El Brasil[12], oficialmente República Federativa do Brasil, ye'l país más grande d'América del Sur y el quintu más grande y pobláu del mundu, con 8,5 millones de km² d'estensión y una población de más de 208 millones d'habitantes. La so capital nacional ye Brasilia, que sustituyó a Rio de Janeiro en 1960, y la ciudá más poblada ye São Paulo. El país ta formáu por 26 estaos y un distritu federal, sodividíos en 5.570 conceyos. Ye'l país más grande que tien el portugués como llingua oficial, y ún de los más multiculturales y con mayor diversidá étnica del mundu.
Arrodiáu pol océanu Atlánticu al este, Brasil tien 7.491 km de costa, y llenda con toos menos dos de los países sudamericanos: Chile y Ecuador. Al norte llenda con Colombia, Venezuela, Guyana, Surinam y Guyana Francesa; al sur Arxentina, Uruguái y Paraguái; al este l'Océanu Atlánticu y al oeste Bolivia y Perú. La conca del ríu Amazones inclúi una xigantesca viesca tropical, bayurosa en recursos naturales y minerales, que ye l'hábitat de pueblos indíxenes que gocien de proteición llexislativa.
El Brasil actual taba habitáu por bien de naciones tribales primero de que, en 1500, aportara a elli Pedro Álvares Cabral, que reclamó les tierres nes que desembarcó pal Imperiu portugués. Siguió siendo una colonia d'esi país hasta 1808, cuando la capital del imperiu, nel contestu de les guerres napoleóniques, foi treslladada de Lisboa a Rio de Janeiro. En 1815 la colonia foi elevada al estatus de reinu cola formación del Reinu Xuníu de Portugal, Brasil y Algarve. La independencia brasilana producióse en 1822 cola creación del Imperiu de Brasil, un estáu xunitariu gobernáu por una monarquía constitucional y con un sistema parllamentariu. La ratificación de la primer constitución del país en 1824 llevó a la formación d'un parllamentu bicameral, niciu del actual Congresu Nacional. El país convirtióse nuna república presidencial en 1889, tres d'un golpe d'estáu. En 1964 xubió al poder una xunta militar, que gobernó el país hasta 1985. L'actual constitución brasilana, aprobada en 1988, define'l país como una república federal democrática.
L'actual Constitución de Brasil foi promulgada'l 5 d'ochobre de 1988. Nella establécese que la República Federativa de Brasil, formada pola xuntura indisoluble de los estaos y los conceyos y del distritu federal, constitúise nun estáu democráticu de derechu.
El poder executivu exércelu'l presidente de la República col sofitu d'un gabinete de ministros. El presidente, xunto col so vicepresidente, tienen de ser elixíos por mayoría absoluta. El so mandatu dura cuatro años, y puede repetir namái una vegada.
El poder llexislativu exércelu el Congresu Nacional, una institución bicameral formada pola Cámara de Diputaos y el Senáu Federal. La cámara fórmenla 513 diputaos, elixíos al traviés d'un sistema proporcional nos 26 estaos y nel distritu federal pa un mandatu de cuatro años. El senáu fórmenlo 81 miembros: trés por cada estáu y trés más pol distritu federal. El so mandatu dura ocho años, magar que cada cuatro renuévase parcialmente.
No que cinca al poder xudicial, el so muérganu cimeru ye'l Supremu Tribunal Federal.
El sufraxu, nes distintes eleiciones, ye universal, secretu y obligatoriu. Los estaos, pela so banda, son autónomos, y escueyen caún el so gobernador y la so propia cámara llexislativa.
El presidente del país ye, dende'l 1 de xineru de 2019, Jair Bolsonaro. Los presidentes de la Cámara de Diputaos y el Senáu son, respeutivamente, Arthur Lira y Rodrigo Pacheco.
La xestión del gobiernu del país articúlase (abril de 2012) en 25 ministerios, magar que hai tamién delles secretaríes especiales p'asuntos concretos (Rellaciones Institucionales, Derechos Humanos, Igualdá Racial, Polítiques pa Muyeres, Asuntos Estratéxicos, Aviación Civil, Comunicación Social y Puertos). Los ministerios son los que vienen darréu:
El mapa políticu ye percomplicáu, con bien de formaciones que lluchen, nes diferentes eleiciones, por algamar representación nes diferentes cámares estatales y federales. Los principales d'ellos, que tienen representación na actual cámara de diputaos, son:
Movimento Democrático Brasileiro (MDB). El so presidente ye Valdir Raupp.
Partido Demócratas (DEM). El so presidente ye José Agripino Maia.
Partido da Social Democracia Brasileira (PSDB). El so presidente ye Sergio Guerra.
Partido Democrático Trabalhista (PDT). El so presidente ye Carlos Lupi.
Partido Trabalhista Brasileiro (PTB). El so presidente ye Roberto Jefferson.
Partido dos Trabalhadores (PT). El so presidente ye José Eduardo Dutra.
Partido Comunista do Brasil (PC do B). El so presidente ye José Renato Rabelo.
Partido Socialista Brasileiro (PSB). El so presidente ye Eduardo Campos.
Partido Progresista (PP). El so presidente ye Francisco Dornelles.
Cidadania (Cidadania). El so presidente ye Roberto Freire.
Partido Verde (PV). El so presidente ye José Luiz de França Penna.
Partido Social Liberal (PSL). El so presidente ye Luciano Caldas Bivar.
Partido Social Democrático (PSD). El so presidente ye Gilberto Kassab.
Partido Humanista de Solidariedade (PHS). El so presidente ye Paulo Roberto Matos.
Partido Socialista dos Trabalhadores Unificado (PSTU). El so presidente ye José Maria d'Almeida.
Partido Socialismo e Liberdade (PSOL). El so presidente ye Afrânio Radeu Boppré.
Partido Trabalhista Cristão (PTC). El so presidente ye Daniel Tourinho.
Partido Social Cristão (PSC). El so presidente ye Víctor Jorge Abdala Nosseis.
Partido Social Demócrata Cristão (PSDC). El so presidente ye José María Eymael.
Partido da Causa Operaria (PCO). El so presidente ye Rui Costa Pimenta.
Los sindicatos, pela so banda, son tamién numberosos. Destaquen, a nivel nacional, los que vienen darréu:
Central Unica dos Trabalhadores (CUT), dirixida por Artur Henrique da Silva Santos.
Força Sindical (FS). El so cabezaleru ye Paulo Pereira da Silva.
Uniao Geral dos Trabalhadores (UGT), dirixida por Ricardo Patah.
Central Geral dos Trabalhadores do Brasil (CGTB). El so presidente interín ye Ubiraci Dantas d'Oliveira.
Coordenação Nacional de Lutas (Conlutas), dirixida por una coordinadora colexada.
Central dos Trabalhadores e Trabalhadoras do Brasil (CTB). El so presidente ye Wagner Gomes.
Nova Central Sindical de Trabalhadores (NCST), dirixida por José Calixto Ramos.
La so economía tien importancia a nivel americanu y mundial, cola agricultura (ye'l mayor productor de café, naranxa y zucre a nivel mundial), la ganadería (tien la mayor cabaña bovina del mundu y ye'l mayor esportador mundial de carnes), la minería (piedres precioses, fierro, niobiu, bauxita) y la industria (automóviles, aviones, ordenadores, etc.). El PIB de Brasil ye'l mayor d'América Llatina.
Los 211.755.692 habitantes en 2020, según l'Institutu Brasilanu de Xeografía y Estadística (IBGE), distribuyíos per 27 unidaes federatives. Les principales ciudaes (36 con más de 500.000 habitantes) son: