A carreira comezou en Port Adelaide e logo dun percorrido de 783,8 quilómetros marcados pola intensa calor[1] rematou en Adelaida. Nela participaron 140 ciclistas de 20 equipos, un número de 7 por equipo. A etapa raíña foi a quinta, co habitual final en alto no outeiro de Willunga.
O gañador foi o surafricano Daryl Impey, que acabou igualado a tempos co local Richie Porte, pero que venceu por ser moito máis regular nas posicións ao final das tiradas, logrando así o característico xersei ocre da proba austral. No terceiro posto da xeral acabou o neerlandés Tom-Jelte Slagter.
No entanto ás clasificacións secundarias, o campión do mundo eslovaco Peter Sagan logrou o maillot verde dos puntos, o surafricano Nicholas Dlamini venceu na montaña, o colombiano Egan Bernal conseguiu o branco dos mozos e o equipo do Bahrain-Merida levou a clasificación dos equipos.
O 14 de xaneiro, dous días antes do inicio da tempada oficial, celebrouse unha carreira de exhibición en formato de critérium no centro de Adelaida. Este "paseo" consistiu en 22 voltas a un pequeno circuíto de 2,3 quilómetros. Nesta carreira participan os mesmos equipos e corredores ca no propio Tour Down Under. Nesta edición, a décimo terceira, resultou vendedor ao sprint o campión do mundo Peter Sagan.