郾

商周兩代，叫匽。到戰國，又寫做郾。

秦漢時期，所有古籍突然由郾字改成燕字。而近世出土嘅周代青銅器，金文無燕國，只有郾國^[1][2]。呢個改動，史學家大惑不解，按推測因為秦國姓嬴，同郾因相近，認為唔方便用國姓叫別國名，因而改郾為燕。

郾，商代就有郾亳之稱。係殷商要地，地位同殷墟、奄等地一樣咁重要。郾來自匽、妟，可能係同商民拜雀有關。鶠鳥係商民神雀玄鳥^[2]。

周武王姬發滅商，派兄弟監視殷民，是為三監。姬發死，姬誦立，是為周成王。姬誦年幼，由周公姬旦同召公姬奭輔政。三監同殷子彔叛周。姬旦平亂定三監之亂，但子彔就東去到殷屬國地。之後姬旦、姬奭、姬誦分別東征，子彔北上郾地。最後為咗徹底平定殷民，姬旦再南伐，姬奭北伐^[2]。

成王封姬奭個仔姬克做郾侯。保留郾名，可能為咗安撫商遺民。北京琉璃河M1193墓出土文物中，當中有一件刻咗「令克侯于匽」，證明咗呢件大事^[2]。