Atlas V

Atlas V é a versión máis moderna e a única en servizo da familia de foguetes Atlas, que tivo a súa orixe a finais dos anos 1950. O Atlas V é fabricado por Lockheed Martin e operado por United Launch Alliance (ULA).^[11]

O Atlas V está concibido como un lanzador modular, cun elemento central común, o Atlas Common Core Booster (CCB, que podería traducirse como Lanzador Central Común) e uns elementos variables, como a segunda etapa Centaur, as diferentes cofias e un número variable de pequenos foguetes aceleradores de propelente sólido (SRB, Solid Rocket Booster) adicionais.^[11]

As diferentes versións do Atlas V numéranse seguindo un esquema de tres cifras:^[1][11]

• A primeira cifra indica o diámetro da cofia usada: 4 ou 5 metros.
• A segunda cifra indica o número de SRBs usados co foguete, e pode variar entre 0 e 5.
• A terceira cifra indica o número de motores da etapa Centaur, que pode ser 1 ou 2.

Por exemplo, un Atlas V 501 é un Atlas cunha cofia de 5 metros que non usa SRBs e cunha etapa Centaur cun só motor.

A modularidade permite unha gran flexibilidade no rango de cargas que o Atlas V é capaz de poñer en órbita, variando dunhas 10 a 20 toneladas para LEO (órbita baixa terrestre) e dunhas 4 a 8 toneladas para GTO (órbita de transferencia xeoestacionaria).^[1][11]

Outros artigos

• Atlas