中華民國總統
中華民國總統係中華民國嘅國家元首，喺1948年設立，繼承咗國民政府主席嘅職能。根據《中華民國憲法》嘅規定，中華民國總統對外代表中華民國，可以行使宣戰同簽訂條約嘅權力；對內就要依法公布法律、發布命令同宣布戒嚴，佢擁有行使大赦、特赦、減刑，任免文武官員同埋授勳呢啲權力。中華民國總統同時亦都係三軍統帥，率領全國嘅陸海空三軍。《中華民國憲法增修條文》就規定中華民國總統要根據行政院會議嘅決議嚟發布緊急命令，同埋當立法院通過對行政院院長嘅不信任案嘅時候，喺諮詢立法院院長之後要宣佈解散立法院。除此之外，因應總統要行使職權上嘅需要，中華民國總統仲設立咗總統府作為佢嘅幕僚機構，同埋國家安全會議作為諮詢機構。
| 中華民國總統 | |
|---|---|
 中華民國總統府府徽 | |
 中華民國統帥旗 | |
| 尊稱 | 先生／女士、閣下 |
| 官邸 | 中華民國總統官邸 |
| 機關所在地 |  中華民國臺北市中正區 |
| 任命者 | （直接選舉） |
| 任期 | 四年（最多連任一次） |
| 設立法源 | 《中華民國憲法》 《中華民國憲法增修條文》 |
| 先前職位 | 國民政府主席 |
| 首任 | 蔣中正 |
| 設立 | 1948年5月20號 |
| 副職 | 中華民國副總統 |
| 薪資 | 每個月新臺幣49萬460元（2018年開始） |
| 網站 | 中華民國總統府 |
而家中華民國總統係由中華民國實際統治區（即係台澎金馬地區）嘅人民一人一票民選出嚟，任期四年，最多可以做兩屆。原本《中華民國憲法》規定總統應該要由國民大會間接選舉，取代咗國民政府主席呢個職位，任期六年，都係最多做兩屆。但係喺1992年嘅憲法第二次增修之後就改做現制，自從1996年中華民國總統選舉開始實施以嚟，已經舉辦過七次總統直選，而最近一次嘅選舉就喺2020年1月11號舉行。而家嘅中華民國總統係做蔡英文，喺2016年5月20號就任，2020年再連任。