Արևմտյան Եվրոպա

Արևմտյան Եվրոպա, տարածաշրջան է, ընդգրկում է Եվրոպա աշխարհամասի արևմտյան հատվածը։ Այսօր այդ տերմինը հաճախ են օգտագործում Եվրամիության և/կամ ՆԱՏՕ-ի անդամների նշման համար։ Արևմտյան Եվրոպայի տարածքը 3.7 միլիոն կմ² է, բնակչությունը մոտավորապես 370 միլիոն մարդ։

Աշխարհագրական դիրքը շատ նպաստավոր է։ Արևմտյան Եվրոպայի մի շարք երկրներ՝ Ֆրանսիան, Գերմանիան, Բելգիան և Նիդեռլանդները լայն ճակատով ելք ունեն դեպի համաշխարհային օվկիանոս։

Արևմտյան Եվրոպան աչքի չի ընկնում օգտակար հանածոների բազմազանությամբ և պաշարներով։ Համեմատաբար զգալի են քարածխի պաշարները։ Առանձնապես նշանավոր է Ռուրի ածխային ավազանը։ Համեմատաբար քիչ են նավթի պաշարները։ Գազի զգալի պաշարներ կան Նիդեռլանդներում։

Արևմտյան Եվրոպայի երկրներն են՝

•  Ավստրիա
•  Բելգիա
•  Գերմանիա
•  Լիխտենշտայն
•  Լյուքսեմբուրգ
•  Նիդերլանդներ
•  Ֆրանսիա
•  Շվեյցարիա

Արևմտյան Եվրոպան Եվրոպայի քաղաքական և տնտեսական միջուկն է։ Զբաղեցնում է Եվրոպա աշխարհամասի արևմտյան հատվածը և ընկած է Հյուսիսային ու Միջերկրական ծովերի միջև։ Արևմտյան Եվրոպայի պետությունները կարելի է միավորել հետևյալ երեք խմբերում.

• «Մեծ յոթնյակի» անդամ գերխոշոր պետություններ՝ Գերմանիա և Ֆրանսիա
• Բենիլյուքսի պետություններ՝ Բելգիա, Նիդերլանդներ և Լյուքսեմբուրգ
• Ալպյան պետություններ՝ Շվեյցարիա, Ավստրիա և Լիխտենշտայն