Winfried Kretschmann

Em Winfried Kretschmann syyni Eltere sin Verdriibeni us em oschtpreußische Ermland gsii.^[2] Är isch z Zwiefalte-Sonderbuech uf d Grundschuel gange un derno uf s Gymnasium z Riedlenge un z Simmerenge. Noch em Abitur anne 1968 un em Grundwehrdienscht het er vu 1970 bis 1975 an dr Universitet Hoheheim Biologi un Chemi fir s Lehramt studiert, anne 1975 het er s erscht Staatsexame abglait, 1977 s zweit Staatsexame.

Noch em Studium isch dr Kretschmann as Gymnasiallehrer in dr Schuldienscht vum Land Bade-Wirttebärg yydrätte. Är het z Stuegert, Esslenge, Menge, Bad Schusseried un am Hauezollre-Gymnasium Simmerenge as Lehrer fir Biologi, Chemi un Ethik gschafft. Fir d Uusiebig vu syym barlemäntarische Mandat isch er zytwyys vum Schueldienscht berurlaubt gsii, wider syter 1996.

As Studänt isch er e baar Johr Vorsitzer vum Allgmaine Studierendenuusschuss (AStA) gsii.

1979/80 isch dr Kretschmann ain vu dr Mitgrinder vu dr Griene Bade-Wirtteberg gsii. Vu 1980 bis 1984 isch er zem erschte Mol fir di Griene in dr Landdag vu Bade-Wirttebärg gwehlt wore, wun ere 1983 as Noofolger vum Wolf-Dieter Hasenclever Fraktionsvorsitzer woren isch. 1986/87 isch er Grundsatzreferänt im erschte griene Umwältminischterium z Hesse bim Joschka Fischer gsi.

Anne 1988 isch dr Kretschmann wider in dr bade-wirttebärgisch Landdag gwehlt wore, 1992 het er syy Mandat verloore un isch wider in dr Schueldienscht gange. 1996 isch er wider in dr Landdag gwehlt wore un isch syterhär beurlaubt vum Schueldienscht. Vu 1996 bis 2001 isch er Vorsitzer vum Uusschuss fir Umwält un Verchehr im Landdag gsi. No dr Wahl vum Dieter Salomon zum Oberburgermaischter vu Fryybeg isch dr Kretschmann 2002 zum Fraktionsvorsitzer vu dr Griene gwehlt wore.

Dr Kretschmann isch Spitzekandidat vu dr Griene fir d Landdagswahl z Bade-Wirttebärg 2011 gsii. Mit 24,2 Brozänt vu dr Stimme un 36 Abgordnete sin di Griene uf s bescht Ergebnis chuu, wu si bishär bin ere Landdagswahl ghaa hän. Si sin no dr CDU mit 60 Mandat un vor dr SPD mit 35 Mandat zwootsterkschti Fraktion im Landdag wore.

Dr Kretschmann het as Verhandligsfierer vu dr Griene mit dr SPD e Koalitionsverdrag uusghandlet. Am 12. Mai 2011 isch dr Winfried Kretschmann vu dr Landdagsabgordnete zum Minischterbresidänt vu Bade-Wirttebärg gwehlt wore. Är het 73 Stimme iberchuu un dodermit 2 Stimme meh, wie Griene un SPD zämme hän. Är isch dr erscht Minischterbresidänt vu dr Griene in eme Bundesland.

Am 12. Oktober 2012 isch dr Kretschmann im Bundesrot zum 1. Novämber 2012 aistimmig fir ai Johr zum Bresidänt vum dytsche Bundesrot gwehlt wore.

Zue dr Landdagswahl am 13. Merz 2016 isch dr Kretschmann wider as Spitzekandidat vu syre Bartei aadrätte. Di Griene sin mit eme Stimmenaadail vu 30,3 Brozänt zum erschte Mol bi re Landdagswahl sterkschti Bartei vor dr CDU wore. Wel d SPD aber mit rund 13 Brozänt starki Verluscht ghaa het, het di grien-rot Koalition kai Meehait me ghaa. Schließlig hän di Griene ne Koalition mit dr CDU bildet. Dr Kretschmann isch derno am 12. Mai 2016 widergwehlt wore.^[3]

As Studänt isch dr Kretschmann Mitgliid vu dr nit-schlagende Studänteverbindig KDStV Carolingia zu Hohenheim gsii. Vu 1973 bis 1975 in dr Hochschuelgruppe vum Kommunistische Bund Weschtdytschland engaschiert,^[4] was er mittlerwyyli e fundamentale bolitische Irrtum nännt.^[5]

Dr Winfried Kretschmann isch Mitglid im Verein der Freunde der Erzabtei St. Martin e. V. un in dr Gesellschaft Oberschwaben für Geschichte und Kultur, derzue vu dr Frynd vu dr Hebräischen Universitet Jerusalem.

Syt em Johr 2000 ghert er em Zäntralkomitee vu dr dytsche Katholiken aa, derzue isch er Mitgliid im Diözesanrot vum Erzbischtum Fryybeg.

Dr Winfried Kretschmann isch syt 1975 ghyrote un wohnt mit syyre Familie syt 1984 z Laiz, eme Stadtdail vu Simmerenge. Syy Frau, d Gerlinde Kretschmann, isch bis 2011 e Grundschuelehreri z Binge gsii un isch rund 15 Johr lang fir di Griene im Gmairot vu Simmerenge ghockt. S Kretschmanne hän zämme drei Chinder, zwee Sihn, Johannes un Albrecht, un e Dochter, Irene.

Dr Kretschmann isch Mitgliid im Laizer Chilchekoor un im Schitzeverain.

• Politiker des Jahres 2011, uuszaichnet vum Magazin Politik & Kommunikation.

• Munzinger Internationales Biographisches Archiv 38/2006 vom 23. September 2006 (hy)

 Commons: Winfried Kretschmann – Sammlig vo Multimediadateie

• Homepage vum Winfried Kretschmann
• Abgordnete-Syte vum Winfried Kretschmann
• Kretschmann - Uuszug us em Abgordnetehandbuech vum Landdag BW