Costa Rica

Cristóbal Colón foi'l primer européu n'aportar a la rexón nel so cuartu y caberu viaxe, en 1502. Por embargu, el so territoriu nun foi conquistáu hasta la segunda metá del sieglu XVI, dempués de que dellos esploradores, como Hernán Ponce de León y Juan de Castañeda, esploraran la so fastera caribeña. D'aquella el territoriu qu'anguañu ye Costa Rica taba pobláu polos chibchas y por otres comunidaes indíxenes más pequeñes, como los boruca, los caribes, los chorotecas y los nahual. Estos pueblos nun aceutaren a los conquistadores, que nun tuvieron un asentamientu permanente na rexón hasta 60 años dempués de qu'aportaran por primer vegada.

El desendolcu de Costa Rica durante la dómina colonial tuvo conseñáu pol aisllamientu relativu nel que vivió respeutu d'otros enclaves españoles na rexón. Como colonia nunca foi rica nin bayurosa. De fechu, el país foi nenguneáu y despreciáu polos colonizadores que cuasi s'escaecieron d'él pola mor de la so falta en minerales.

No cabero del sieglu XVIII, Costa Rica tuvo subordinada a Nicaragua, pese a que la Corona española elevare a la categoría d'intendencies les sos otres posesiones centroamericanes. En 1821, cuando Méxicu se declaró independiente d'España, Costa Rica xunióse, con otros dominios centroamericanos, al feble imperiu mexicanu. En 1823, el país formó parte de les Provincies Xuníes d'América Central, pero en 1838 decidió separtase de la federación centruamericana y constituyóse n'estáu independiente col caudillu Francisco José Morazán como cabezaleru.

En 1890, elixóse a José Joaquín Rodríguez pa la presidencia, nes que tan consideraes les primeres eleiciones llibres dafechu nel continente. Asina, hebo una tradición democrática que nun amenorgó en tola historia sacantes dos vegaes: primeru, cuando l'aventureru norteamericanu William Walker, tres d'apoderiase de Nicaragua, intentó enantar el so dominiu al restu de Centroamérica, y foi derrotáu polos costarricanos; y segundu, cuando pola mor d'un fraude eleutoral hebo una guerra civil na que s'impunxeron les fuercies del líder opositor José Figueres. Un añu dempués promulgóse una Constitución presidencialista qu'esanició la formación d'exércitos. Figueres convirtióse en líder democráticu del área centroamericana, llarada de dictadures que diben durar entá 40 años más.

Metanes la década de los ochenta, la Revolución Sandinista ya se configurara como un fenómenu políticu con repercusiones en tola rexón, y foi a traviés de les sos propuestes pa solventar la crisis rexonal, cola ablucante amenaza d'invasión norteamericana, que'l socialdemócrata Óscar Arias Sanchez ganó les eleiciones de 1986. El denomáu «plan Arias», propunxaba l'altu'l fueu en Nicaragua, la fin de les aides norteamericanes a la "contra" y un calendariu de reformes polítiques en Nicaragua, qu'incluyía'l facer eleiciones y que foi adoptáu pol gobiernu Sandinista. En febreru de 1990, Rafael A. Calderón, del Partido Unidad Social y Cristiana (PUSC) algamó la presidencia.

A partir de la fundación del PUSC en 1983 xestóse en Costa Rica el sistema bipartidista qu'imperó dende entós hasta'l 2002, au los dos partíos mayoritarios y oscilantes nel poder, el PLN y el PUSC, hexemonizaben la política nacional (polo que se-yos aplicó el nomatu de PLUSC). En 1987, l'entós presidente de Costa Rica, el Dr. Óscar Arias Sánchez, consiguió'l Premiu Nobel de la Paz.

Organización política

L'actual Constitución, que define al país como una república democrática, foi promulgada'l 7 de payares de 1949.

El poder executivu exércelu'l presidente. Esti, y los sos dos vicepresidentes, son elixíos simultáneamente, pa un mandatu de cuatro años, por una mayoría de más del 40% de tolos votos emitíos nes eleiciones.

El poder llexislativu reside na Asamblea Llexislativa. Esta compónenla 57 diputaos, que son elixíos tamién por cuatro años y nes mesmes eleiciones que'l presidente.

El muérganu cimeru del poder xudicial ye la Corte Suprema de Xusticia. Esta ta formada por 22 maxistraos, nomaos pa un mandatu mínimu d'ocho años pola Asamblea Llexislativa.

Gobiernu

La presidenta de la república ye, dende'l 8 de mayu del 2014, Luis Guillermo Solís. El so vicepresidente primeru ye Helio Fallas Venegas, y el segundu Ana Helena Chacón Echeverría. El presidente de l'Asamblea Llexislativa ye Marcial Rodríguez Conejo, y los 17 ministerios qu'había n'abril de 2012, colos sos titulares, son los que vienen darréu:

• Presidencia: Carlos Ricardo Benavides.
• Planificación: Laura Alfaro.
• Rellaciones Esteriores: Enrique Castillo.
• Facienda: Fernando Herrero.
• Comerciu Esterior: Anabel González.
• Obres Públiques y Tresportes: Francisco Jiménez.
• Educación: Leonardo Garnier.
• Salú: Daisy Corrales.
• Trabayu y Seguridá Social: Sandra Piszk.
• Xusticia: Hernando París.
• Vivienda y Llucha escontra la Probeza: Fernando Marín.
• Seguridá Pública: Mario Zamora.
• Turismu: Allan Flores.
• Cultura: Manuel Obregón.
• Educación: Alberto Sileoni.
• Ciencia y Teunoloxía: Alejandro Cruz.
• Agricultura: Gloria Abrahams.

Partíos políticos y sindicatos

Los principales partíos políticos del país son los que vienen darréu. Ente paréntesis figura'l nome del so presidente:

• Movimiento Libertario (ML) (Otto Guevara).
• Partido Integración Nacional (PIN) (Walter Muñoz).
• Partido Liberación Nacional (PLN) (Francisco Antonio Pacheco).
• Partido de Unidad Socialcristiana (PUSC) (Gerardo Vargas).
• Partido Aición Ciudadana (PAC) (Elizabeth Fonseca).
• Partido Renovación Costarricense (PRC) (Justo Orozco).
• Partido Patria Primero (PP) (Juan José Vargas).
• Partido Vanguardia Popular (anantes Pueblu Xuníu) (Trino Barrantes).
• Partido Accesibilidd sin Exclusión (PASE) (Óscar López).
• Frente Amplio (José Merino).
• Partido Restauración Nacional (Carlos Luis Avendaño).

No que cinca a los sindicatos, los principales son la Confederación Rerum Novarum, que'l so secretariu xeneral ye Rodrigo Aguilar, y l'Asociación Nacional d'Emplegaos Públicos, que tien a Albino Vargas como'l so secretariu xeneral.

El país ta dividíu nes siguientes provincies:

1. Alajuela
2. Cartago
3. Guanacaste
4. Heredia
5. Limón
6. Puntarenas
7. San José

La población del país, según los datos del censu de 2011, ye de 4.301.712 habitantes. D'ellos, según el mentáu censu, el 86,8% son blancos, el 7% mestizos y el 6,2% pertenez a otres races non especificaes.

Les principales ciudaes del país pol númberu los sos habitantes son les siguientes:

• Presidencia de la República
• Bancu Central de Costa Rica
• Institutu Nacional d'Estadística y Censos
• Institutu Costarricanu de Turismu