Gustaw Mertin
Gustaw Mertin (němsce Gustav Mertin; * 23. februara 1901 w Delnim Wujězdźe, † 9. apryla 1984 runje tam) bě serbski hórniski dźěłaćer, politikar, wjesnjanosta a čłon Sakskeho krajneho sejma.
Hromadźe z bratrom Maksom bě Gustaw Mertin 1924 sobuzałožer Wujězdźanskeje Sokołskeje jednoty. 1928 kandidowaše w nadawku Zwjazka narodnych mjeńšin w Němskej za mócnarstwowy sejm. Jako hórnik bu w lěće 1933 za SPD do gmejnskeje rady Delnjeho Wujězda woleny a w aprylu po zakazu strony přez nacionalsocialistow zaso z njeje wuzamknjeny.[1]
Po wuswobodźenju bě wot 2. awgusta 1945 hač do 30. nowembra 1962 Wujězdźanski wjesnjanosta. Wot 1946 do 1950 bě zdobom za SED čłon Sakskeho krajneho sejma kaž tež Wojerowskeho wokrjesneho sejmika. W nadawku frakcije SED předpołoži w februarje 1948 prěni Serbski zakoń krajnemu sejmej a wopodstatni jón z narěču.
Wot lěta 1921 přisłušeše Gustaw Mertin Wujězdźanskemu serbskemu towarstwu Zahrodka kaž tež Domowinje.[1]