Doegong
Die doegong of doejong is 'n seesoogdier verwant aan die manatees en die kleinste lid van die orde Sirenia (wat ook die lamantyn insluit). Die naam het sy oorsprong uit die Maleise duyung, wat "dame van die see" of "meermin" beteken. Die dier word net in vlak water aangetref en word deur die IUBN geklassifiseer as 'n kwesbare spesie.
Doegong | |
---|---|
Wetenskaplike klassifikasie | |
Koninkryk: | |
Filum: | |
Klas: | |
Orde: | Sirenia |
Familie: | Dugongidae Gray, 1821 |
Subfamilie: | Dugonginae Simpson, 1932 |
Genus: | Dugong Lacépède, 1799 |
Spesie: | D. dugon |
Binomiale naam | |
Dugong dugon (Müller, 1776) | |
Natuurlike verspreiding van D. dugon |
Identifikasie
Die doegong se totale lengte is tussen 2,5 m en 3 m en weeg tot 400 kg. Die liggaam is sigaarvormig en die dier het vinpote en stertlobbe. Die vinpote is spaanagtig. Daar is nie agterpote nie, net 'n groot vlesige stert wat soos die dolfyn se stert horisontaal afgeplat is. Die velkleur is grysbruin, en is bo 'n bietjie donkerder as onder. Die bek en onderlip is bedek met kort, dik borselhare.
Verspreiding
In Suider-Afrika kom die doegong voor langs die suidkus van Mosambiek, maar enkele swerwers word ook langs die KwaZulu-Natalse kusgebied aangetref. Wêreldwyd het die voorkoms van die soogdiere afgeneem van die hele suidelike gedeelte van die Stille en Indiese Oseaan tot enkele gebiede in Australië, Nieu-Guinee, Palau en klein getalle langs die ooskus van Afrika.
Habitat
Die doegong bewoon slegs vlak, beskutte water naby die kuslyn.
Gedrag
Doegongs is gewoonlik alleenlopers, maar kan ook in pare of familiegroepe voorkom. Hulle swem stadig en kan tot vyf minute lank onderwater bly, alhoewel die gemiddelde duiktog nie veel langer as 'n minuut duur nie.
Kos
Die spesie eet etlike soorte seegras wat voorkom in beskutte, vlak strandbaaie of strandmere.
Voortplanting
Een kalf word tussen November en Januarie voortgebring.
Galery
- Ma met kalf
- Stert
- Onderkant
Sien ook
Verwysings
Bronne
- Veldgids tot die soogdiere van Suider-Afrika. Chris en Tilde Stuart. Eerste uitgawe, 1988.
- Enkele gedeeltes van die Engelse artikel Dugong is ook gebruik.
Eksterne skakels
- Beelde en video's van die doegong Geargiveer 2 Maart 2006 op Wayback Machine
- Die doegong