Delaware

Delaware hett ruch weg 850.000 Inwahners up een Flach von 6.452 km². Dor sünd 1.387 km² vun Water. Delaware grenzt in'n Norden an Pennsylvania. De Oostgrenz na New Jersey hen billt de Delaware River un de Atlantik. In'n Süden un Westen liggt de Bundsstaat Maryland. De gröttste Stadt vun Delaware is Wilmington, de Hööftstadt is Dover. En vun de gröttsten Basen vun de US- Luftmacht liggt dicht bi Dover.

In Delaware gifft dat över dat ganze Johr hen en matig un fochtig Klima mit Temperaturen twuschen 0 un 24 °C. De Atlantik warrt duchtig up dat Klima in. In'n Dörsnitt schient an 208 Dage in't Johr de Sunne. De Johrstieden sünd düütlich vun'nanner afgrenzt. In'n Summer kann dat bit to 32 °C warm weern, in'n Winter fallt towielen Snee un dat kann freren bit to -5 °C hen.

In Delaware leevt 853.476 Inwahners (Stand: U.S. Census 2006), dormank 72,1 % Witte, 20,7 % Swarte un Afroamerikaners, 6,3 % Hispanics, 2,9 % Asiaten un 0,3 % Indianers.^[1]

Inwahners na Öller un Geslecht

Mit dat Öller vun de Inwahners vun Delaware sütt dat so ut:

• bit 18 Johre: 203.736 (23,9 %)
• 18 - 64 Johre: 535.186 (62,7 %)
• vun 65 Johre af an: 114.554 (13,4 %)

In'n Dörsnitt sünd de Inwahners vun Delaware 37,5 Johre oold.48,5 % vun de Inwahners sünd Mannslüde un 51,5 % Froenslüde.

Indianers

Dat Indianervolk, wat oorsprünglich in dat hüdige Delaware tohuse weer, sünd de Lenni Lenape. De Europäers hefft to düssen Stamm Delawaren seggt. As de USA tostanne kamen sünd, hefft se veel to seggen harrt. Later sünd se ut verschedene Grünn över Indiana in anner US-Bundsstaten un na Kanada hen utwannert. Hüdigendags leevt de meisten Delawaren in Kansas un Oklahoma, man in Delaware gifft dat ok noch en Grupp.

Wie sik de Inwahnertall vun Delaware entwickelt hett