Kota Semarang

Mulonyo wilayah Semarang masih sabantuak daerah pasisia nan manjadi muaro dari Kali Garang, Kali Kreo, jo Kali Kripik. Katigo batang aia ko maaliakan banyak endapan tanah nan mambuek dataran pasisia samakin laweh. Latak nan strategis manjadikannyo sabagai labuahan kapa untuak baniago pado maso Mataram Kuno.^[9][10]

Pado akhia abaik ka-15, Kyai Pandan Arang (Ki Ageng Pandanaran) dari Kasultanan Demak tibo di daerah Pulo Tirang untuak badakwah. Inyo manaruko kampuang jo sikolah islam. Di siko tampak dek inyo batang-batang pohon asam nan jarang. Dari situlah manjadi asa mulo namo Semarang, dari duo kato bahaso Jawa, yaitu asem (asam) jo arang (jarang).^[9][10]

Samakin lamo wilayah Semarang samakin rami jo bakambang manjadi pusek labuahan kapa jo niago Kasultanan Demak. Rami urang dari lua Jawa, cando urang Cino, Malayu, Arab, Persia, jo Eropa bamukim di siko. Pado pado 2 Mei 1547, Semarang dinaiakkan statusnyo manjadi wilayah nan satingkek jo kota jo bupati partamonyo Ki Agen Pandanaran II.^[9][10]

Pado taun 1676, Sunan Amangkurat II (Sultan Mataram) maagiah kontrol kota Semarang ka VOC dek pajanjian utang nan disyaraikkan. Pado taun 1705, Semarang sapanuahnyo manjadi kota miliak VOC dek Susuhan Pakubuwono I indak dapek malunasi utang. Sajak itu, samakin banyak urang Indo (Eurasia) nan tingga di Semarang dan bacampua baua jo urang Jawa inggo tabantuak bahaso Javindo.^[11]

VOC nan mulai mangandalikan Semarang mambuek rakyaik indak sanang, sainggo VOC mandirikan benteng untuak malinduangi tampek mukim urang Indo. Benteng dibangun babantuak persegi limo jo ciek pintu di sisi selatan sarato ado limo minaro satiok suduiknyo. Daerah dalam benteng tadiri ateh kampuang Indo, Arab, jo Cino dan disabuik sabagai wilayah kota. Gareja Blenduk jo kantua pamarintahan manjadi puseknyo. Bangunan-bangunan dibangun jo arsitektur Balando dan taruih diparancak.^[12][13] Di lua benteng adolah pamukiman urang asali.^[10][9][14]

Pado maso Parang Jawa, pambangunan kota indak sadareh sabalunnyo. Banyak lahan nan diubah manjadi sawah. Pusek-pusek padok pun bapindah ka sapanjang aliran sungai nan manjadi pasa dan tampek basobok urang dari baragam asa.^[15]

Pado 1847, dibuek jalan gadang ateh parintah Jendral Daendels. Jalan gadang ko maubungkan sadoalah kota di pasisia utara Jawa, tamasuak Semarang.^[16] Kudian dilanjuikkan jo proyek kareta api dek Balando nan maubuangkan Semarang jo daerah lainnyo pado akhia abaik ka-19.^[15] Orientasi padok urang urban pun barubah, dari sungai manjadi jalan.^[16] Daerah urban taruih bakambang sairiang panduduak makin rami dan padek sarato tataruko kampuang-kampuang baru.^[13]

Pado mulo abaik ka-20, tajadi wabah kolera jo tuberkulosis dek padeknyo kota jo kurangnyo higienitas kota. Pamarintah kudian mamparancak kota jo manyadiokan toilet umum, mamparancak drainase, sarato parencanaan pamukiman.^[17][18]

Pado 1917, konsep pamukiman sihaik dibuek di Candi Baru, Semarang Selatan. Konsepnyo dibuek jo mambagi pamukiman manuruik etnik sarato kelas sosial ekonominyo. Pamukiman tabagi-bagi tasabuik tatap saliang taubuang jo jalan, sarato fasilitas sanitasi, kasihatan, jo olahraga nan dapek dipakai umum. Manjalang 1919, ditambah tigo pamukiman lain jo konsep iko inggo dapek manampuang 55% paningkatan populasi di Semarang.^[13][19]

Kota Semarang juo manjadi pusek pamarintahan pantiang untuak Hindia Balando di Jawa bagian tangah. Pado taun 1914, adalah ado kantua babarapo konsulat nagara sahabat dari Balando, antaro lain Amerika Serikat, Belgia, Denmark, Parancih, Inggirih, Italia, Norwegia, Jerman, jo Thailand. Pado taun 1926 ibu kota Provinsi Jawa Tengah (maso Hindia-Balando).^[20]

• 
  Kantua pusek NIS (Gaduang Lawang Sewu), Semarang.
• 
  Rumah urang Cino di Semarang abaik ka-20.
• 
  Foto Kota Lamo Semarang dari langik pado 1920-an.
• 
  Lokomotif 0-6-0 tuo di sabalah Gaduang Lawang Sewu.

Pado taun 1942, Semarang diduduaki Tantara Japang. Sangkek itu, Semarang dipimpin gubernur militer jo duo wakil gubernur militer. Salah satu wakilnyo adolah urang satampek. Sasudah Indonesia mardeka, Semarang juo manjadi tampek parang Tantara Indonesa malawan Japang pado Oktober 1945. Kudian kota ko juo dijadikan ibu kota Provinsi Jawa Tengah.^[21]

Kota Semarang dipimpin dek wali kota, sarato Dewan Perwakilan Rakyat Daerah (DPRD). Wilayahnyo tabagi manjadi 16 kecamatan jo 177 kelurahan. Kecamatan paliang laweh yaitu Kecamatan Mijen nan mancapai 57,55 kilometer persegi. Samantaro kecamatan paliang sampik yaitu Kecamatan Semarang Selatan, nan hanyo 5,93 kilometer persegi. Sacaro umum, Kota Semarang tabagi manjadi limo daerah urbang, yaitu Semarang Pusek, Semarang Timur, Semarang Barat, Semarang Selatan, jo Semarang Utara.^[22]

Kota Semarang paliang banyak diuni dek urang Jawa, kudian diikuti urang Cino, India, Arab, sarato etnik lainnyo nan minoritas. Samantaro agamo nan paliang dominan dianuik adolah Islam.^[22]

Semarang marupokan kota nan rami jo populasi urang Cino, nan mancapai 4-5% populasi. Bak cando daerah lainnyo di Jawa Tengah, urang Cino dapek bacampua baua jo urang Jawa sarato mangecek jo bahaso Jawa sajak ribuan taun nan lalu. Urang Cino paliang rami mauni Kampuang Cino nan disabuik Kampung Pecinan Semawis. Urang Cino pun turuik bapangaruah dalam kuliner jo budaya di Kota Semarang.^[22]

• Kota Lamo Semarang, kadang disabuik pulo Little Netherlands. Tagak sajak abaik ka-18, ado labiah dari 50 bangunan nan masih tajago sarato baarsitektur Eropa abaik ka-18, ka-19, inggo ka-20.^[23]
• Kampuang Cino, satiok malamnyo ado pasa nan disabuik 'Pasar Semawis' nan manyajikan kuliner Cino sarato tampek parayoan Imlek.^[24]
• Tugu Muda (Tugu Mudo), dibangun untuak mangana jaso pahlawan nan gugua katiko Parang Limo Ari di Semarang.^[25]
• Lawang Sewu (bahaso Jawa: Saribu Pintu) diibangun sabagai kantua pusek Parusahoan Kareta Api Hindia Balando.
• Gareja Blenduk (Nederlandsch Indische Kerk) dibangun pado 1753, marupokan gareja paliang tuo di Kota Lamo.

• Kalenteng Sam Poo Kong marupokan kalenteng paliang tuo di kota ko.^[26]
• Musajik Aguang Jawa Tengah, musajik nan juo museum Islam. Arsitektur musajik ko tainspirasi dari musajik di Makah jo Madinah.^[27]
• Wihara Buddhagaya Watugong, marupokan wihara satinggi 45 meter dan mandapek rekor MURI sabagai pagoda paliang tinggi di Indonesia.
• Alun-alun Pancasila, talatak di tangah Simpang Lima City Center (SLCC) CBC.
• 
  Gareja Blenduk
• 
  Kalenteng Sam Poo Kong
• 
  Pagoda Wihara Buddhagaya Watugong

• (Indonesia) Situs web resmi
• Portal Media Semarang Archived 2017-02-02 di Wayback Machine.
• Panduan Raun Semarang
• Panduan Balanjo Semarang Archived 2022-01-23 di Wayback Machine.

l b s	Kota-kota gadang di Indonesia
	Kota	Provinsi	Populasi			Kota	Provinsi	Populasi
1	Jakarta	Daerah Khusus Ibukota Jakarta	10.647.383	Kota Semarang	7	Palembang	Sumatera Selatan	1.573.898
2	Surabaya	Jawa Timur	2.917.688		8	Batam	Kepulauan Riau	1.236.399
3	Medan	Sumatera Utara	2.499.838		9	Pekanbaru	Riau	1.093.416
4	Bandung	Jawa Barat	2.440.717		10	Bandar Lampung	Lampung	1.015.910
5	Makassar	Sulawesi Selatan	1.671.001		11	Padang	Sumatera Barat	927.168
6	Semarang	Jawa Tengah	1.667.131		12	Malang	Jawa Timur	847.391
Sumber: Kemendagri 2018 (indak tamasuak kota satelit)