Copa del Rei de fútbol

Nomes

La denominación histórica y xenérica de la competición ye Campeonatu de España (n'asturianu, Campeonatu d'España) anque'l nome oficial del tornéu foi camudando en función de quién fuera'l xefe d'estáu español, que ye quien da'l troféu dende la primer edición. Asina, dende 1903 hebo los nomes que vienen darréu:

• Campeonatu de España - Copa de Su Majestad el Rey (Campeonatu d'España - Copa de la So Maxestá'l Rei) ente 1903 y 1930.
• Campeonatu de España - Copa de Su Excelencia el Presidente de la República (Campeonatu d'España - Copa de la So Escelencia'l Presidente de la República) ente 1931 y 1936.
• Torneo Nacional de Fútbol (Tornéu Nacional de Fútbol) en 1939.
• Campeonatu de España - Copa de Su Excelencia el Xeneralísimu (Campeonatu d'España - Copa de la So Escelencia'l Xeneralísimu) ente 1940 y 1976.
• Campeonatu de España - Copa de Su Majestad el Rey (Campeonatu d'España - Copa de la So Maxestá'l Rei) de 1977 hasta anguaño.

Ediciones

En 1902 xugóse por iniciativa de Carlos Padrós, fundador y más tarde presidente del Madrid FC (anguaño Real Madrid CF), una competición de fútbol pa celebrar la mayoría d'edá y la subida'l tronu del rei Alfonso XIII baxo'l nome de Concurso Madrid de Foot-ball o popularmente, Copa de la Coronación. Los participantes nel tornéu fueron: Madrid FC, FC Barcelona, Club Español de Foot-Ball, New Foot-Ball de Madrid y Club Bizcaya (un equipu formáu con xugadores del Athletic Club y del Bilbao FC).La final xugáronla esti últimu equipu y el FC Barcelona, resultando campeón el Club Bizkaya. Anque'l troféu d'esta competición guárdase nel muséu del Athletic Club y el club cunta la victoria nel so palmarés, la RFEF nun la reconoz oficialmente y considérala na más como precursora de la Copa del Rei.^[1][2]

L'ésitu que tevo esa competición fizo que Carlos Padrós decidierá facer un tornéu añal a nivel nacional nel que participaren la mayor parte de los clubes qu'esistíen naquella xera, anque llimitaos a ún per rexón. Asina entama en 1903 el nomáu Campeonatu de España baxo la organización del Madrid FC, xugándose los partíos nel Hipódromo de la Castellana (nel que yá se xugaren los de la Copa de la Coronación del añu anterior). El troféu pal campeón yera una copa donada pol rei Alfonso XIII que pasaría a propiedá del club que ganara'l tornéu tres años siguíos o cinco alternos. Esta primer edición xugóse col sistema de lliga y nella participaron na más tres equipos: el Club Español de Foot-ball (Catalunya), el Madrid FC (rexón centro) y Athletic Club (rexón norte). El campeón foi esti últimu, tres remontar un 2-0 inicial al Madrid FC nel partíu decisivu, qu'acabó 2-3.

La Copa del Rei foi'l campeonatu nacional del fútbol español dende 1903^[3] fasta l'entamu del Campeonatu de Liga — Campeonaut de Lliga, n'asturianu — en 1928. Al principiu foi conocida como Copa del Ayuntamiento de Madrid (Copa del Conceyu de Madrid). Ente 1905 y 1932 foi nomada Copa de Su Majestad El Rey Alfonso XIII (Copa de la So Maxestá'l Rei Alfonso XIII). Nos tiempos de la II República Española'l nome yera Copa del Presidente de la República o Copa de España (Copa d'España) y mientres de la dictadura de Francisco Franco'l tornéu pasó a ser la Copa de Su Excelencia El Xeneralísimu o Copa del Xeneralísimu (Copa de la So Escelencia'l Xeneralísimu o  Copa del Xeneralísimu). Na edición de 1904, l'Athletic Bilbao foi declaráu ganador pola non comparecencia del so rival, l'Español de Madrid. Tanto en 1910 como en 1913 hebo una dixebra ente los clubes y dos asociaciones rivales, la Unión Española de Clubs de Fútbol y la Federación Española de Fútbol, qu'entamaron dos competiciones distintes: la Copa UECF y la Copa FEF. En 1937, mentanto la Guerra Civil Española, los equipos de la zona republicana xugaron la Copa de la España Libre (Copa de la España Llibre) que ganó'l Levante UD tres de vencer 1-0 na final al Valencia CF. Anque'l Congresu de los Diputaos encamentó en 2007 a la RFEF a que reconociera el tornéu como una Copa del Rei ganada pol Levante UD,^[4] la decisión sigue ensin ser tomada.^[5]

Vistu'l discutiniu tocante a la competición de 1902, les estadístiques de los ganadores son tamién discutíos: el FC Barcelona ganó la Copa del Rei 29 vegaes, y xusto tres d'él ta l'Athletic club con 23 o 24 títulos dependiendo la fonte. A lo llargo de la historia de la competición hebo namás que 13 trofeos, que los equipos guarden en propiedá dempués de ganar cinco torneos, tres torneos en tres años siguíos o n'ocasiones especiales. Asina, el FC Barcelona tien cinco copes, l'Athletic Club tien tres y el Real Madrid CF tien una. Amás l'Athletic Club guarda un troféu como primer ganador de la competición, el Sevilla FC tien un Trofeo del Xeneralísimu (Troféu del Xeneralísimu) y el Club Atlético de Madrid otru como ganadores de la primer y cabera Copa del Xeneralísimu en 1939 y 1976 respeutivamente, que-yos fueron entregaos dempués de morrer Francisco Franco. N'avientu de 2010 entregóse-y al Sevilla FC (ganador del tornéu esi añu) otru troféu pa celebrar la victoria d'España na Copa del Mundu de la FIFA de 2010.^[6]

Enantes de la formación de la competición de lliga en 1929, el tornéu yera en realidá'l campeonatu nacional y los equipos clasificábense pal mesmu al traviés de lligues rexonales. A lo llargo de la historia la competición xugóse en varios formatos, incluyendo fases de grupos. A diferencia de la FA Cup inglesa, la entrada na competición ye llimitada: na más son invitaos a participar los equipos de Primera y Segunda División, dellos equipos de Segunda División B y los campeones de caún de los grupos de Tercer División (o un equipu que los sustituya si son filiales). Nes primeres rondes xuégase na más un partíu, y a partir de dieviseisavos de final según el sistema de partíos d'ida y vuelta. La final tien llugar nun campu neutral. L'equipu ganador del tornéu clasifícase pa la Supercopa d'España y pa la Lliga Europa de la UEFA de la temporada siguiente.

‡ Xunióse en 1915 al Irún Sporting Club pa formar el Real Unión Club de Irún.

‡‡ Filial del Real Madrid CF. Los equipos filiales dexaron de poder competir nel tornéu de 1990-91.

• Páxina web oficial en RFEF.es
• España - Llista de finales de Copa en RSSSF.com