何超盈

佢家族有猶太荷蘭血統，係荷蘭裔猶太人何仕文（Charles Henry Maurice Bosman）嘅後代^[8]，佢重有英國血統^[9]。佢有兩個細佬同埋一個細妹，分別係何猷邦、何猷亨、何猷君同何超欣。

佢自細開始學畫畫，受阿爸嘅私人古董、藝術收藏品同支持藝術團體嘅啟發^[10]，喺大學時期追求佢自己嘅興趣，2013年喺香港大學藝術系畢業^[11]。

佢喺瑞士完成MBA課程，準備投身酒店管理工作^[12]。

佢拎咗香港房地產營業員牌照，佢重係一個認可嘅財務顧問^[11] 。

何超盈2018年同辛奇隆結婚。2019年8月27號佢開刀生咗8磅重囡囡辛阡覓「荷包蛋」，英文名Audrey Rose。^[13][14]

佢喺自己開公司之前做過幾份唔同嘅工，包括喺一間銀行工作、一間律師樓做實習生同埋喺17歲做過一個高等法院法官嘅助手^[12]。

2015年，佢開咗「超盈文化有限公司」，專門舉辦藝術展覽同埋通過設立獎學金去鼓勵年輕藝術家^{[1] [2] [5] [6] [11]} 。同年佢重做咗保利澳門拍賣有限公司嘅CEO兼總監，專門拍賣當代嘅中國同埋亞洲藝術品、書法、古董同理珠寶^{[1] [2] [3]}。保利澳門喺同年1月喺澳門麗景灣酒店舉辦咗第一場拍賣會，拍賣總額超過24億港幣^[15]。

保利澳門係由保利香港同超盈文化共同創辦^[1]，佢同保利集團有根深蒂固嘅關係，佢之前喺保利香港做過暑期實習生^[5]，佢阿爸喺2003年將圓明園十二生肖頭像之一嘅豬頭像捐咗畀保利藝術博物館^[16]。

2015年，佢重接手管理澳門麗景灣酒店，開始將麗景灣酒店打造成藝術酒店，專門舉辦超盈文化同保利澳門嘅活動^[2]，佢喺接受訪問嘅時候話麗景灣酒店嘅古老葡萄牙式風格勾起佢同阿爸過家庭週末嘅回憶^[12]。

佢喺澳門藝術方面嘅投資同抱負正值澳門政府重點推動文化同創意產業等非博彩旅遊元素^[2]。除咗喺藝術方面嘅發展，佢重係澳門兩間新酒店Palazzo Versace酒店同埋Karl Lagerfield酒店嘅項目經理^[7]，呢兩間酒店係澳門博彩有限公司即將喺2017年開幕嘅上葡京項目其中一部分^[17]。

佢喺接受訪問嘅時候話佢嘅父母對佢有好大嘅影響，佢形容佢阿媽係一個積極、大膽、嚴格但係公平嘅商業女強人，阿爸係一個善待員工嘅商業巨人。佢透露正準備做佢阿媽嘅家族事業接班人，佢讚阿媽做事有幹勁同埋毅力，喺做接班人嘅路上需要細佬嘅幫手^[18] 。

佢花費過千萬買咗好多中國畫家吳冠中嘅畫做私人收藏品^[19]。佢欣賞吳冠中嘅作品表達咗西方意識形態嘅影響力同埋國際視野^[5]。

佢喺接受訪問嘅時候話佢哋屋企人經常買畫嚟互送生日禮物，佢自己都會去博覽會(例如巴塞爾藝術展)買自己中意嘅藝術品^[20]。

佢係深圳市政協委員、香港政協青年聯會理事、澳門中華總商會青年委員會委員^[21]同埋2015博鰲亞洲青年論壇(香港)籌委會主席^[22]。

2012年10月，佢出席咗香港演藝學院嘅Moiselle秋冬時裝系列開幕，據悉，佢係香港高級時裝品牌Moiselle創作總監陳柏熹嘅朋友^[23]。

2016年1月，佢出席咗香港演藝學院嘅籌款舞會^[24]，呢場舞會為香港演藝學院籌得超過700萬港幣。

2016年3月，佢出席咗由美國愛滋病研究基金會喺將軍澳邵氏影城舉行嘅慈善活動，佢細佬何猷君同埋細妹何超欣都出席咗晚禮服場合，佢向基金會嘅五個項目捐咗大約300萬港幣^[25] 。

2016年4月，佢應邀出席喺美國波士頓哈佛大學舉行嘅中國論壇做藝術方面嘅主講嘉賓，演講內容係圍繞藝術喺中國嘅發展。^[26][27]。

2016年5月，佢出席喺法國舉行嘅康城影展，應邀支持參展電影「Loving (正在愛)」^[28][29]，同埋出席當地嘅amfAR慈善晚會^[30]。

2016年6月，佢應阿爸何鴻燊嘅好朋友英國貴族Sir Ben Slade邀請出席喺英國舉行嘅英國皇家賽馬會活動，仲成為英女皇官方嘉賓^[31][32][33]。

2016年7月，佢無懼法國尼斯恐襲事件，途經尼斯出席摩納哥紅十字會舉行嘅慈善晚會^[34][35][36]。

佢有玩Pokémon Go，佢最中意嘅精靈係波波球^[37]。

佢有一個限量版嘅Chanel 1000% be@rbrick巨型模型放喺自己嘅辦公室^[38]。

佢對外國語言有興趣，佢識講意大利文、葡萄牙文、普通話、廣東話同埋英文^[10]。

2013年3月7號，何超盈喺香港時代廣場附近俾記者影到神智唔多清醒，鼻上疑似有白色嘅粉末，結果畀傳媒大肆報道^[39]。