Хакер (појаснување)

Хакер

Терминот хакер од различни извори се толкува на поинаков начин. Хакерите се лица кои сакаат да се прикажат како луѓе кои се борат за слободна информација и тие ја сметаат технологијата за предизвик и веруваат дека ништо не би можело да им застане на патот. Иако терминот хакер може да се поврзе со кој било аспект од животот, најчесто тој се однесува на компјутерски професионалци, кои знаат како да направатработите да функционираат. Постои заедница, култура на споделување, која е создадена од експерти од областа на програмирањето и мрежите која потекнува од минатите декади кога постоеле првите миникомпјутери и експерименталните програми на АРПАнет (основата на интернет). Терминот хакер потекнува баш од таа заедница. Но, има и еден злобен аспект на терминот хакер на кој често луѓето и медиумите се повикуваат, а тоа е терминот „кракер“. Во ниту еден случај не смееме да ги мешаме овие два термина. Хакерите прават работи од кои нешто произлегува, тие не се криминалци, ниту крадци. Кракерите се уништувачи. Сакаат да уништат се на што ќе налетаат, да ги експлоатираат дупките во системите и да придонесат за нивно искористување за злобни намери. Тие се луѓето кои крадат од кредитните картички на луѓето. Иако често се нарекуваат хакери, тие не се тоа - ни најмалку. Хакерите прават работи од љубов, кои кракерите не би ги сториле ни за пари. Вистинските хакери не сакаат никаква врска со овие луѓе. Ако сакате да бидете хакер, треба посветено да пристапите кон осознавање на она кое е леснопристапно за вас. Ако сте заинтересиран во уметноста, осознајте ја нејзината срж, ако сте заинтересиран во технологијата, проучете ги изворните кодови и програмските јазици со кои се градени заедничките слободни системи како ГНУ/Линукс и слободните варијанти на Јуникс. Кај хакерите често може да се забележат ставови кои ни покажуваат дека оваа заедница сака да придонесе знаењето во светот да биде слободно и преку тоа да помогне на општеството, кое може да добие толку многу од знаењето на масите. За да се однесувате како хакер, треба да верувате дека времето на другите хакери, поминато на размислување е скапоцено, до тој степен што дури и морална одговорност е да се споделува информација, да се добиваат решенија и да се објавуваат јавно како што и другите хакери прават, а со цел другите од заедницата да можат да решаваат исти проблеми наместо да трошат време на веќе решени препреки. Хакерите сметаат дека е разбирливо да се продава доза знаење за преживување, со што би си овозможиле плаќање на сметките и на храната. Разбирливо е и да се користат хакерските способности за издржување на фамилиите или дури и збогатување, сè додека не ја заборавате каузата и другите хакери од кои сте учеле.