生物學史

早喺古希臘嗰陣時，經已有哲學家喺度研究傳統定義上嘅生命，不過佢哋嘅諗法多數都唔受現代科學接納。最早期有關生命嘅理論係由唯物論（materialism）嗰度走出嚟嘅，呢種思想認為宇宙入面淨係得物質，冇靈魂呢啲非物質嘅嘢，而對於唯物論者嚟講，生命只不過係一種複雜嘅物質，而唔係乜嘢靈魂；另一方面，又有思想家唔認同呢種諗法－主流古希臘學者會喺古希臘文入面區分兩個字：一個係「ζωή」（zoe），解做「（有靈魂嘅）生命、動物」，派生英文字「zoology」（動物學）；另一個係「βίος」（bios），解做「生活、生計」，派生英文「biology」（生物學）。呢個區別好影響後世西方哲學、尤其是基督教倫理對「生命」嘅睇法，將「生命」呢樣嘢分成「超越肉體嘅生命」（zoe）同埋「肉體嘅生命」（bio）兩個層次^[1]。

古希臘思想家又有喺度諗生命嘅組成：公元前 430 年嘅哲學家恩培多卡勒（Empedocles；希臘文：Ἐμπεδοκλῆς）提出咗個諗法，認為宇宙入面所有嘢－包括生物－都係由四種元素組成嘅：地、水、火、同埋風。佢相信世上所有嘅變化都係由呢四種元素嘅排列嚟解釋得到，而各種嘅生物就係呢四種元素以啱嘅方法溝埋一齊得出嘅結果^[2]；另一方面，公元前 460 年出世嘅哲學家德謨克利特（Democritus；希臘文：Δημόκριτος）就啱啱相反，認為生命嘅本質係有靈魂，主張火係同生命最有啦掕嘅元素（因為生命都係會產生熱力嘅），並且認為熱嘅原子會產生靈魂，令到啲嘢有生命^[3]。

公元前 322 年出世嘅希臘哲學家阿里士多德好睇重生命研究，亦都寫咗佢對生命呢個概念嘅睇法。佢提出物形論（hylomorphism），話宇宙入面所有嘢都有物質同形態（form），而一件有生命嘅嘢嘅形態就係佢嘅靈魂（希臘文：ψυχή，讀做「psyche」；拉丁文：anima）。佢認為靈魂有分三種：植物嘅靈魂係最簡單嘅，呢種靈魂淨係識得做生長同埋繁殖呢啲基礎功能；而動物嘅靈魂既有呢啲功能，又曉郁同埋感受；人類獨有嘅理性靈魂（rational soul）就更上一層樓，仲有思考嘅能力同埋意識^[4]。阿里士多德仲提出話物質係形態嘅必要條件：一定要有物質先至可以有形態，所以冇身體嘅嘢係唔會有靈魂嘅（但有身體唔等如會有靈魂）^[5]。佢將靈魂分三種嘅做法，雖然話啱唔嗮（例如係植物其實識郁，只係郁得好慢），但係智能呢家嘢似乎真係依「植物－動物－人類」嘅次序上升。植物冇乜嘢智能可言，動物幾乎係全部都或多或少噉有啲智能，而人類就出咗名係動物之中最聰明嘅。物形論雖然喺現代學角度上啱唔晒，但仍然對後世嘅生命研究產生影響^[6]。

羅拔虎克用嘅顯微鏡嘅設計圖

達爾文嘅相，19 世紀中影嘅；佢嘅物競天擇理論改革咗成個生物學界。

喺中世紀（5 至 15 世紀），生物學都仲未有大嘅進展。喺羅馬帝國冧咗之後，佢哋啲知識好多都喺歐洲失傳咗，搞到歐洲進入咗一段黑暗時代。古羅馬同古希臘嘅知識有喺近東同中東嗰度留存咗落嚟－拜占庭帝國嘅人同阿拉伯人將古希臘人嗰啲醫學同生命研究著作譯做佢哋啲話，但佢哋唔多做生物方面嘅研究，只不過係後尾做到將古希臘嘅知識傳返過去歐洲。中世紀啲歐洲人將古希臘發展出嚟嘅嗰套醫術攞咗嚟用，但係好少可會質問嗰套知識或者嘗試將佢發展上去^[7]。中世紀歐洲嘅大學喺哲學同物理學等領域嘅研究有啲睇頭，但係生物學依然未有進展，事實上喺嗰時生物學連獨立嘅學科都唔係。總體嚟講，中世紀嘅人類喺生命研究方面冇乜特別嘅作為^[8]。

生物學真正嘅開端要數 17 至 18 世紀嘅科學革命（The Scientific Revolution）時期。喺打前少少嘅文藝復興時代，歐洲人對古希臘古羅馬嘅文明同思想興趣大增，令到科學嘅火花開始喺歐洲重燃，好似係達文西噉，就成日都幫手研究人類同埋動物嘅身體，仲對解剖學做咗些少貢獻^[9]。而喺 17 至 18 世紀嗰陣，歐洲仲掀起咗科學革命嘅熱潮：喺嗰個時代，有好多歐洲學者都開始嘗試用科學方法嚟研究各種大自然嘅嘢，包括咗生物。呢樣嘢令到生物學－研究生命嘅科學領域－開始萌芽。另一方面，顯微鏡嘅發明亦都令到對生命嘅理解有咗飛躍性嘅進步：英國科學家羅拔虎克（Robert Hooke）喺 1665 年出版咗《Micrographia》（粵文：微物圖誌）呢本著作，詳細噉記錄咗佢自己用顯微鏡睇到嘅各種微生物。打後少少喺 17 世紀尾，有埋荷蘭科學家列文虎克（Antoni van Leeuwenhoek）等人對顯微鏡做各種改良，歐洲人成功噉發現咗細菌同好多其他微生物。顯微鏡嘅發展，開拓咗以細胞為生物單位嘅科學認識，為現代生物學對生命嘅定義（細胞學說）奠基^[10]。

喺科學革命時期，學者亦都致力將已知嘅生物分類同埋改名。瑞典生物學家林奈（Carl Linnaeus）喺 1735 年提出咗佢嗰套生物分類法，跟手喺 1750 年代幫佢所知嘅生物改好嗮啲學名，呢兩樣嘢對於現代生物學嚟講都仲係好緊要，而且林奈－同好多佢同期嘅歐洲學者－發表咗好多對生物嘅諗法，當中法國數學家布豐伯爵（Comte de Buffon）甚至仲有諗過進化呢條橋。雖然林奈同布豐伯爵等學者嘅嗰柞諗法有好多都畀及後嘅科學家證實咗係錯嘅，但係佢哋啲研究依然係為現代生物奠定咗個基礎^[11][12]。

現代生物學嘅開端喺 19 世紀。嗰個時期最出名嘅要數英格蘭自然學家查理斯·達爾文（Charles Darwin），佢對進化同物種形成等現象作出咗深思，並且喺 1859 年發表咗佢嗰本好出名嘅名著《物種起源》（On the Origin of Species），提出咗物競天擇嘅諗法解釋進化嘅現象，認為無論同種定異種嘅生物都會喺個環境嗰度爭生存所需嘅資源（例如係嘢食同水），爭嬴嘅就有得生存落去，跟手就繁殖以及將自己身上嘅基因傳畀下一代，所以一個物種嘅基因庫會一代一代噉變，經過幾百萬年就會變到完全唔同咗樣^[13]。

達爾文個理論喺啱啱提出嚟嗰陣喺學界有唔細嘅爭詏，但最後各種嘅證據－由化石以至實驗觀察等－都係撐達爾文個諗法嘅^[14]。而到咗廿一世紀，達爾文個理論已經俾科學家廣泛噉應用喺醫學同埋人工智能等嘅好多個領域嗰度（例子可以睇遺傳演算法^[15]），而且喺理論上仲有新嘅發展，例如係用物競天擇嘅理論嚟解釋利他嘅行為呀噉^[16]。

• 科學史