Oilstörp
Wapen/Flagg | Koort | |
---|---|---|
Basisdaten | ||
Flach: | 6,56 km² | |
Inwahners: | 540 ( | 30. Juni 2013)|
Inwahnerdicht: | 82,3 Inwahners pro km² | |
Postleettall: | 21376 | |
Vörwahl: | 04172 | |
Geograafsche Laag: | 53° 14′ N, 10° 9′ O | |
Oilstörp (hoochdüütsch Oelstorf) is en Dörp in de Gemeen Solzhusen (Samtgemeen Solzhusen) in’n Landkreis Horborg mit 540 Inwahners (Stand 2013) op en Rebeet vun 656 Hektar.
Geografie
Oilstörp liggt an de Noordkant vun de Lümbörger Heid. Dat Water ut Oilstörp flütt över den Oosterbeek na’n Noordbeek hen af un von dor in de Luh.
Naveröörd sünd in’n Oosten Solzhusen, na Süden Eyendörp, in’n Süüdwesten Lübberstää un na’n Westen to Gö’nstörp un Garlstörp. Na Noorden kummt eerstmal gornich veel, meist blot Feller un Woold un denn Toppenstää un Gastää.
Historie
Verwaltungsgeschicht
In de Franzosentied von 1810 bet 1814 hett de Oort to de Mairie Garlstörp in’n Kanton Garlstörp höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1885 to de Amtsvaagdie Garlstörp in dat Amt Winsen tohöört. Blots in de Johren 1852 bet 1859 hett de Oort för en Tied to dat Amt Solzhusen höört. Na 1885 weer dat in’n Kreis Winsen un 1932 is dat Deel von’n Kreis Horborg worrn.
Oilstörp weer bet 1928 en sülvstännige Gemeen, un hett sik denn mit Gö’nstörp tohoopslaten.[1] Dat hett sik to’n 1. Oktober 1951 ännert, as Oilstörp wedder egenstännig worrn is.[2] An’n 1. Juli 1972 keem Oilstörp mit de Gemeenreform in Neddersassen to de Gemeen Solzhusen.
Inwahnertall
Johr | Inwahners |
---|---|
[3] | 179310 Füürsteden |
[4] | 181294 |
[5] | 182411 Füürsteden |
[6] | 1848103 Lüüd, 13 Hüüs |
[7] | 1. Dezember 1871137 Lüüd, 15 Hüüs |
[8] | 1. Dezember 1885125 Lüüd, 17 Hüüs |
[9] | 1. Dezember 1905158 Lüüd, 23 Hüüs |
[10] | 1. Dezember 1910186 |
[2] | 1. Oktober 1951414 |
1976 | 310 |
1999 | 333 |
2002 | 494 |
2006 | 565 |
Religion
Oilstörp is evangeelsch-luthersch präägt un höört to dat Kaspel von de Johannis-Kark in Solzhusen.
För de Kathoolschen is de St.-Maria-Kark in Äästörp tostännig, de siet 1. November 2014 to de Karkengemeen St. Petrus in Bookholt tohöört.
Kultur
Verenen
In Oilstörp doot se in’n Faslomclub Faslom fiern, tohoop mit de Lüüd ut Gö’nstörp un Lübberstää.
Weertschop un Infrastruktur
Oilstörp hett en freewillige Füürwehr tohoop mit Gö’nstörp. Grünnt hebbt se de Füürwehr 1921 in Gö’nstörp, de Oilstörper kemen 1934 dorto. Vördem harr Oilstörp en Plichtfüürwehr.
Verkehr
Dör Oilstörp löppt de Landsstraat 216, de in’n Westen över Gö’nstörp un Garlstörp na Niendörp geiht un in’n Oosten över Solzhusen, Westergellsen, Karkgellsen un Reppenstää na Lümborg. Von Garlstörp ut geiht de L 212 in’n Noordoosten na Toppenstää un Wulfsen un in’n Süüdwesten na Äästörp un Ebendörp. Von Solzhusen ut geiht de L 234 in’n Noorden na Gastää un Winsen un in’n Süüdoosten na Puunsen un Amelkusen.
De nächste Autobahn is de Autobahn 7 (Afsnidd Hamborg–Hannover). De Opfohrt 40 Garlstörp liggt so fiev Kilometer in’n Noordwesten von Oilstörp an de L 216.
De nächste Bahnhoff is so bi 18 Kilometer wied weg in’n Noordoosten de Bahnhoff Winsen an de Bahnlien Hamborg–Hannover. Von 1906 bet 1970 hett dat ok Personenverkehr op de Bahnlien Winsen–Hützel geven, an de de Bahnhoff Gö’nstörp-Oilstörp leeg. De Bahnhoff warrt vondaag blots noch för den Göderverkehr bruukt.
Siet September 2007 hett Oilstörp ok Oortsschiller, de den plattdüütschen Naam blangen dat hoochdüütsche Oelstorf wiesen doot. Oilstörp weer dat eerste Dörp in’n Kreis mit Oortsschiller in twee Spraken.
Literatur
- Friedrich Wilhelm Reineke: Salzhausen – Luhmühlen · Oelstorf · Putensen – Heimat am Rande der Heide. Solzhusen 1990