ტამილნადუ

შტატიშ ფართობი 130 058 კმ² (11-ა აბანი). ტამილნადუ უხურგანს კარნატაკაშ, კერალაშ დო ანდჰრა-პრადეშიშ შტატეფს, თანეშე - მორსხუე ტერიტორიას პონდიშერი (პუდუჩერი). ბჟაეიოლშე ომძღჷ - ბენგალიშ ჸუჯი. შტტიშ შანულამი წყარმალუ — კავერი.

შტატიშ ბჟადალი, ობჟათე დო ოორუე-ბჟადალი — ქჷნდჷრამი რე. ტამილნადუ — ინდოეთიშ აკა შტატი რე, ნამუშ ტერიტორიას იდვალუაფუ მუჭოთ ბჟადალი, თეშ ბჟაეიოლი გჰატეფი. შტატიშ ბჟაეიოლი ნორთი — ჸოფიერი რზენი რე, ოორუე ნორთი წჷმორინელიე მუჭოთ რზენამი, თეშ ქჷნდჷრამი ტერიტორიეფით. ტამილნადუშ ცენტრალური რაიონეფი ძალამი სქირე რე დო მერკე ნოლექი გჷნმურს, ვინდარო შხვა რაიონეფს.ტამილნადუშ წყარპიჯიშ ღოზიშ სიგჷრძა 910 კმ რე. 2004 წანას, შტატიშ წყარპიჯიშ გოხოლუაშ რაიონეფს, მუჭოთ აზიაშ მეძობელ სახენწჷფოეფქ, შანულამო დეზარალეს, ინდოეთიშ ოკიანეს წჷმოქიმინელი ცუნამიშ გეშა. შტატის, თე მოლინეფიშ შედეგო 7 790 ადმ-შე უმოსიქ გოჭყორდჷ.რეგიონიშ კლიმატი მუკობუნელიე მუსონეფშა, ბრელი რაიონი გოლოფაშ თუდო რე. ნოლექიშ ოშქაშეწანმოწანური მუდანობა აკმადგინანს 945 მმ.-ს.

ტამილნადუ — ინდოეთიშ მაჟირა შტატი წარმებაშ სინძალიერეშჸურე (მაჰარაშტრაშ უკული). თაშნეშე, ართ-ართი ურბანიზაფილი შტატი რე (47 %, 2005 წანშ ფასებათ). ქიანაშ უმენტაში შტატეფშე გოშხეებათ, საწარმეეფი ძალამი წოროთ რე გოფაჩილი შტატიშ ნთელ ტერიტორიას. ტამილნადუ — ინდოეთიშ მაჟირა შტატი რე, IT-ინდუსტრიაშ გოვითარაფაშ დონეშჸურე (კარნატაკაშ უკული), კერზოთ, ჩენაი თე მაძირაფალით ხვალე ბანგალორს კჷნასქიდუ (ინდოეთიშ უშხუაში IT-პარკი, ბანგალორს, კარნატაკაშ შტატის იდვალუაფუ). თაშნეშე შანულამი გოვითარაფა ეჭოფჷ ბიოტექნოლოგიაქ (გჷშაკერძაფილო ჩენაის დო მადურაის). გოვითარაფილიე მანქანეფიშკოგაფა (შტატის გჷშმეშქუმალუაფუ ინდოეთიშ ავტომობილეფიშ 40%, უმენტაში ნორთი Hyundai-იშ კორპორაციაშ ქარხანას; 2008 წანაშე იწარმებუ უჩა მეტალურგია (ქარხანა სალემს), ენერგეტიკა (აეგ კალპაკამს, კუდანკულამიშ აეგ); ელექტროენერგიაშ შანულამი ნორთის, მეძობელი შტატეფს მითმიოჭირინუანს. ტრადიციულო, თარი როლს ლაჸაფენს ტექსტილური (გჷშაკერძაფილო ტრიკოტაჟი) წარმება, ნამუშ შანულამი ცენტრ ტირუპური რე (კოიამპუტურიშ არხოს).

გოვითარაფილი რე ტურიზმი; თარი ცენტრეფს შქასი რე — კანჩიპურამი, მამალაპურამი (მაჰაბალიპურამი), ტირუჩირაპალი, კანიაკუმარი დო რამეშვარამი. პლიაჟი მარინა ჩენაის — სიგჷრძათ მაჟირა აბანს რე მოსოფელს, ბანგლადეშიშ ნოღა კოქს-ბაზარიშ პლიაჟიშ უკული.

შტატიშ ეკონომიკას შანულამი როლი უკებჷ ოფუტეშ მეურნობას. ტამილნადუ, ინდოეთიშ ბრინჯიშ მოსალიჭჸურე მახუთა აბანს იკენს, თაქ მოჸუნა ედომუშამი ინდური ხილიშ დოხოლაფირო 10% დო ორტვინობაშ დოხოლაფირო 6%. წყარმალუ კავერიშ დელტა რჩქინელიე მუჭოთ „ობჟათე ინდოეთიშ ბრინჯიშ ფინჯალი“. ხილეფიშე დოხოლაფირო 87%, ნამუთ შტატის მოჸუნა, მანგოშა დო ბანანშა მოურს. შტატი — ბანანიშ დო პეულეფიშ უშხუაში მაწარმებელი რე, მაჟირა უშხუაში მაწარმებელი რე გეჸვენჯი ხილეფიშჸურე: მანგო, კაუჩუკი, არაქისი, ქოქოსი; ყავაშ მასუმა უშხუაში მაწარმებელი რე. შანულამი აბანი უკებჷ ჭაშანქარიშ წარმებას. გოვითარაფილიე მეჩხოლარობა, ტამილნადუ — ბჟაში ართ-ართი უშხუაში მაწარმებელი რე.

ტამილნადუ — მ. ს. სვამინატჰანიშ ჸუდე რე,თი მენცარიშ, ნამუსჷთ „ინდოეთიშ წვანე რევოლუციაშ მუმა“ ჯოხონ.

ტამილნადუშ შტატიშა მიშმურს 32 ოლქი:

• ოხიდური ნოღა კანჩიპურამი, ვითოში ოხიდათ რჩქინელი ნოღა, ნამუშ უმენტაშობა ოშქაშეოშწანურაშ ინდური არქიტექტურაშ შედევრი რე.
• პალავური სახენწჷფოშ ნანანოღა მამალაპურამი (მაჰაბალიპურამი), ასეიანი ბორჯის სკულპტორეფიშ ნოღა რე.
• მადურაი — ართი შრი მენაქში სუნარეშვარი მანდირაშ ოხიდაშ ნოღა, ნამუთ აკიგჷ ღორონთი შივაშ დო თიშ ჩილიშ პარვატიშ პატიოცემელო.
• შრირანგამი — დიდი ოხიდური კომპლექსი, ღორონთი ვიშნუშ ჯოხონობაშ, ნამუშათ მიშმურს 6 გოპურამამი კიდალა (ჭიშკარ-მინალიშ ჟინი ჸორშეფით).
• კანიაკუმარი (კომორინიშ კოდე) — ინდოსტანიშ ობჟათე ძგოპი, აბანი, სოდეთ ართიანს აკმოსვარუნს ბენგალიშ ჸუჯი, არაბეთიშ ზუღა დო ინდოეთიშ ოკიანე.

• Tamil Nadu Portal on The Indian Analyst