James Joyce

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

James Joyce
James Joyce en 1918.
Información personal
Calendata de naixencia	2 de febrero de 1882
Puesto de naixencia	Dublín (Irlanda)
Calendata de muerte	13 de chinero de 1941
Puesto de muerte	Zúrich (Cantón de Zúrich, Suiza)
Ocupación	Escritor, novelista, poeta y dramaturgo
Obras	Ulysses. Dubliners. Portrait of the Artist as a Young Man. Finnegans Wake.
Pachina web	www.JamesJoyce.ie

James Augustine Aloysius Joyce, naixito de Dublín (Irlanda) o 2 de febrero de 1882 y muerto en Zúrich (Cantón de Zúrich, Suiza) o 13 de chinero de 1941, estió un escritor, novelista, poeta y dramaturgo irlandés en luenga anglesa, que ye considerato unos d'os prencipals autors d'a Literatura universal d'o sieglo XX. Encara que a mayor parte d'a suya vida la fació fuera d'Irlanda, ye considerato como un escritor que charra en as suyas obras sobre a ciudat de Dublín, a on heba naixito, y asinas ye o escritor irlandés mas cosmopolita por a suya residencia pero tamién o escritor irlandés mas localista por a suya obra localizata a sobén en Dublín. As suyas obras mas conoixitas son Dubliners (una serie de relatos curtos sobre os habitants de Dublín publicata en 1914), A Portrait of the Artist as a Young Man (una novela publicata en 1916), Ulysses (una atra novela, ista publicata en 1922) y Finnegans Wake (una tercera novela, publicata en 1939 cuan ya yera amanata a suya muerte).

James Joyce ye considerato un destacato representant d'o Modernismo en a Literatura (literatura modernista), uno d'os prencipals representants d'a dita literatura modernista anglosaxona, chunto con d'atros escritors como T. S. Eliot, Samuel Beckett, Ezra Pound u Wallace Stevens. Os elementos que cal destacar en a suya obra literaria son o machistral dominio d'o luengache escrito, amás de l'emplego de nuevas formas literarias, asociatas a la creyación de personaches (como o personache de Molly Bloom en a novela Ulysses) que poseyen una individualidat d'una funda humanitat. Antiparte, Joyce, que yera catolico, fa patent en as suyas obras a suya relación difícil y complexa con a Ilesia Catolica d'Irlanda.