Lauerz

Lauerz liit i de Voralpe am nordöschtliche Fuess vo de Rigi, diräkt am Lauerzersee (450 m ü. M.). D Insle Schwanau im Lauerzersee ghört zur Gmeind Lauerz. Im Dorfchärn liit d Pfarrchile St. Nikolaus. Uf Gmeindsgebiet gits vili Einzelhöf, am Seeufer und a de Hanglag gits zahlriichi Feriehüüser.

E früehneri Schriibwiis luutet «Lowerz». Es isch sehr zwiifelhaft, öb Ärzvorchomme i de Gmeind chönntid em Dorf de Name ggä ha. Äbeso schtammt «Lau» nid vom keltische «lokwa» ab, was «See» bedüted. Es isch ehner wahrschinlich, dass de Name «Lauerz» im Zämehang mit eme althochdütsche Personename wie «Lauwart» schtahd. Di urschprünglichi Form döfti «Lauwerts hov» gheisse ha, wobi s Wort für e Hof mit de Zyt wägglah worden isch.^[2]

Uf de Insle Schwanau hed sich im 13. Jahrhundert e Burgaalag befunde. Si isch urschprünglich kyburgisch gsi, schpöter isch de Grundbsitz zu de Habsburger übereggange.

D Kapälle St. Theodul isch ab 1480 als Filiale vo de Pfarrii Schwyz bekannt gsi. Nach eme Brand isch die Kapälle 1508 nü buut worde. Ab 1600 isch Lauerz en eigeni Pfarrii gsi und 1675 isch e Nüübuu vo de Chile St. Nikolaus a d Schtell vo de Kapälle trätte.

Am 2. Septämber 1806 isch Lauerz vom Goldauer Bärgschturz schwär troffe worde. Bi dem Naturereignis, wo 115 Persone debii ums Lebe choo sind, isch de ganz weschtlich Dorfchern zerschtört worde, drunder au d Chile, wo 1807–10 noch Plän vom Pater Jakob Natter nü errichtet worden isch. Uf de Insel Schwanau hend Eremite ihri Behuusig ufgäh, und si isch vom Schwyzer Landeshauptmaa Louis Auf der Maur gchauft worde. Sit 1967 isch si im Bsitz vom Kanton Schwyz.

Quälle: Bundesamt für Statistik 2005^[3]

De Uusländeraateil isch 2010 bi 6,4 % gläge.^[4]

83,6 % vu de Iiwoner sind im Jaar 2000 römisch-katholisch gsii, 8,1 % evangelisch-reformiert.^[4]

Bi de Volchszellig 2000 hend vu de 874 Iiwoner 97,1 % Tüütsch als Hauptspraach aaggää u 2,9 % anderi Spraache.^[4]

De Tieläkt vu Lauerz ghöört zum Höuchschtalemannisch.

• 
  Lauerz vom Ängelschtock us gseh
• 
  S Dorf Lauerz
• 
  D Pfarrchile St. Nikolaus
• 
  Inneaasicht vo de Pfarrchile St. Nikolaus
• 
  Lauerz vor em Bärgschturz vo 1806

 Commons: Lauerz – Sammlig vo Multimediadateie

• Website vo de Gmeind Lauerz
• Andreas Meyerhans: Lauerz. In: Historisches Lexikon vo dr Schwiiz.