കമ്പ്യൂട്ടേഷണൽ ലിംഗ്വിസ്റ്റിക്സ്

മാനവികഭാഷകളെ കമ്പ്യൂട്ടറിനു മനസ്സിലാക്കുന്നതിനുതകുന്ന സാങ്കേതികതകൾ നിർമ്മിക്കുന്ന ഒരു ശാസ്ത്രശാഖയാണ് കമ്പ്യൂട്ടേഷണൽ ലിംഗ്വിസ്റ്റിക്സ്. മനുഷ്യഭാഷയെയും, അതിന്റെ ഘടനാപരമായ പ്രത്യേകതകളെയും മനസ്സിലാക്കി, അതിനു സമാനമായ കമ്പ്യൂട്ടർ മോഡലുകൾ ഉണ്ടാക്കുകയാണ് ഇതിൽ ചെയ്യുന്നത്. യന്ത്രം, മനുഷ്യന്റെ സുഹൃത്തും വഴികാട്ടിയും ആയിരിക്കണം എന്ന ചിന്താഗതിയനുസരിച്ച് ഒരു യന്ത്രം രൂപകൽപ്പന ചെയ്യുമ്പോൾ അതിനു മനുഷ്യന്റെ ഭാഷയും മനസ്സില്ലാക്കാൻ കഴിയണം. ഇവിടെയാണ് കമ്പ്യൂട്ടേഷണൽ ലിംഗ്വിസ്റ്റിക്സിന്റെ പ്രസക്തി.

കമ്പ്യൂട്ടറുകളിലുള്ള സ്പെല്ലിങ് ചെക്കെർ, ഗ്രാമ്മർ ചെക്കെർ തുടങ്ങിയവ ഇതിന്റെ ചെറിയ പ്രയോഗങ്ങളാണ്. ആപ്പിൾ സിരി, വോയിസ്‌ സെർച്ച്‌ തുടങ്ങിയ പുത്തൻ സങ്കേതികവിദ്യകളും ഇതിൽ ഉൾപ്പെടുന്നു. കമ്പ്യൂട്ടർ സയൻസിലുള്ള അറിവും, ഭാഷാജ്ഞാനവും ഒരു പോലെ ആവശ്യമുള്ള ഈ പഠനശാഖക്ക് ലോകത്താകമാനം ധാരാളം ഗവേഷണാവസരങ്ങളുണ്ട്.