ലോകാവസാനം 2012-ൽ എന്ന പ്രചരണം

നിബിരു എന്ന ഗ്രഹം ഭൂമിയുമായി കൂട്ടിയിടിക്കും എന്ന വിശ്വസവും നിലവിലുണ്ടായിരുന്നു. മായൻ കലണ്ടറുമായി നേരിട്ട് ബന്ധമില്ലെങ്കിൽക്കൂടിയും ആരും കണ്ടിട്ടില്ലാത്ത ഈ ഗ്രഹവും ഡിസംബർ 21 ലെ ലോകാവസാനപ്രചരണങ്ങൾക്ക് ആക്കം കൂട്ടിയിട്ടുണ്ട്. ഭൂമിയുടെ കാന്തികധ്രുവങ്ങൾ പരസ്പരം മാറിപ്പോകുമെന്നും ആ സമയത്ത് സൗരജ്വാലകൾ ഭൂമിയിൽ പ്രശ്നങ്ങൾ സൃഷ്ടിക്കും എന്ന പ്രചരണവും ഉണ്ടായിരുന്നു. നാസയിലെ ശാസ്ത്രജ്ഞർ ഈ പ്രചരണത്തെയും മുഖവിലയ്ക്ക് എടുത്തില്ല. ഗ്രഹങ്ങളും സൂര്യനും ഭൂമിയും എല്ലാം ഒരു പ്രത്യേകരീതിയിൽ അണിനിരക്കുമെന്നും അതിലൂടെ ഭൂമിക്ക് നാശം സംഭവിക്കും എന്നതായിരുന്നു മറ്റൊരു പ്രചരണം. നോട്രഡാമസിന്റെ പ്രവചനവും മറ്റൊരു കൂട്ടർ എടുത്തുകാണിച്ചിരുന്നു. 2012 എന്ന സിനിമയും ഈ ആശയത്തെ അധികരിച്ച് ഇറങ്ങിയതായിരുന്നു.