جھیل اسیک کول

اسیک کول ، چڑھدے کرغیزستان میں اتلے کوہ تیان شان چ واقع اک جھیل اے ۔ حالانکہ ایہہ برف نال ڈھکے پہاڑاں دے وچکار واقع اے پر اس دے باوجود وی ایہہ کدے نئین جمدی ۔ اس لئی اس دا ناں کرغیز بولی چ اسیک کول اے جس دا مطلب گرم جھیل اے ۔ ایہ جھیل رامسر کنونشن دے تحت حیاتیاتی تنوع دے حساب نال عالمی پدھر تے اک اہم تھاں شمار ہندی اے ۔

اس جھیل دی لمبائی 182 کلومیٹر تے چوڑائی 60 کلومیٹر تک اے ۔ جھیل 6236 مربع کلومیٹر دے رقبے تے پھیلی ہوئی اے ،اینج ایہہ جھیل ٹیٹیکاکا دے بعد جگ دی دوجی سب توں وڈی پہاڑی جھیل اے ۔ ایہہ جھیل 1606 میٹر دی بلندی تے واقع اے ۔ اس دی ودھ توں ودھ گہرائی 668 میٹر اے تےاوسط گہرا‏ی 270 میٹر اے ۔ لاگے دے پہاڑاں دے کئی چشمے ، بشمول گرم چشمے تے پگھلی ہوئی برف توں اسنوں پانی ملدا اے ۔ دکھنی ساحلاں تے کوہ تیان شان دے خوبصورت پربت دھارے دیاں اچیاں نیویاں چوٹیاں اس جھیل نوں بوہت انوکھے تے سوہنے منظر دیندیاں نیں ۔ جھیل دا پانی تھوڑا جہا نمکیں اے ۔ اس جھیل دے پانی چ سالانہ 5 سینٹی میٹر دے حساب نال کمی واقع ہو رہی اے ۔

سویت یونین دے دور چ ایہہ اک مشہور سیاحتی تھاں سی تے اس دے اتلے ساحلاں تے کئی اقامت گاہاں واقع سن ۔ سویت اتحاد دے خاتمے مگروں ایتھے دیاں اقامت گاہاں دی صنعت تے برا وقت آیا پر ہن سیاحاں دی آمد پاروں ایہہ علاقہ اک وار فیر سیاحت دا مرکز بندا جا رہئیا اے ۔

قرہ قول دا شہر اسیک کول اوبلاست (یعنی صوبہ) دا انتظامی صدرمقام اے ۔ ایہہ جھیل دے چڑھدے کنارے واقع اے تے اس جھیل تے اس دے نال دے علاقےآں دی سیاحت دے خواہش مند لوکاں لئی اک مرکز دی حثیت رکھدا اے ۔ ایتھی لکڑی دی بنی ہوئی اک شاندار مسیت مقامی ایغور مسلماناں نے بغیر کیلاں (میخاں)دے اساری اے ۔

حوالے

↑ http://wldb.ilec.or.jp/Details/Lake/ASI-55

↑ "صفحہ سانچہ:نام صفحہ في خريطة الشارع المفتوحة". https://www.openstreetmap.org/relation/1082659. Retrieved on

۱۱ اپریل ۲۰۲۴.

↑ اجازت نامہ: Creative Commons Attribution 3.0 Unported

[۱]

[۲]

[۳]

[۴]