Lionel Messi

Si Lionel Andrés Messi, bistado man bilang si Leo Messi,^[1] (namondag kan 24 Hunyo 1987) iyo an sarong Arhentinong propesyonal na parakawat nin futbol na minakawat bilang sarong forward asin kapitan kan nasyunal na koponan kan Arhentina. Sa presente, siya an sarong talingkas na ahente, na nagkawat kan saiyang entirong propesyonal na karera para sa La Liga club na Barcelona, kun siya nagin kapitan poon 2018 hasta 2021.

Harus pigkokonsidera bilang an pinakamatibay na parakawat sa kinaban, asin pigbibisto kan nagkapira bilang an pinakamatibay na parakawat sa gabos na panahon^[2], si Messi iyo nanggana nin rekord na anom na Ballon d'Or na gawad, rekord na anom na European Golden Shoes, asin kan 2020 iyo pinangaranan sa Ballon d'Or Dream Team. Siya iyo kaapil kan Barcelona sa entirong propesyonal na karera niya, kun sain nanggana siya nin club-rekord na 34 na tropeyo, kaiba an sampulong titulo sa La Liga,pito sa Copa del Rey asin apat sa UEFA Champions Leagues. Sarong prolipikong para-iskor asin matibay maghimo nin mga play, si Messi kinakapotan an rekord para sa pinakadakol na goal sa La Liga (474), sarong La Liga asin European league na season (50), pinakadakol na hat-trick sa La Liga (36) asin sa UEFA Champions League (8), sagkod pinakadakol na assists sa La Liga (192), sarong La Liga and European league na season (21)^[3] asin an Copa América (17). Siya an naka-iskor nin lagpas 750 na senyor sa karerang goal para sa club asin nasyon, sagkod siya an igwa nin pinakadakol na goal (sa gabos na panahon) nin sarong parakawat para sa sarong club.