Expo 2008

A tematica d'a Exposición tenió l'augua per obchecto central, baixo lo epigrafe de «augua y desarrollo sostenible», y se'n desglosoron uns cuantos temas: «L'augua, recurso escaso»; «l'augua t'a vida»; «os paisaches de l'augua» y «l'augua como elemento de relación entre os pueblos».

D'entre os espacios emblematicos, se i troba:

• o Pabillón Puent, construcción que achunta o recinto de l'Expo con o barrio de l'Almozara, encomendada ta l'arquitecta britanico-iraquí Zaha Hadid;
• a Torre de l'Augua, gratacielos de 76 metros d'altaria, disenyau per Enrique de Teresa, que permete de canalizar l'augua d'o recinto de l'Expo en creyar un circuito trancau en o cual se pueden fer actividaz variadas;
• o Palacio de Congresos de Zaragoza, de Nieto & Sobejano;
• l'Acuario fluvial, adestinau a estar o mes gran d'Europa;
• o Pabillón d'Aragón, d'os arquitectos Olano y Mendo;
• o Pabillón d'Espanya, de l'arquitecto navarro Patxi Mangado, un edificio climaticament sostenible, a refricheración d'o cual se fa de trazas naturals per meyo de l'augua de plevia;
• a Palanga d'o Voluntariau de Manterola que, con una lonchitut de 277 m, achunta las dos espuendas sin emparar-se mica sobre o río, con un mástel de 75 metros d'altaria;
• o Puent d'o Tercer Milenio, que enlaza la marguin dreita de l'Ebro con a Expo;
• o Pabillón Latinoamericán, que con o epigrafe "Baixo la plevia, selvas y bosques latinoamericans" esprisa la valura de l'augua d'as selvas latinoamericanas, entegrando-ie elementos climaticos, edaficos, zoolochicos, botanicos y hidrolochicos en os suyos conceptos expositivos, sobre o río Ebro, a cargo de l'arquitecto mexicano Fernando López Guerra;
• as seis Plazas tematicas, que deenvolicoron un seguito d'exposicions y espectaclos como estimulo t'a reflexión sobre l'augua;
• cualques telecabinas que achuntan a Estación Intermodal de Zaragoza-Delicias con o parque metropolitano y o recinto de l'Expo.

A lo redol de l'Expo s'ha disenyau un gran parque metropolitano, a on que os vesitadors pueden fer diferents actividaz, pus conta d'entre altras cosas con:

• plachas fluvials;
• una canal d'auguas furas;
• una zona termal;
• un chardín botanico;
• un campo de golf;
• un pabellón de celebracions.

Amés, en relación con a celebración d'a Expo, uns altros prochectos estioron:

• a construcción d'un azut en l'Ebro que regla las auguas ta fer-ie un trampo navegable;
• a recuperación d'as espuendas de l'arrigo per meyo d'a enamplada d'as ceras, a esmarguinada d'o soto de ripera, a construcción de miradors u la instalación de pistas de voleibol y futbol placha, d'entre altras cosas;
• l'amilloramiento de La Uerba, d'o Galligo y d'a Canal Imperial d'Aragón;
• a incorporación d'os antigos depositos de Casablanca, como laco artificial con embarcacions;
• a remodelación y enamplada de l'aeropuerto de Garrapiniellos.
• l'amilloramiento d'a iluminación d'a ciudat, igual a molimentos y puents como a carreras y avenidas, amés d'a la basilica d'o Pilar y a la seu de Sant Salvador.

Amés de totas as Comunidaz Autonomas d'o Estau espanyol, a lista d'os 108 estaus d'o mundo que participoron en l'Expo 2008 estió a siguient:

Países que i participoron
Haití	Alcheria	Alemanya	Andorra
Angola	Antigua y Barbuda	Arabia Saudita	Archentina
Australia	Austria	Bahamas	Barbados
Belchica	Belice	Venezuela	Vietnam
Bolivia	Bulgaria	Cabo Verde	Camerún
Chamaica	Chapón	China	Chordania
Colombia	Corea d'o Sud	Costa Rica	Croacia
Dinamarca	Dominica	Echipto	Ecuador
El Salvador	Emiratos Arabes Unius	Eslovaquia	Etiopia
Filipinas	Francia	Grenada	Grecia
Guatemala	Guinea Ecuatorial	India	Indonesia
Italia	Kazaquistán	Kenya	Kuwait
Lituania	Malaisia	Malí	Marruecos
Mauritania	Mexico	Mónegue	Mozambique
Namibia	Nicaragua	Nícher	Nicheria
Omán	Honduras	Pakistán	Panamá
Paraguai	Perú	Polonia	Portugal
Qatar	Republica Dominicana	Rumanía	Rusia
Sant Vicent y as Granadinas	Sant Cristofo y Nieus	Santa Lucia
Senegal	Siria	Sudán	Suiza
Sudafrica	Surinam	Tailandia	Tanzania
Trinidad y Tobago	Tunicia	Turquía	Ucraína
Uganda	Uruguai	Yemen	Ciudat d'o Vaticano

Ye previsto que bels edificios de l'Expo sian logaus u enallenaus a diferents institucions. O Pabillón d'Aragón, per eixemplo, será la seu d'una consellería d'o Gubierno d'Aragón. Dos d'as construccions mes emblematicas, a Torre de l'Augua y o Pabillón Puent, podrían estar adquerius per conoixidas institucions financieras aragonesas.

Os pabillons internacionals s'adestinarán a uficinas a fin de creyar o parque empresarial mes gran de Zaragoza. En a suya remodelación s'ha embrecau lo estudio madrilenyo Lamela. O nuevo recinto contará igualment con establimientos ta l'ocio y a restauración.

A construcción d'o recinto de l'Expo 2008 a lo Meandro de Raniellas ye estada cuestionada dende diferents colectivos socials que han ensistiu en a contradicción d'as obras y d'a ubicación d'o evento con o lema d'a propia exposición referiu a la sostenibilidat.

En ixe sentiu, os cheologos recomiendan no edificar sobre ramblars como o Meandro de Raniellas, ya que diz que corren periglo d'engaronar-se cada 20 anyadas. Ta solucionar o problema, se i ferán bels diques, encara que ixo podría resultar insuficient a largo termín.

Cientificos especialistas en limnolochía han criticau a construcción d'un azut abatible en l'Ebro, feito ta creyar una lama d'augua estable de 4 km, pus en altera o rechimen hidraulico. Per istas obras, a biodiversidat fluvial s'ha visto prou alterada, ya que ha caliu retirar os moluscos bivalvos autoctonos en un trampo de 8 km.

As queixas d'a vecindat per o nivel de rudio que pateixen son cutianas.

• (es)Sitio web oficial.
  • (es)Blog oficial d'Expo Zaragoza 2008 - Primer blog en a historia d'as Exposicions Internacionals.
• (en) (fr) Sitio web d'o Bureau International des Expositions.
• (es) Video d'o espot promocional de l'Expo Zaragoza 2008.
  • (an) Versión aragonesa de l'anuncio oficial.
• (es) Informe d'Ecolochistas en Acción de Zaragoza sobre o prochecto d'Expo 2008 a lo Meandro de Raniellas t'o Bureau Internacional des Expositions.
• (es)Sitio web en contra d'a Expo.