Saul Perlmutter
Saul Perlmutter (* 22. September 1959 in Champaign-Urbana, Illinois) is en US-amerikaansch Astronom un Nobelpriesdräger in Physik.
Familie
Saul Perlmutter is de Söhn vun den ehmalgen Perfesser för Chemie- un Biomolekularingenieurwetenschap an de University of Pennsylvania Daniel P. Perlmutter[1][2][3] un de fröhere Perfessersche an de Temple University un Sozialwetenschaplerin Felice D. Perlmutter, deren jöödsch Öllern nah de russisch Revolutschoon 1919 ut dat hüüdige Moldawien över Kanada in de USA inwannert sünd. Saul Perlmutter hett twee Geschwister, Shira und Tova.
Leven
Saul Perlmutter hett Physik an de Harvard University (Bachelor-Afsluss 1981) studeert un kreeg 1986 sien Doktertitel Ph.D. an de University of California, Berkeley mit en Arbeit to de Söök nah Supernovae. He weer van 1989 bi 1993 Wetenschapler an dat Center for Particle Astrophysics in Berkeley un is siet 1983 Wetenschapler an dat Lawrence Berkeley National Laboratory (siet 1999 as Senior Scientist un Gruppenleiter).[4]
Perlmutter leit dat Supernova Cosmology Project, en vun de beid Teams, de Enn’ vun de 1990er Johrenut en Meeten vun de Helligkeit vun feern Supernovae vun den Typ Ia up en Beschleunigung vun de kosmisch Expansion slooten hemm. Disse Opdecken weer Utlööser vun de hüüdig Söök nah de Natuur vun de Dunkle Energie. Perlmutter is an mehreren Beobachtungsprojekten bedeeligt, de to dat Upkloren vun kosmologisch Problems nah Supernovae sööken.[4]
2011 kreeg he gemeensam mit Brian Paul Schmidt und Adam Guy Riess den Nobelpries för Physik. Würdigt wurr hör Opdecken vun de beschleunigt Expansion vun dat Universum dör dat Beobachten vun feern Supernovae.[5]
Siet 2002 is Perlmutter Liddmaat vun de National Academy of Sciences, siet 2007 vun de American Academy of Arts and Sciences un siet 2003 vun de American Association for the Advancement of Science. He forscht buterdem in dat Berkeley Earth Surface Temperature-Projekt mit.
Utteknungen
- 2002: Ernest-Orlando-Lawrence-Pries
- 2006: Shaw Prize
- 2006: Antonio-Feltrinelli-Pries
- 2007: Gruber-Pries för Kosmologie
- 2009: Dickson Prize in Science
- 2011: Albert-Einstein-Medaille
- 2011: Nobelpries för Physik