ნჯარიშ ეშმაღალარეფი: ლაჸაფიშ დათებუ

„ნჯარიშ ეშმაღალარეფი: ლაჸაფიშ დათებუ“ (ინგლ. Avengers: Endgame) — 2019 წანაშ ამერიკული სუპერგერგეზული ფილმი, დორსხუაფილი Marvel-იშ კომიქსეფს „ნჯარიშ ეშმაღალარეფი“. ფილმი გინიღჷ კომპანია Marvel Studios-იქ, დისტრიბუცია რდჷ Walt Disney Studios Motion Pictures-იშ. თინა რე „ნჯარიშ ეშმაღალარეფი“ (2012), ნჯარიშ ეშმაღალარეფი: ულტრონიშ ბორჯიშ“ (2015) დო „ნჯარიშ ეშმაღალარეფი: უმუჭყვადუ ლჷმაშ“ გეჸვენჯი. რეჟისორეფი რენა ენტონი დო ჯო რუსოეფი, სცენარიშ ავტორეფი — კრისტოფერ მარკუსი დო სტივენ მაკფილი. ოკათჷნა: რობერტ დაუნი უკლაში, კრის ევანსი, მარკ რუფალო, კრის ჰემსვორთი, სკარლეტ იოჰანსონი, ჯერემი რენერი, დონ ჩიდლი, პაულ რუდი, ბრი ლარსონი, კერენ გილანი, დანაი გურირა, ბენედიქტ ვონგი, ჯონ ფევრეუ, ბრედლი კუპერი, გვინეთ პელტროუ დო ჯოშ ბროლინი.

დეენონსჷ 2014 წანაშ გჷმათუთას ჯოხოთ „ნჯარიშ ეშმაღალარეფი: უმუჭყვადუ ლჷმა — ნორთი 2“. ჯიმალეფი რუსოეფქ პროექტის აკათეს 2015 წანაშ პირელს. ათე წანაშ მესის სცენარისტეფო დექირეს კრისტოფერ მარკუსი დო სტივენ მაკფილი. 2018 წანაშ ქირსეთუთას მარველქ ფილმის გიოდჷ მუჭოთ „ნჯარიშ ეშმაღალარეფი: ლაჸაფიშ დათებუ“.^[2] გინოღალეფქ დიჭყჷ 2017 წანაშ მარაშინათუთას ფეიეტიშ ოლქის, ჯორჯიაშ შტატის^[3] დო მიშჷ „უმუჭყვადუ ლჷმაშ“ მანგო 2018 წანაშა. გეძინელ გინოღალეფი მიშჷ ატლანტას, ნიუ-იორკის^[4] დო შოტლანდიას. ბიუჯეტიქ იჸუ 356 მილიონი ააშ დოლარქ, მუქჷთ იჸუ ისტორიას მასუმა არძაშე ანაყუფასამ ფილმიქ.

„ნჯარიშ ეშმაღალარეფიშ“ პრემიერა რდჷ 2019 წანაშ 22 პირელს Los Angeles Convention Center-ის,^[5][6] ჩინეთის, ავსტრალიას, ევროპაშ დო აზიაშ შხვა ქიანეფს ნაძირეფუქ იჸუ თი წანაშ 24 პირელს,^[7][8] ააშ-იშ თეატრეფს — პრემიერაშე 4 დღაშ უკული IMAX დო 3D ფორმატეფს.^[9][10]ფილმიქ მიღჷ უმაღალაში ფასებეფი კინოკრიტიკოსეფიშე, ნამუეფქჷთ უმოსო ოცქვეს რეჟისურა, არტისტეფიშ რსულება, მუსიკა, ვიზუალური ეფექტეფი დო ემოციური სიმონკე. ოკათური სხუნუეფიშ აგრეგატორ Rotten Tomatoes-ის ფილმის უღჷ 94%.^[11] გვალო ართო მიშნალუქ 2.7 მილიარდ ააშ დოლარს გინაჩირთჷ, მუთით მონწყჷ თეიშახიანი ქიანაში რეკორდი დო იჸუ 2019 წანაშ არძაშე მიშნალუამი დო არძა ბორჯიშ არძაშე ხვეიანი ფილმო.