Bern

Bern (Duits: Bern, [bɛrn], luister (hulp·inligting); Frans: Berne, [bɛʁn], luister (hulp·inligting); Italiaans: Berna, [ˈbɛrna]; Romansch: Berna, [ˈbɛrnɐ], luister (hulp·inligting); Bernse Duits: Bärn, [b̥æːrn]) is die federale hoofstad (regeringsetel) van Switserland en die administratiewe sentrum van die kanton Bern. Met 'n bevolking van 134 794 is Bern die vierde grootste stad in Switserland na Zürich, Genève en Basel.

Bern
Kaart	Wapen
	Vlag
Land	Switserland
Kanton	Bern
Koördinate	46°57′N 7°27′O / 46.950°N 7.450°O / 46.950; 7.450
Stigting	1191
Oppervlakte:
- Totaal	51,62 vk km
Hoogte bo seevlak	481–675 m
Bevolking:
- Totaal (2020)	134 794
- Bevolkingsdigtheid	2 611/vk km
Moedertaal:
- Duits	85%
- Frans	5%
- Ander	10%
Tydsone	UTC +1 (MET)
- Somertyd	UTC +2 (MEST)
Burgemeester	Alec von Graffenried (GFL)
Amptelike webwerf	www.bern.ch

Die stad is in 1191 deur die Zähringen-dinastie gestig en het in 1218 die status van Vrye Ryksstad binne die Heilige Romeinse Ryk verkry. In 1353 het Bern as agtste stad tot die Switserse Konfederasie toegetree.

Ná die groot brandramp van die jaar 1405 is die historiese stadskern volgens die Renaissance-styl in sandsteen heropgebou. Die stadsentrum het met sy kenmerkende arkades het grotendeels in die oorspronklike vorm bewaar gebly en dit is in 1983 deur Unesco as 'n wêrelderfenisgebied gelys. Bern word as een van die indrukwekkendste voorbeelde van Middeleeuse stadsargitektuur in Europa beskou.

Gedurende sy bloeitydperk in die 16de en 17de eeu het Bern tot die grootste stadstaat noord van die Alpe ontwikkel. In 1848 is Bern as die setel van die federale owerhede van Switserland gekies. In die volgende jaar het Bern ook die hoofkwartier van die staatsbeheerde PTT geword.

In 1874 is die Wêreldposunie in Bern gestig. Dit was een van die gasheerstede tydens die FIFA Sokker-Wêreldbekertoernooi in 1954.