Gary Oldman

Oldman is de Söhn vun en Schweißer un en Huusfro. Optogen weer he vun sien Mudder un sien beiden Süstern, vun wegen dat sien Vadder vun wegen siene Alkoholkrankheit tomeist nich togegen weer. Invt Öller vun sössteihn Johren is he vun de School afgahn, hett aver in de Tiet blangen sien Arbeit in en Sportfackladen veel Literatur leest un sik sülvst dat Klavierspelen bibröcht.

Över den Schauspeelschoolmeester Roger Williams is he an’t Theater kamen. He hett em sülvst den eersten Theater-Ünnerricht geven. Mit en Stipendium künn he dat Rose Bruford Drama College besöken. In’t Johr 1979 hett he an’t Royal Court Theatre in London sien Loopbahn as Theaterschauspeler anfungen. 1985 is he för The Pope’s Wedding mit den Fringe Award as besten Nawassschauspeler un mit den Drama Magazine Award as besten Schauspeler uttekent worrn.

In de 1980er Johren hett he bi de BBC ok eerste Insichten vör de Kamera wunnen. Toeerst hett he in teemlich unbekannte Filmen mitspeelt un is denn wedder an’t Theater wesselt, bit he 1986 mit Sid and Nancy sien eersten Kinofilm harr, de över Sid Vicious, den Bassisten vun de Sex Pistols güng. De authentische Intrepretatschoon vun sien Rull is vun de Kritik loovt worrn. Sien nächsten grötteren Kino-Spood harr he 1991 mit den Polit-Thriller JFK, in den he Lee Harvey Oswald spelen de, de John F. Kennedy ümbrocht hebben schall. Siet de Tiet hett he dat Image vun den Bösen, den he dorna in vele annere Filmen wedder speelt hett. In de Verfilmen vun de Harry-Potter-Reeg hett Oldman de Rull Sirius Black speelt, wat för em mol en Rull vun de Goden weer. Toletzt weer he in de Batman-Filmen Batman Begins un The Dark Knight vun den Speelbaas Christopher Nolan to sehn.

Oldman is dorför bekannt, dat he sien Rullen mit ünnerscheedliche Akzenten utboet. In Interviews un buten de Filmen snackt he mit’n Cockney-Dialekt, mit den he opwossen is. Gary Oldman weer Enn vun de 1980er Johren mit Lesley Manville verheiraat un hett en Söhn mit ehr. Vun 1990 bit 1992 harr he en Eh mit Uma Thurman un bi de Dreiharbeiten to Immortal Beloved, in den he de Komponisten Ludwig van Beethoven speelt hett, hett he mit de Schauspelersche Isabella Rossellini anbannelt, mit de he sik 1994 verlöövt hett. Man, twee JOhren later sünd se wedder uteneen gahn.^[1] Vun 1997 bit 2001 weer he tosamen mit de US-amerikaanschen Fotograafsche Donya Fiorentino, mit de he twee Söhnen hett. Vun 2002 bit 2005 leev he tohopen mit de Schauspelersche Ailsa Marshall.^[2] An’n 31. Dezember 2008 hett Oldman de Singersche Alexandra Edenborough heiraat.^[3] Oldman weer tietwies wegen Alkoholproblemen in en Afwennklinik.

För siene Filmarbeiten is Oldman wiet över hunnert mol för Priesen un Utteken vörslahn wesen. Uttekent worrn is Oldmann bit hüüt mit meist 60 Priesen, so as:

• 1987: mit den Evening Standard British Film Award in de Kategorie Best Needorsteller för Sid and Nancy
• 1988: mit den ALFS Award in de Kategorie Dorsteller vun’t Johr för Prick Up Your Ears
• 1993: mit den Saturn-Pries in de Kategorie Best Schauspeler för Bram Stoker’s Dracula
• 1998: mit den BAFTA Film Award in de Kategorie Best Originaldreihbook för Nil by Mouth
• 1998: mit den Alexander Korda Award för den Besten britischen Film för Nil by Mouth
• 1998: mit den Empire Award in de Kategorie Best Debut för Nil by Mouth
• 2001: mit den Alan J. Pakula Award för The Contender
• 2001: mit den Master Screen Artist Tribute
• 2009: mit den People’s Choice Award in de Kategorie Best Besetten för The Dark Knight
• 2018: mit den Oscar in de Kategorie Best Hööftdorsteller för The Darkest Hour
• 2018: mit den Golden Globe in de Kategorie Best Hööftdorsteller – Drama för The Darkest Hour
• 2018: mit den BAFTA Film Award in de Kategorie Best Hööftdorseller för The Darkest Hour

Gary Oldman. Mehr Biller, Videos oder Audiodateien to’t Thema gifft dat bi Wikimedia Commons.

• Gary Oldman in de Internet Movie Database (engelsch)
• Gary Oldman in de Düütschen Natschonalbökeree