Gö’nstörp
Wapen/Flagg | Koort | |
---|---|---|
Basisdaten | ||
Inwahners: | ||
Postleettall: | 21376 | |
Vörwahl: | 04172 | |
Geograafsche Laag: | 53° 14′ N, 10° 8′ O | |
Gö’nstörp (hoochdüütsch Gödenstorf) is en Dörp in de Gemeen Gö’nstörp (Samtgemeen Solzhusen) in’n Landkreis Horborg, Neddersassen.
Geografie
Dat Dörp liggt in de Lümbörger Heid. Dör dat Dörp flütt de Oosterbeek, de denn in’n Noordbeek münnt.
De Naveröörd sünd Gastää in’n Noordoosten, Oilstörp un Solzhusen in’n Oosten, Eyndörp in’n Süüdoosten, Lübberstää un Äästörp in’n Süüdwesten un Garlstörp un Toppenstää in’n Westen.
Historie
Gö’nstörp kummt an’n 22. Oktober 1289 as Godingstorpe toeerst in de Oorkunnen vör.
In’n Eersten Weltkrieg sünd söss Soldaten ut Gö’nstörp fullen oder vermisst un in’n Tweten Weltkrieg 27.[1]
Verwaltungsgeschicht
In de Franzosentied von 1810 bet 1814 hett de Oort to de Mairie Garlstörp in’n Kanton Garlstörp höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1885 to de Amtsvaagdie Garlstörp in dat Amt Winsen tohöört. Blots in de Johren 1852 bet 1859 hett de Oort för en Tied to dat Amt Solzhusen höört. Na 1885 weer dat in’n Kreis Winsen un 1932 is dat Deel von’n Kreis Horborg worrn.
1928 is Oilstörp Deel von de Gemeen Gö’nstörp worrn. Dat hett sik to’n 1. Oktober 1951 ännert, as Oilstörp wedder egenstännig worrn is.[2][3]
De Oort hett an’n 1. Juli 1972 mit de Gemeenreform in Neddersassen tohoop mit de Gemeen Lübberstää de nu gröttere Gemeen Gö’nstörp billt.
Inwahnertall
Dörp Gö’nstörp:
Johr | Inwahners |
---|---|
[4] | 179113 Füürsteden |
[5] | 1812159 |
[6] | 182415 Füürsteden |
[7] | 1848195 Lüüd, 22 Hüüs |
[8] | 1. Dezember 1871252 Lüüd, 30 Hüüs |
[9] | 1. Dezember 1885240 Lüüd, 33 Hüüs |
[10] | 1. Dezember 1905267 Lüüd, 42 Hüüs |
[11] | 1. Dezember 1910298 |
[12] | 1925287 |
[3] | 1. Oktober 1951529 |
Gemeen tohoop mit Oilstörp:
Johr | Inwahners |
---|---|
[12] | 1933497 |
[12] | 1939549 |
[3] | 30. September 1951943 |
Religion
Gö’nstörp is evangeelsch-luthersch präägt un höört to dat Kaspel von de Johannis-Kark in Solzhusen.
För de Kathoolschen is de St.-Maria-Kark in Äästörp tostännig, de siet 1. November 2014 to de Karkengemeen St. Petrus in Bookholt tohöört.
Kultur
In Gö’nstörp steiht en Denkmaal för de Fullenen ut de twee Weltkrieg’.
Verenen
De Schüttenvereen Garlstörp-Gö’nstörp is 1909 grünnt worrn un de FC Hoge Heid 1975.
Brüük
In Gö’nstörp warrt Faslam fiert.
Weertschop un Infrastruktur
1921 is in Gö’nstörp en freewillige Füürwehr grünnt worrn, de sik 1934 mit de Füürwehr Oilstörp tophoopdaan hett.
Stroom un Telefoon hett de Oort 1908 kregen.[2] Dat eerste Waternett mit en hydraulischen Widder is 1912 dör en Genossenschaft anleggt worrn.[13]
Verkehr
Dör Gö’nstörp löppt de Landsstraat 216, de in’n Westen över Garlstörp na Niendörp geiht un in’n Oosten över Oilstörp, Solzhusen, Westergellsen, Karkgellsen un Reppenstää na Lümborg. In’n Süüdwesten geiht de Kreisstraat 75 na Lübberstää un dor an de K 5. Von Garlstörp ut geiht de L 212 in’n Noordoosten na Toppenstää un Wulfsen un in’n Süüdwesten na Äästörp un Ebendörp. Von Solzhusen ut geiht de L 234 in’n Noorden na Gastää un Winsen un in’n Süüdoosten na Puunsen un Amelkusen.
De nächste Autobahn is de Autobahn 7 (Afsnidd Hamborg–Hannover). De Opfohrt 40 Garlstörp liggt so veer Kilometer in’n Noordwesten von Gö’nstörp an de L 216.
De nächste Bahnhoff is so bi 18 Kilometer wied weg in’n Noordoosten de Bahnhoff Winsen an de Bahnlien Hamborg–Hannover. Von 1906 bet 1970 hett dat ok Personenverkehr op de Bahnlien Winsen–Hützel geven, an de dat Dörp en egen Bahnhoff harr (Bahnhoff Gö’nstörp-Oilstörp). De Bahnhoff warrt vondaag blots noch för den Göderverkehr bruukt.
Lüüd
De Politiker Otto Gellersen is 1925 in Gö’nstörp boren.