കണ്ടെത്തുകയും ചെയ്തു. 1844-ലെ ഒരു റഷ്യൻ ചാർട്ടിൽ കുപ്രിയാനോഫ് ദ്വീപ്, മിറ്റ്കോഫ്, എറ്റോലിൻ, റാങ്കൽ, വോറോങ്കോഫ്സ്കി ദ്വീപുകളിൽ നിന്നു വേർപെട്ടും സരെംബോ ദ്വീപുകൾ പരസ്പരം വേർപെട്ടും കിടക്കുന്നതായും കാണിക്കുന്നു.

പത്തൊൻപതാം നൂറ്റാണ്ടിൻ്റെ പ്രാരംഭത്തിൽ ഈ ദ്വീപസമൂഹം മാരിടൈം രോമ വ്യാപാരത്തിൻ്റെ ഒരു കേന്ദ്രമായി അറിയപ്പെട്ടിരുന്നു. 1867-ൽ അലാസ്ക പർച്ചേസിലൂടെ ദ്വീപുകളുടെ നിയന്ത്രണം റഷ്യയിൽ നിന്ന് അമേരിക്കൻ ഐക്യനാടുകളുടെ നിയന്ത്രണത്തിലേയ്ക്ക് എത്തി. ഡൊണാൾഡ് ഓർത്തിൻ്റെ അലാസ്ക സ്ഥലനാമ നിഘണ്ടു (പേജ് 64) അനുസരിച്ച്, 1867-ൽ യു.എസ്. കോസ്റ്റ് ആൻഡ് ജിയോഡെറ്റിക് സർവേയിൽ നിന്നാണ് അലക്സാണ്ടർ ദ്വീപസമൂഹത്തിന് അതിൻ്റെ പേര് ലഭിച്ചത്. റഷ്യയിലെ സാർ അലക്സാണ്ടർ II ൻ്റെ പേരാണ് ഈ ദ്വീപ് ശൃംഖലയ്ക്ക് നൽകിയിരിക്കുന്നത്.^[6] 1860-ലെ റഷ്യൻ അമേരിക്കയുടെ (അലാസ്ക) ഭൂപടത്തിൽ, ദ്വീപസമൂഹത്തെ കിംഗ് ജോർജ്ജ് മൂന്നാമൻ ദ്വീപസമൂഹം എന്ന് വിളിക്കുന്നു.