J.K. Rowling

Si Joanne "Jo" Rowling, (namundag Hulyo 31, 1965,^[1] na mas bisto sa apod na J. K. Rowling, sarong Briton na autor na bantog na gayo komo iyo an kagmukna kan Harry Potter na seryeng pantasya. An ideya daa kaini napo'nan kan an autor nagbabyahe sa tren haleng Manchester pasiring London kan 1990. An mga librong Potter nag'ani nin mahiwas na pagreparo sa kinaban, guminana nin manlaenlaen na premyo, nagbentang labi sa 400 million na kopya^[2] asin iyo an nagin pasisikaran kan si popular na serye nin mga pelikula, kun saen si Rowling may pagkikiaram asin pag'ooyon kan dalagan kan skript^[3] asin siring man, may kontrol sa pagmumukna kaini bilang siya an prodyuser sa pinal na kabtang kan serye.^[4]

Si Rowling masabi pa bantog man sa saiyang istoryang "hale sa pagkapobre nagin sobrang yaman" na istorya kan buhay, kun saen guminantad sa pagbuhay luwayluway hale sa pag'sarig sa welfare hanggan nakamit an status nin sarong multi-milyonaryo sa laog nin limang taon. Kan Marso 2011, kan pinagbalangibog si listahan kan mga bilyonarryo sa kinaban, an Forbes natantya na an netong halaga kan asset ni Rowling nag'abot nang E.U.$1 billion.^[5] Sa 2008 Sunday Times Rich List an magasin pinagpako an yaman ni Rowling na maabot £560 million ($798 million), o rinaranggo siya komo ika-12ng pinakamayaman na babae sa Reyno Unido.