Chaira europea oriental

A chaira europea oriental (tamén chamada chaira de Rusia,^[2] especialmente polos estudosos rusos,^[3] ou historicamente chaira sarmática^[4]) é unha vasta chaira interior que se estende ao leste da chaira europea setentrional,^[5] e comprende varias mesetas que se estenden dende os 25 graos de lonxitude leste. Inglúe a parte máis occidental das elevacións de Volhynian-Podolian, a meseta central rusa, e no límite oriental a meseta do Volga. A chaira inclúe unha serie de cuncas hidrográficas como as dos ríos Dnieper, o Oka-Don e o Volga. Na parte máis meridional da chaira están o Cáucaso e os montes de Crimea.^[5] Xunto coa chaira europea setentrional constitúe a maior parte da gran chaira europea, a área máis grande de Europa sen grandes montañas.^[6]

A chaira europea oriental cobre todo ou a maior parte dos estados bálticos,^[2] Belarús, Ucraína, Moldavia, Romanía e a Rusia europea. Esténdese aproximadamente por 4 000 000 km² e unha altura media duns 170 m.