佐治華盛頓

華盛頓呢個姓，源自英格蘭東北附近嘅泰恩-威爾郡華盛頓村（Washington）^[1]。1500年，華盛頓家族移民去北安普敦郡，祖先算係有啲名望，曾經有個祖先做過「紳士」^[2]。後來亨利八世向佢家族賜以土地，家族成員又做過唔同官職^[3]。但好景不常，隨住英格蘭清教徒革命，佢家道中落，族中長老於是喺1657年移民去美國維珍尼亞。華盛頓嘅老豆喺維珍尼亞係個蓄奴大農場主，搞下開鐵礦，但比起周圍嘅農場主，佢唔算好有錢。

根據儒略曆，華盛頓喺1731年2月11號出世^{[註 2]}，但按照西曆，佢應該係1732年2月22號出世^[4]，地點係維珍尼亞西摩蘭一個大農場，係佢老豆再婚後第一次添丁，之前有兩個同父異母嘅阿哥^[5][6]。

華盛頓做細路嘅時候，大部分時間都喺維珍尼亞一帶渡過；7到15歲，曾經不定時讀過書，最初喺教堂返學，後來授教於一個叫威廉士嘅老師，佢啲作業重保留到今時今日，反映佢數學都幾醒，又學過幾何，同埋一啲拉丁文^[2]。

原本華盛頓諗住去英國留學，但老豆死咗，屋企變得好窮，所以華盛頓只好放棄出國，去咗做消防隊員^[7]。佢一世都冇去過歐洲^[2]。

22歲時，佐治華盛頓無意間成為法國印地安人戰爭（French and Indian War）嘅導火線之一。呢場仗源自1753年，法國人當時喺屬於維珍尼亞嘅俄亥俄縣（Ohio Country）建立好多堡壘^[8][9]，想阻止英國人向西拓張^[10]。

華盛頓當時已經係支持大英帝國一方嘅殖民軍軍官。維珍尼亞總督羅伯·丁威迪（Robert Dinwiddie）見法國人挑刃佢，火都嚟埋，叫華盛頓發封最後通牒畀法國人，叫法國人快啲走^[11]。華盛頓同時亦升做中校。

但係法國人都係唔肯走，所以1754年，丁威迪叫華盛頓帶埋維珍尼亞第一軍團，去俄亥俄谷地擊退法國人^[12]。華盛頓嘅軍隊，陰中咗一支由法裔加拿大偵查隊，華盛頓嘅印第安人盟友Tanacharison族人又殺埋法國指揮官Ensign Jumonville，但好快趣，法國人還手，捉住華盛頓，用法文寫咗封投降書，叫佢簽名；華盛頓都唔識法文，胡俚胡塗就簽咗名，仲要承認佢剌殺法軍指揮官Jumonville。華盛頓之後俾法國人假釋，同意一年內唔准返俄亥俄谷地，但呢封信就成為法國印第安人戰爭嘅起因之一，掀起美國七年戰爭^[13][14][15]。

華盛頓當時似乎當英國係祖國，一直想做英軍，1755年終於有機會。當時英軍發動遠征，想重奪俄亥俄谷地，華盛頓於是參軍，最騎呢係，華盛頓打仗時，外衣曾經俾四粒子彈打穿，但佢都冇穿冇爛，面對槍臨彈雨，都可以安然撤退。自此之後，華盛頓成為當地英雄人物；1758年，佢跟住John Forbes將軍展開另一次遠征，卒之將法軍趕出Duquesne堡壘。^[16][17]

不過，華盛頓雖然仲響到，但佢係想做正規英軍軍官，而唔係殖民地民兵，無奈升唔到職，所以1759年黯然辭職，同年同有錢寡婦馬莎·華盛頓成親。呢位老婆今次係翻嫁，之前已經有兩個仔，華盛頓算係視為己出，橫掂佢都冇仔女。新婚後，兩公婆搬去弗農山度住，過住紳士階級農夫同蓄奴主嘅生活，重做埋維珍尼亞嘅下議院議員^[18][19]。

1774年，華盛頓被選為維珍尼亞州代表，去參加第一屆大陸會議。當時正夕波士頓傾茶事件，英國政府封咗波士頓港，重廢埋麻省嘅立法、司法權^[20]。

一年後，殖民地正式向英國開火，華盛頓着住成套軍服，出席第二屆大陸會議，當時得佢一個着到咁行，表明佢參戰意願，麻省代表約翰·亞當斯於是叫佢做殖民地總指揮官，又話華盛頓「擔任軍官嘅才能……極大天份同普遍特質」^[20][21]。

1775年6月15號，大陸會議一致撐佢做總指揮，華盛頓接受時話：「我唔覺得我可以勝任指揮官呢個光榮職位，但我會用最大誠意接受職位。」佢重話，除咗必要開支外，唔使畀額外報酬佢。

1776年，華盛頓帶備人馬，進攻波士頓，成功驅逐英軍，又率領軍隊去紐約，同英軍拼命。擁有壓倒性優勢嘅英軍8月大反擊，華盛頓俾人打到變落水狗，幾乎閤軍鏟^[22]。8月22號打輸長島戰役（Battle of Long Island），之後又輸多幾場，軍隊倉卒之下，從新澤西州着草，當時美國革命岌岌可危^[23][24]。

就喺大家士氣低沉時，1776年12月25號晚，華盛頓重整旗鼓，帶住美軍跨越德拉瓦河，突襲黑森僱傭軍（Hessian）嘅兵營，第二年1月2號晚，再擊中查理斯·康沃利斯（Charles Cornwallis）率領嘅英軍，呢場仗叫特倫頓戰役（Battle of Trenton），大大振興美軍士氣^[25]。

1777年夏天，英軍三路進攻，一路由約翰·伯戈因（John Burgoyne）率領，由加拿大向南進攻；一路由威廉·何奧率領，攻擊當時殖民地首都費城；華盛頓向南着草，但9月11號嘅布蘭迪萬河戰役（Battle of Brandywine）上慘敗。為擊退英軍而發動嘅日耳曼敦戰役（Battle of Germantown），同時因為濃霧同軍心大亂而收手^[26]。

華盛頓軍團只好去佛格谷（Valley Forge）過冬。呢個冬天真係好令人難過，搞到人心散渙，但華盛頓堅定不移，一邊指揮，一邊叫殖民地大會繼續補給。1778年，華頓盛終於遇到佢嘅諸葛亮－－普魯士軍前參謀部軍官弗洛依德·史托本（Friedrich von Steuben）。佢當時自願幫忙訓練華盛頓軍隊，改良戰術和作戰紀律，令大陸軍戰力狂升，亦係大陸軍由烏合之眾變成正規軍嘅分水嶺^[27][28][29]。

1778年6月28號，蒙茅斯戰役（Battle of Monmouth）爆發。華盛頓由費城攻入紐約，同英軍打成平手。呢場勝利影響深遠，除咗粉碎英軍意圖分裂殖民地政府嘅陰謀，亦令外國認為英軍已無法征服整個新國家，英國宿敵法國決定介入，正式同美國結盟。1779年，華盛頓命令兩成大陸軍展開蘇利文遠征（Sullivan Expedition），對親英嘅印第安易洛魁聯盟發動攻勢，一舉摧毀咗40條莊，呢批印第安人被迫永遠離開美國，移民加拿大^[30][31][32]。

1781年美軍以同法軍齊齊包抄康沃利斯喺約克鎮嘅軍隊，同年10月17號，卒之迫到康沃利斯投降，10月19號，接過康沃利斯嘅投降寶劍。儘管零星戰鬥一直持續到1783年，但經此約克鎮一役，已再冇大規模戰鬥^[33][34][35]。

英國最終承認美國獨立。1783年，兩國簽定巴黎條約。華盛頓解散佢嘅軍隊，並喺新澤西州洛基山（Rocky Hill）向阿兵哥發表告別演說^[12]。

雖然呢場仗喺美國歷史上一直備受稱頌，但喺現代軍事史上，華盛頓嘅戰術無開創性，對軍事發展亦冇乜影響，而且佢喺唔少戰役中都幾失魂，但因為佢堅定嘅革命信念，令軍心大振，共渡時艱，所以被美國人奉為英雄，因為支持佢嘅人認為，由於佢所主張嘅革命理念，美軍得以喺戰爭中存活並持續戰鬥，令到美國一直維持獨立而延續至今。華盛頓一直避開同英軍直接嘅衝突，避免美軍決定性嘅戰敗或者徹底投降。佢相當了解大陸軍本身喺訓練、軍械以及後勤等方面嘅弱點，並且亦都限制佢哋進行過於冒險嘅軍事行動。而華盛頓不僅以佢勇敢嘅人格以及號召力激勵軍隊士氣，同時喺政治方面取得殖民地各階層嘅信任同支持，呢啲都係獨立戰爭能夠成功嘅因素。

1783年12月23號，華盛頓向邦聯議會（Congress of the Confederation）辭去總司令職務，因為佢話呢個新國家，唔可以由軍人政府去統治，亦唔可以立下先例，避免出現軍國主義政權。佢之後返去弗農山莊園，同佢8年無見嘅賢妻同4個孫仔孫女共聚天倫^[36]。

1787年美國制憲會議喺費城舉行，商討影響深遠嘅美國憲法。華盛頓雖然無參與討論，但係佢嘅威望維持會議嘅公信力，唔少人因此而支持美國憲法^[37][38]。

開端

1789年華盛頓贏盡所有選舉人票，當選總統^[39][40][41]，亦係美國史上唯一一個攞到所有選舉人票嘅總統（仲喺1792年再一次達成）。第二名攞到34票嘅約翰亞當斯就做副總統。第一屆美國代表會議投票畀華盛頓兩萬五千蚊美金嘅年薪^[42][41]。華盛頓喺當時大概係全美國最有錢嗰個，佢喺西部嘅土地有好大嘅潛在價值。不過佢婉拒佢嘅總統人工，不過喺國會嘅要求之下，佢最終都係要咗份糧。

華盛頓嘅老婆瑪莎對華盛頓當選總統相當失望，佢只希望可以同華盛頓喺弗農山維持平靜嘅生活。不過佢都係承擔起第一夫人嘅職責，開放客廳並負責安排每星期嘅晚宴，令到晚宴可以配得住總統嘅身份^[43][44][45] 。

任內重要法案

• 簽署1789年司法條例，確立聯邦法院同最高法院制度嘅法律
• 簽署美國印地安交流法，規定內布拉斯加州嘅大平原區係印第安人嘅土地，1790年生效
• 簽署暫時住所法，將賓夕凡尼亞州嘅費城做聯邦政府暫時嘅首都。
• 簽署銀行法，頒發許可證畀北美銀行，成為第一間近代嘅私營商業銀行。
• 簽署1792年鑄幣法案，規定美國嘅硬幣鑄幣標準。
• 簽署逃亡奴隸法，調解賓夕法尼亞同埋維珍尼亞兩州之間為咗一件綁架案而導致嘅法律糾紛。
• 簽署海軍法，創立美國海軍。
• 組織第一屆嘅美國內閣。

內閣閣員

最高法院任命

身為第一任總統，華盛頓任命幾乎全數嘅最高法院法官，同樣嘅數量只有被任期長達十二年（1933年—1945年）嘅羅斯福做到。華盛頓推薦以下法官做美國最高法院：

• 約翰傑伊 - 首席大法官－1789年
• 詹姆斯威爾遜－1789年
• 約翰拉特利奇－1790年
• 威廉庫欣－1790年
• 約翰布萊爾－1790年
• 詹姆斯艾爾戴爾－1790年
• 托瑪斯莊臣－1792年
• 威廉帕特生－1793年
• 約翰拉特利奇 - 1795年升任首席大法官（1790年做法官）
• 塞繆爾蔡斯－1796年
• 奥利弗埃爾斯沃思- 首席大法官－1796年

任內入聯邦嘅州

• 北卡羅萊納州（1789年）
• 羅德島州（1790年）
• 佛蒙特州（1791年）
• 肯塔基州（1792年）
• 田納西州（1796年）

兩屆總統任期完咗之後，華盛頓拒絕連任。佢向美國人民解釋，「你哋再繼續揀我做總統，美國就冇真正嘅民主制度。」^[36]

自從1797年3月4號退休之後，華盛頓帶住輕鬆嘅心情返到弗農山。佢喺嗰度建立蒸餾室，並成為可能係當時最大嘅威士忌蒸餾酒製造業者，1798年就生產1萬1000加侖嘅威士忌，獲得7500美金嘅利潤^[36]。

1798年，由於戰爭逼近，為咗警告法國，華盛頓被新總統約翰亞當斯任命為美國陸軍嘅中將（喺當時中將係軍中最高嘅階級）。呢個只係象徵性嘅任命，華盛頓並冇服役^[36]。

1799年，美國就快要舉行第三屆總統兢選，聯邦黨人因為黨內分歧同聲望日下，希望華盛頓再次出來競選，但係華盛頓拒絕咗：「一旦我噉做會係可恥嘅，因為就算呢個係我國同胞嘅願望，而且喺大家嘅信任之下我可能當選並任職，但係另一個比我更加有才能嘅人就會冇得做……如果我參加兢選，我就係惡毒嘅人，唔單只會被加上搖擺不定嘅罪名，而且仲會被人認為懷有野心，一遇時機就爆發出嚟。總之，我會被人指責為無知嘅人。」^[36]

之後華盛頓感冒，引起嚴重嘅發燒同喉嚨痛，並惡化為喉頭炎同肺炎，又因採用放血療法醫治不當，喺1799年12月14號死於喉嚨感染，享年六十七歲。遺體葬喺弗農山當地。^[46]

華盛頓死後，佢昔日嘅革命戰爭夥伴，國會議員哈利·李（即美利堅聯盟國名將羅拔李阿爸）對佢嘅稱讚相當著名：「佢係一個公民，佢係戰爭中嘅第一人，亦都係和平時代嘅第一人，亦都係佢嘅同胞心目中嘅第一人。」^[47]

華盛頓為未來嘅美國樹立好多嘅先例，佢堅決選擇任滿後和平噉讓出總統職位畀副總統約翰亞當斯，呢個總統唔超過兩任嘅先例被睇成係華盛頓對之後嘅美國總統任期限制最重要嘅影響，呢個慣例直到1940年富蘭克林羅斯福時先至被打破，之後美國國會1951年通過美國憲法第二十二修正案，將總統任期正式限制喺兩任。

華盛頓被好多人稱為美國國父，並被人視為美國嘅創立者中最重要嘅一位，佢亦喺全世界成為一個典型嘅仁慈建國者形象。美國人講到佢時成日叫佢做美國嘅國父。佢亦都喺影響世界歷史100位名人之中排第26位，並被好多人視為美國歷史上最重要嘅一位總統^[48]。

即使華盛頓去世嗰陣獲得當時最高嘅軍階—三星嘅陸軍中將，隨著時光流逝，越來越多將軍（從格蘭特開始）獲得同佢一樣以及更高（四星以及五星）嘅軍階，噉樣睇起來就好似華盛頓功績唔夠佢哋噉。直到1976年國會通過法案，追封華盛頓為「合眾國特級上將」，並正式宣布呢個係美國最高軍階，超過以往同未來嘅所有元帥（五星上將）同將軍^[48]。

影視

• 香港電台，《古今風雲人物》，由2018年3月17日開始，播十集。

文獻

美國寫咗好多有關華盛頓嘅文獻，喺美國國會圖書館可以搵到。參考書。

• George Washington: A Life（紐約時報）由 Willard Sterne Randall 撰寫的華盛頓傳記之第一章（英文）
• George Washington for Kids - 兒童用網頁（英文）
• 喬治·華盛頓語錄 - Liberty-Tree.ca（英文）
• 39 Volume Collection of the Works of George Washington（英文）
• Papers of Washington Full versions on-line from the University of Virginia（英文）
• Papers of Washington Avalon Project (incl. Inaugural Addresses, State of the Union Messages, and more)（英文）
• Armigerous American Presidents Series（英文）
• Library of Congress: Washington's Commission as Commander in Chief（英文）
• Farewell Address（英文）
• Biography of George Washington（英文）
• George and Martha Washington Marriage Profile（英文）
• A pedigree of George Washington（英文）
• George Washington Genealogy on Wikicities（英文）
• George Washington's German "Cousin"（英文）
• Teaching about George Washington（英文）
• The First Presidential Veto Analysis of the first veto by a U.S. President（英文）
• General Washington's military rank（英文）
• Fact File and Biography of George Washington（英文）
• White House Biography（英文）
• 古騰堡計劃：George Washington嘅作品（英文）
• George Washington: Archontology.org, chronology, dates, terms, election results（英文）
• George Washington historic sites in Virginia - Official Tourism Website（英文）
• 1st State of the Union Address（英文）
• 2nd State of the Union Address（英文）
• 3rd State of the Union Address（英文）
• 4th State of the Union Address（英文）
• 5th State of the Union Address（英文）
• 6th State of the Union Address（英文）
• 7th State of the Union Address（英文）
• 8th State of the Union Address（英文）