生態經濟學

生態經濟學（粵拼：sang1 taai3 ging1 zai3 hok6；英文：ecological economics / eco-economics）係一套結合經濟學同生態學嘅跨學科研究，旨在分析人類嘅經濟活動同自然生態之間嘅啦掕^[1]。生態經濟學上嘅分析會將人類嘅經濟體視為地球嘅一個子系統，會對自然生態有各種嘅衝擊，而且兩者仲會互相影響^[2]。

2019 年澳洲一條充滿咗垃圾嘅河；人消費（經濟活動一種）往往會造成污染，影響自然生態。

一個人潛水睇座頭鯨；如果啲座頭鯨死嗮，啲遊客會唔會冇咁想嚟呢度旅行呢？

舉個簡單例子：人類嘅經濟活動會涉及各種嘅生產同消費；工廠做生產會排出空氣污染同水污染，而消費者買嘢嗰陣又會製造垃圾；呢啲嘢好多時都會傷害某啲生物物種，搞到嗰啲物種嘅數量跌，同時又有可能令到嗰啲生物嘅競爭對手嘅數量升（對生態系統嘅影響）－即係話經濟活動影響咗笪地方嘅生物多樣性（biodiversity）；經濟活動對生態造成嘅影響又有可能影響返經濟轉頭－生物多樣性低咗可能會對旅遊業產生負面影響^[3]，從而影響經濟。生態經濟學想研究嘅，就係經濟同生態之間嘅呢啲互動^[4]。

生態經濟學有相當嘅應用價值：生態經濟學上嘅知識^{[註 1]}可以幫到手理解啲政策要點樣制定，先可以令人類有誘因幫手保護生態－例如生態旅遊專門諗點樣用自然生態嚟吸引遊客帶起旅遊業，等當地嘅人會想為咗用自然生態賺錢而肯出手保護生態^[2][5]。