色
色（粵拼：sik1），或者叫色水（sik1 seoi2）、顏色（ngaan4 sik1），係人通過眼、腦同生活經驗所產生嘅一種對光嘅視覺反應：光係一種電磁波（EM wave），會由光源射落去物件嗰度，而物件嘅表面會反射一部份嘅光（可以睇光學）；呢啲光有一部份會進入睇嗰個人對眼嗰度，眼嘅視網膜（retina）上面嘅感光細胞會對光有反應，當中「邊啲感光細胞反應零舍勁」就視乎光嘅頻率（frequency）而定，而顏色查實就係個腦對感知到嘅光嘅頻率嘅判定（可以睇視知覺）[1][2]；同時，唔同化學成份嘅物質喺「反射乜嘢頻率嘅光」上有差異，所以唔同化學成份嘅物質望落會有唔同嘅顏色[3]。
.jpg)
物理現象
| 色水 | 波長 | 頻率 |
| 紅色 | 約625—740納米 | 約480—405兆赫 |
| 橙色 | 約590—625納米 | 約510—480兆赫 |
| 黃色 | 約565—590納米 | 約530—510兆赫 |
| 綠色 | 約500—565納米 | 約600—530兆赫 |
| 青色 | 約485—500納米 | 約620—600兆赫 |
| 藍色 | 約440—485納米 | 約680—620兆赫 |
| 紫色 | 約380—440納米 | 約790—680兆赫 |
 | ||
電磁波（EM wave）喺波長（wavelength）同埋強度上可以有好大差異，喺人可以感受到嘅波長範圍之內（約莫 312.30 納米到 745.40 納米）嘅電磁波就係所謂嘅可見光（visible light），有時亦都俾人簡稱叫做光。假如人將同一種光源喺各個波長嘅強度擺埋一齊，就可以得到呢種光源嘅光譜。一個物體嘅光譜決定呢件物體嘅光學特性，包括佢嘅顏色。唔同光譜可以被人接收為同一種顏色。雖然人可以將一種顏色定義為所有呢種光譜嘅總和，但係唔同嘅動物睇到嘅顏色係唔同嘅，唔同人所感覺到嘅顏色亦都係同嘅，所以呢個定義係相當主觀嘅。
色彩理論
喺色彩理論（colour theory）上，一隻色可以用三個數值描述[4]：
- 色相（hue）指一隻色有幾似俾人描繪成紅、橙、黃、綠、藍或者紫嘅顏色；色相值可以用一個單一數值嚟表示－色相可以想像成一個輪，輪上面有齊典型嘅紅橙黃綠藍紫六色，以及係呢六色之間嘅交界色，一隻色嘅色相就係佢喺呢個輪上面位於邊個「角度」，例如下圖嗰個色相輪入面位於 0 度（個色輪最上嗰一格）嘅色就係典型嘅黃色。原則上，唔同顏色之間並冇明確嘅分界線－一隻色喺色相輪上面嘅可能角度係連續性嘅，可以係 270 度、270.01 度、270.0001 度... 等等[5]。
- 彩度（saturation）大致上係指一隻色有幾「鮮艷」；假如亮度不變，一柞彩度低嘅色會顯得似一片片唔同深淺度嘅灰白色，而一柞彩度高嘅色就會偏離灰白，望落會好鮮艷。喺實際應用上，彩度都係可以用單一嘅數字嚟表示；下圖中間嗰個色彩輪就表達色相得嚟又包含埋彩度－愈近中心點嘅色就彩度愈低（似灰色）[6]。
- 亮值（lightness）係指一隻色有幾「光」；假設第啲因素不變，亮值高嘅顏色會接近白色，而亮值低嘅顏色會接近黑色。喺實際應用上，亮值都係可以用單一嘅數字嚟表示；例如下圖最右手邊嗰個色彩輪就表示彩度同亮值－左表示彩度高嘅藍色、右表示彩度高嘅黃色、上表示亮值高嘅色、而下表示亮值低嘅色[7]。
色相輪（左）、彩度輪（中）同埋亮值輪（右）
點嗌
廿一世紀初嘅粵文有樣嘢幾出名，就係好興用 YXX 噉嘅字詞嚟形容顏色，例如[8]：
| 漢字 | 粵拼 |
|---|---|
| 黃黚黚 | wong4 gam4 gam4 |
| 紅卜卜 | hung4 bok1 bok1 |
| 紅噹噹 | hung4 dong1 dong1 |
| 青咇咇 | ceng1 bi1 bi1 |
| 白雪雪 | baak6 syut1 syut1 |
| 白晒晒 | baak6 saai4 saai4 |
| 烏卒卒 | wu1 zeot1 zeot1 |
| 黑鼆鼆 | haak1 mang1 mang1 |
... 等等。