東歐劇變
東歐劇變，又叫做1989年革命，係一次喺1980年代主要喺東歐發生嘅自由民主制嘅革命，成功推翻當地嘅共產主義政府。喺革命之後，東方集團解散，同時對蘇聯解體有唔少嘅影響，係冷戰尾聲嘅重要里程碑之一。
東歐劇變 | |||||||||||
|---|---|---|---|---|---|---|---|---|---|---|---|
| 冷戰同蘇聯解體嘅一部分 | |||||||||||
 喺1989年11月，柏林圍牆冧咗，成為革命最出名嘅象徵 | |||||||||||
| |||||||||||
歷史
革命最早嘅足跡可以去到哈薩克加盟國。當地喺1986年開始出現大型嘅學生示威[3][4]，成為咗蘇聯其他地方嘅示威者嘅典範。
到1988年，波蘭嘅工人發動大罷工，要求蘇聯政府保障工人權益[5][6]。到1989年6月4號，波蘭嘅團結工會喺選舉大勝，打敗咗管治咗幾十年嘅共產黨，正式將民主制引入波蘭。呢次成功將革命繼續蔓延去到東方集團嘅其他國家：喺同一時間，匈牙利開始拆喺同奧地利邊界嘅圍牆，歐洲嘅鐵幕逐漸咁斷開。
到1989年8月，東德嘅人民喺各大城市發動示威，其中包括萊比錫，成功逼到共產黨落台。除此之外，東德政府亦同意會拆咗埲柏林圍牆去，令德國統一，亦同時成為咗革命最有象徵式嘅事件。
到1990年3月，蘇聯自己都曾經短期成為咗多黨制嘅共和國，不過只係維持咗年幾就解體。蘇聯嘅15個加盟國各自獨立，成為咗15個獨立嘅國家，其中最大同最多人嘅蘇俄，就成為咗俄羅斯聯邦。
喺1993年1月，捷克斯洛伐克拆散咗成為捷克同埋斯洛伐克[7]。喺東方集團以外，東歐嘅阿爾巴尼亞同埋南斯拉夫嘅共產政權亦同樣冧檔，其中南斯拉夫亦都解體，成為咗5個國家。
到1996年，烏克蘭決定鏟除舊嘅蘇維埃憲法，成立新嘅民主憲法。學者一般都認為，呢件事代表咗蘇維埃系統完全被消滅，革命亦都正式完結[8]。
手段
喺呢系列嘅革命入面，其中好重要嘅手法係公民抗命，表明廣大人民都反對政府嘅一黨專政，並且會要求改革[9]。喺大部分嘅時間，革命一般都係和平嘅，只係羅馬尼亞出現咗暴力嘅場面，但係革命都同樣好快咁成功咗[10]。
影響
東歐國家喺獨立之後，基本上都好快接受自由民主制同埋自由市場，而有大部分亦都加入埋歐盟同埋北約，大致上實現歐洲一體化。
除咗最直接受影響嘅東歐國家之外，呢次革命喺其他地方都有唔少嘅回響。喺1989年頭，中國嘅學生發起咗八九民運，雖然最終都因為六四事件而失敗，但係同時亦啟發咗其他地方嘅反抗運動。
喺1990年代期間，大部分第三世界國家嘅共產黨都落咗台，包括阿富汗、柬埔寨、蒙古國、埃塞俄比亞、安哥拉、剛果共和國、莫三比克、同埋索馬利亞等等[11]。
雖然唔同地方嘅革命都唔一樣，但係一般都係要求民主同埋實行資本主義等等。到革命之後，剩係得4個國家能夠留低掌權：中國、古巴、老撾、同埋越南。呢啲國家基本上都引入咗一定嘅市場制度嚟參與世界經濟。
喺有啲情況，呢次革命帶嚟咗好大嘅麻煩，其中有唔少都係涉及以前屬於蘇聯嘅獨立國家，而呢啲衝突夾埋一齊，就稱之為前蘇聯衝突。喺南斯拉夫，解體之後嘅國家發生種族衝突，造成南斯拉夫戰爭[12][13]。