孲𤘅子

【孲𤘅子】出自《揚子方語》：『吳人謂赤子曰孲𤘅』^[4]。【孲】喺《集韻》：『孲，赤子也』。【蘇孲崽】出自《番禺縣志》：『廣州呼小兒曰蘇孲崽。蘇，生也，言新生者也』。【sou¹】 呢個字有人寫做【臊】係指 BB 身上嘅氣味，寫作【臊孲仔】^[5]。文言書面語稱做【嬰】、【嬰兒】或【嬰孩】^[6]，《說文解字》話【嬰】字原本嘅意思係女人攬響頸上嘅貝殼（飾物）^[7]，至於嚸解攞來指 BB 就無人肯定。而近代嘅「BB」或「啤啤」好可能由葡文嘅 bebê 或者英文嘅 baby 度出來 ^[8]。

一出世嘅孲𤘅膊頭同個臗位窄，肚少少凸，手腳短。佢哋嘅平均重 3.2 kg，可以由 2.7 到 4.6 kg。平均身長 35.6–50.8 cm，未足月嘅 B 細啲。孲𤘅嘅頭大。

啱啱出世嘅孲𤘅，個頭佔個成個人好大份。頭蓋骨相對塊面係好大。大人嘅頭骨係佢個身長嘅八份一，孲𤘅就係四份一。啱啱出世嘅孲𤘅嘅頭骨未生埋，呢兩個軟軟哋嘅地方叫腦囟（fontanelle）。有個鑽石形、大嘅前腦囟，響頭嘅前頂方，同細三角形嘅後腦囟，響頭嘅後面。

有啲啱啱出世嘅孲𤘅，響膊頭、背脊、前臂、耳、塊面度有啲幼細嘅毛毛，叫胎毛（lanugo）。一般胎毛幾星期自己會甩。有啲 BB 出世嗰陣好多頭髮，有啲就無乜，有啲重光頭，頭皮上有層薄薄嘅頭泥，出世後洗頭就會甩，如果唔甩嘅話，可以加少少BB油，輕輕按摩。頭殼有啲瘀，眼有啲腫，遲啲會散。

孲𤘅出世時穿過陰道。頭會變形，拉長咗，幾日到幾星期會變返正常。

啱啱出世嗰陣，BB 嘅皮膚程暗藍色，一開始吸氣會變返正常膚色。重會有層白色嘅嘢，叫胎兒皮脂（vernix caseosa），有抗菌作用。腳仔手仔會甩皮，重有胎記，不過未必個個孲都會有。

BB 嘅性器官會紅腫，男𤘅仔個脧脧又大又紅，無論男女孲𤘅個胸都會大，係由於母體嘅激素造成嘅短暫情況^[9]。男女孲𤘅嘅可乳頭能會出奶^[10]，或 BB 女由陰道流出血/奶狀嘅液體，兩個情況都係正常嘅^[11]，好快會消失。

孲𤘅嘅臍帶係藍白色，臍帶剪咗之後，會留返 2-5cm 喺度，三星期左右，就會乾、變黑、縮細，最後自己甩出來。有時醫院幫 B 嘅剪臍帶個位搽藥水防止感染，臍帶睇起來紫紫哋。

爾啲種種響啱啱出世嘅孲𤘅嘅特徵好快會消失。老少少嘅 BB 個樣好唔同，有人認為老少少嘅𤘅仔得意啲，亦有人覺得啱啱出世嘅好醜樣。

孲𤘅最鍾意俾人摸、掃、抱。抱住搖下佢，會畀BB好似喺媽媽肚裏面，俾胎水保護住咁、沖暖水涼、按摩通常可以令 BB 喊少啲。佢哋鍾意食手指、啜奶嘴。啜嘢係本能嚟嘅，畀 BB 食奶。

BB 視力一般，只係睇到眼前 45厘米嘅嘢。雖然睇得唔遠，夠佢食人奶嗰陣睇到阿媽個樣，所以啲人話BB識認人，係真嘅。當 BB 唔瞓覺、唔喊、唔食奶嗰陣，就會乜都睇一餐。對啲色水對比大、複雜嘅花紋圖案特別有興趣。BB 最鐘意都係睇人嘅樣。

孲𤘅重喺阿媽肚裏面已經可以聽到體內發出嘅聲：阿媽嘅心跳、腸郁動嘅聲、人聲、車聲。胎裏面嘅 B 雖然浸喺羊水度係可以聽到聲。BB 對女聲反應好過男聲，因此可能解釋嚸解同 BB 講嘢嗰陣啲人會提高把聲。人聲，尤其是阿媽把聲，會令 BB 好舒服、有安全感。大大聲、爆音會嚇驚佢哋。

BB 一出世就對甜、酸、苦、鹹有反應，甜嘢就最鍾意。一出世嗅覺就好發達，喺第一星期，已經可以分辨到阿媽同第個女人啲奶嘅味道。

夭折率係孲𤘅仔一歲之前死嘅比率。分兩種：出世頭 27 日死叫 neonatal death；第 28 日之後嘅叫 post-neonatal death。死因包括：缺水、感染、先天畸形、嬰兒猝死症（Sudden infant death 或就咁 SIDS ）^[12]。

睇夭折率就知嗰個國家／地區嘅醫療狀況掂唔掂。夭折率顯示到孲𤘅仔／大肚婆嘅健康狀況、醫療設施夠唔夠、公共醫療政策／制度嘅成敗。夭折率越低就越掂 ^[13][14]。

一係食阿媽啲奶（人奶），唔係就食特別加工牛奶（嬰兒配方）^[15]不過有時啲B對奶粉敏感，咁就要轉食豆奶，啲 B 越大，胃口越好。BB 吮嘅本能令到佢哋識得由阿媽乳頭度食奶，或者食奶嘴，亦係佢哋嘅本能去搵乳頭。如果阿媽唔肯或唔想餵人奶，或者餵唔到，可以食嬰兒配方或請奶媽。

餵人奶畀 BB 好處多，奶裏面有抗體 ^[16]，而飲人奶嘅 B 可以唔飲水，減少受到污遭水感染嘅機會。加上工牛奶無抗體，喺水源受污染嘅地方，有病嘅機會大升。只有人奶有齊 BB 要嘅抗體，有齊 BB 啲長肉嘅需要^[17]，雖然嬰兒配方久唔久改下去學人奶。

湊 BB 係一件好辛苦嘅事，特別係啲淨飲人奶嘅蘇孲，每兩個鐘頭要餵一次，阿媽阿爸無覺好瞓。

BB 唔識忍尿忍屎，喺一般嘅工業國家畀 BB 鴨尿片 。BB 唔識行，淨係識得爬同躝，所以要大人手抱，或者用孭帶，孭袋孭出街，而家啲孭帶可以孭前面或背脊後面。亦可以將個 B 放落 BB 車度推。

同細路一樣，大人會對待 BB 同一般大人唔同。有時候佢哋係萬人躉，特別俾人留意。好多地方唔使畀入場費，好似博物館，遊樂場咁，搭車唔使錢。隨住 BB 一路大，大人對佢嘅注意同優待亦減少。

• 細路
• 《所羅門王嘅審判》

維基同享有多媒體嘅嘢：
孲𤘅子

• American Academy of Pediatrics Professional organization for pediatricians in the United States, with parenting and disease information that pertains to infants and children
• CIA FactBook — Infant mortality rates in different countries and other health indicators
• The World Health Report 2005 – Make Every Mother and Child
• Swaddling Your Baby --University of Florida/IFAS Extension Department of Family, Youth and Community Sciences
• Make Baby Supply Kits for Newborns in Need A non-profit organization suggests ways to help needy babies and children