漢語族

漢語族（粵拼：hon3 jyu5 zuk6；英文：Sinitic languages）係喺中國流行嘅多種互有關聯嘅語言嘅總稱；所包含嘅語言種類問題，喺語言學界有好多爭議。依家嚟講有兩個唔同嘅觀點：一個認為漢語族只有漢語一種語言；另一個認為漢語族包含官話、閩語、粵語、吳語、贛語、湘語、晉語、客家話等八種語言。中國嘅學家多數都支持前者，而喺中國以外嘅地區有唔少學家支持後者。支持後一個觀點嘅人認為漢語唔算係一種單一嘅語言，而係一組互相關聯嘅唔同語言；而支持前一個觀點嘅人則將閩語、粵語、客語、吳語、官話、晉語、贛語、湘語等列為漢語方言。