Carne

A carne^[1][2] (d'o latín < CARNIS)^[3] ye o teixiu, prencipalment muscular, que forma parti d'a composición d'un animal, encara que a sobén o termin fa referencia nomás que a animals terrestres.

Ye un alimento común ta los humans y ta d'atras especies animals. A mayor parti d'o consumo de carne d'o ser humán proviene de mamifers, prencipalment d'animals domesticaus. Os humans minchan carne dende a Prehistoria gracias a la practica d'a caza. Posteriorment aconseguioron a domesticación de bels animals, prencipiando asinas a ganaderia ta l'aproveitamiento d'os animals ta lo suyo consumo como carne, entre d'atras cosas.

En a mayoría d'as culturas a carne se cocina antis d'estar consumida. Bellas personas no minchan carne, bien por razons filosoficas u medicas, y son conoixitas como vechetarians.

Os animals que nomás minchan carne se dicen carnivoros. D'atra man, os animals que no minchan carne y s'alimentan de plantas son conoixius como herbivoros y los que minchan de tot, como omnivoros.