കിം കാട്രൽ
കിം വിക്ടോറിയ കാട്രൽ (/kəˈtræl/; ജനനം 21 ഓഗസ്റ്റ് 1956) ഒരു ബ്രിട്ടീഷ്-കനേഡിയൻ അഭിനേത്രിയാണ്. എച്ച്.ബി.ഒ.യുടെ സെക്സ് ആൻഡ് ദി സിറ്റി (1998-2004) എന്ന ടെലിവിഷൻ പരമ്പരയിലെ സാമന്ത ജോൺസ് എന്ന കഥാപാത്രത്തിലൂടെ കൂടുതൽ അറിയപ്പെടുന്നത അവർ, ഇതിലെ വേഷത്തിന് അഞ്ച് എമ്മി അവാർഡ് നാമനിർദ്ദേശങ്ങളും നാല് ഗോൾഡൻ ഗ്ലോബ് പുരസ്കാര നാമനിർദ്ദേശങ്ങളും 2002 ലെ മികച്ച സഹനടിക്കുള്ള ഗോൾഡൻ ഗ്ലോബ് പുരസ്കാരവും നേടി. സെക്സ് ആൻഡ് ദി സിറ്റി (2008), സെക്സ് ആൻഡ് ദി സിറ്റി 2 (2010) എന്നീ ചിത്രങ്ങളിൽ അവൾ തന്റെ വേഷം ആവർത്തിച്ച് അഭിനയിച്ചു.
ആദ്യകാലം
ലിവർപൂളിലെ[1] മോസ്ലി ഹിൽ ജില്ലയിൽ 1956 ഓഗസ്റ്റ് 21 ന്[2] സെക്രട്ടറി ഗ്ലാഡിസ് ഷെയ്നിന്റെയും (മുമ്പ്, ബാഗ്ഗ്) കൺസ്ട്രക്ഷൻ എഞ്ചിനീയറായിരുന്ന ഡെന്നിസ് കാട്രലിന്റെയും മകളായി കിം വിക്ടോറിയ കാട്രൽ ജനിച്ചു.[3] അവർക്ക് ക്രിസ്റ്റഫർ എന്നൊരു സഹോദരനുണ്ടായിരുന്നു (മരണം 2018).[4][5] കിമ്മിന് മൂന്ന് മാസം പ്രായമുള്ളപ്പോൾ, കുടുംബം കാനഡയിലേക്ക് കുടിയേറുകയും ബ്രിട്ടീഷ് കൊളംബിയയിലെ കോർട്ടനയിൽ സ്ഥിരതാമസമാക്കുകയും ചെയ്തു. 11 വയസ്സുള്ളപ്പോൾ, മുത്തശ്ശിക്ക് അസുഖം ബാധിച്ചതോടെ അവൾ ലിവർപൂളിലേക്ക് മടങ്ങിപ്പോയി. ലണ്ടൻ അക്കാദമി ഓഫ് മ്യൂസിക് ആൻഡ് ഡ്രമാറ്റിക് ആർട്ടിൽ[6] അഭിനയകലയിൽ പരീക്ഷയെഴുതിയ അവർ ഒരു വർഷത്തിനുശേഷം കാനഡയിലേക്ക് മടങ്ങിപ്പോകുകയും 16-ാം വയസ്സിൽ ആദ്യ വേഷത്തിനായി ന്യൂയോർക്ക് നഗരത്തിലേയ്ക്ക് മാറുകയും ചെയ്തു.